ईब्रीपा 10 - ॱलोवा1 क्षो़ठीम नी, हुङये हीन्गीन दो़न शाङाक्याई, ॱयीप ॱङोन्नेगो मालाक हीना होदेक्याई ढीम्जाक च्यीगा लाक। होझ्येरी लो तेनग्याङ च्योई पुगीन ॱमारछो़गी गोने, क्षो़पा पुरु हुङगीनक्याला याङदाक्पा नामा शो ॱमीथुक्वालाक। 2 देरे मेन्ना क्षो़पा पुरु हुङगीनक्याई ॱमारछो़ पुयेला छाम श्याक्की माले? घीझ्येरी ॱनाना क्षो़पा पुरु हुङगीनक्या थेङ च्यीक्लाराङ चाङमा झ्युङये हीन्ना, खुङक्याला राङगी धीक्पाक्याई ग्यो़पा झ्युङये मेतालाक। 3 हीना होदे ॱमारछो़क्याई मीक्याला, लो तेनग्याङ राङगी धीक्पाक्याई ढेन्सो़ ॱलाङालाक। 4 घीझ्येरी ॱनाना ॱलुङ धाङ राक्याई ठाकगी धीक्पाक्या से ॱमीथुक्वालाक। 5 होझ्येरी मास्यीका जीक्तेनदु फेवाराङ खोङबागी सुवालाक, “ॱमारछो़ धाङ क्षो़पा खेराङगी मादो़पालाक, हीना ङी क्षीदु खेराङगी ली़ च्यीक स्यामा जेपालाक। 6 ज्यीन ॱरेक धाङ धीकस्याकगी क्षो़पाला, खेराङगी थुक्ङेउ माजेपालाक। 7 धेनी ङी श्यी़वी, ‘के को़न्क्षोक शीक्ताङ, पेजागी नाङ ङी कोरला ढीक्टा च्योक्रे, खेराङगी थुकोङ डुप्येला ङा होहो़क।’” 8 धाङपो खोङबागी सुवालाक, “ॱमारछो़ धाङ क्षो़पाक्या धेनी ज्यीन ॱरेक धाङ धीकस्याकगी क्षो़पाक्याला, खेराङगी मादो़पालाक। धेनी देक्याला थुक्ङेउ माजेपालाक।” देक्या नी क्षो़ठीमला तेन्दी पुलालाक। 9 धेनी स्याम्ला खोङबागी सुवालाक, “शीक्ताङ, खेराङगी थुकोङ डुप्येला ङा होहो़क।” धेनी ॱमारछो़ ॱङीङबा घीरी को़न्क्षोकगी मेताला जेदी, मास्यीकागी ॱमारछो़गो होदेक्याई छापला श्या जेदालाक। 10 धेनी होदे थुकोङगी गोने, थेङ च्यीकला राङ घीरीगी क्षीदु, येशु मास्यीकाई कुशुकगी ॱमारछो़गी थोक्ने, होराङक्या धाम्पा जे हो़तालाक। 11 क्षो़पो़न हो़ले श्याक्मो ढाङी राङगी श्याप्ची डुप्येला, ॱमारछो़ ॱना च्यीक धाब्ले कुल्ले पुलालाक। धेनी क्षो़पा दी धीक्पा नामाः से ॱमीथुक्वालाक। 12 हीना मास्यीकागी धी़ तेनगी क्षीदु, थेङ च्यीकला धीक्पा सेयेगी ॱमारछो़ पुरी, खोङ को़न्क्षोकगी क्षाक ॱयेरु श्युक्वा जेपालाक। 13 धेनी खोङबागी डाक्याला, को़न्क्षोकगी खोङगी श्याप होकदु माश्याक थुक्पे, खोङबा घुक्ती श्युक हो़तालाक। 14 ॱमारछो़ च्यीकगी गोने धाम्पा जेये हीन्गीनक्याला, धी़ तेनगी क्षीदु फी़न्सुम छोक्पा जे हो़तालाक। 15 दी कोरला धाम्पे थुक्ङीगीयाः, होराङक्याला पाङपो जेदालाक। धाङपो खोङबागी सुङालाक, 16 चोवो सुङालाक, “होदे ङीमाक्याई स्याम्ने, खुङक्यामुला श्याक्ये हीन्गीन, ङी धाम्चागो दे लाक। ङी क्षो़ठीमगो खुङक्याई सेमला श्याक्येहीन, धेनी होदेगो खुङक्याई ॱलोला ढीक्येहीन।” 17 धेनी याङ खोङबागी सुङालाक, “खुङक्याई धीक्पा धाङ लेङेनक्या, ङा नामा धाब्ले ढेन्सो़ मीझ्यी।” 18 धा धीक्पा देक्याला घोयाङ थोप्साना, धीकस्याकगी ॱमारछो़ धा याङ पु मेघो़। शो़पा झ्यीघोयेगी भो़टाक 19 होझ्येरी पी़नक्याओ, येशुगी कुठाकगी गोने, धाम्पे धाम्पा ॱनेसा नाङदु जुयेगी ॱलोगोक, होराङला हो़तालाक। 20 होरी दो़न्दु येशु ढोङा जेगीनगी गोने, धाम्पे धाम्पा ॱनेसागी योल्वा पे जेदी, होदे नाङदु जुयेगी लाम साबा धाङ सो़न्पो च्यीक को़ जेपालाक। 21 धा होराङला को़न्क्षोकगी फोडाङ नाङदु क्योङगीन, क्षो़पो़न खाक्क्षे च्यीक हो़गीन झ्येरी, 22 होरी सेम नाङगी साम्लो ङेन्पाक्या, मास्यीकागी कुठाक तोरती दाक्ता धाङ होरी ली़ क्षु चाङमागी ठी़री, होराङ सेम ढाङपो धाङ यीच्चे तेन्पोगी खारी, होराङ को़न्क्षोकगी डुङदु डो। 23 होरी खेलेन झ्येजा रेवाला तेन्पोमा ॱरुङघो़ घीझ्येरी ॱनाना धाम्चा जेगीन को़न्क्षोक नी, ॱलोते छोक्पा हो़तालाक। 24 झाम्पा धाङ लेशाङगी क्षीदु, होराङ च्यीकगी च्यीकला सेमस्युक पारयेला साम्लो ताङघो़। 25 मी रीङगा छोक्दुला डोङी मेदो़गीन हुङालाक हीना होराङक्यामुला जोम्येला छाम माश्याक। हीना चोवोगी ङीमा ङे ॱलेप्कीनगो, खेक्याई थोथा झ्येरी ॱयो़ल्ले ल्हाक च्यीकगी च्यीकला सेमस्युक पोर। 26 घीझ्येरी ॱनाना धेन्पागी स्येयो़न थोप्तीयाः, धोराङा होराङक्याई काङ चुक्ती धीक्पा झ्यीना, धीक्पा सेयेगी ॱमारछो़ श्येम्मा ल्हाक मेतालाक। 27 हीना को़न्क्षोकगी ठीम्चो़ फोक्येला घुक्ती धेयेगी जीक्टा धाङ खोङगी डाक्याला मेताला जेये हीन्गीन, थुक्ठो़गी मेगी ङेन्का च्यीका हो़तालाक। 28 मोशेगी क्षो़ठीमला ॱमीचीगीन मीगोला पाङपो ॱङी याङना सुमगी पाङपो झ्यीना, खोला ॱङीङजे मीझ्यीदा सेदालाक। 29 धा को़न्क्षोकगी सेला काङबा होकला श्याक्कीन धाङ राङला धाम्पा जेगीन, धाम्चागी कुठाकगोला ॱमेचाङा चीगीन धाङ थुक्जेगी थुक्ङीला ॱमेटा ताङगीनक्याला, देने घाजो़ ल्हाक छेपा फोक्यी हो़टी़ ॱनेरी, खेराङक्याराङ साम्लो तोङदाङ। 30 घीझ्येरी ॱनाना, “डास्या लेन्गीनगो ङा हीन धेनी ङी खुङक्याला लेन ग्याउ।” सुरी सुङगीन खोङबाला, होराङ ङो स्येलालाक। धेनी याङ खोङबागी सुङालाक, “चोवोगी राङगी मीक्याला ठीम्चो़ जेगीलाक।” 31 सो़न्पो को़न्क्षोकगी क्षाकदु ज्यी़ना, जीक्टाक्षे लाक। 32 एम्मागी ङीमाक्याला खेक्या ढेन्सो़ झ्यी। को़न्क्षोकगी हो़ थोप्सारती स्याम्ने, खेक्याई दुक्पु माङा ङ्यावालाक हीना खेक्याई शो़पा झ्येवालाक। 33 खेक्याला धुगा मीमाङक्याई दोङदु ॱमेटा धाङ दुक्जोङ फोक्पालाक धेनी धुगा हुरेराङ दुक्पु ङ्याङगीनक्या मुला थे हो़तालाक। 34 खेक्याई चो़न्पाक्याला ॱङीङजे झ्येवालाक धेनी नोर देने शाङा धाङ धी़ तेन्दु ॱनेगीन नोरगो, खेक्याला हो़गीनगो खीकी स्येरी, खेक्याई नोर खेक्याने ठोक्वाराङ ङ्यामो घेरी शो़पा झ्येवालाक। 35 होझ्येरी खेक्याई ॱङीङतोपगो ङ्याम्दु ॱमाच्युक घीझ्येरी ॱनाना खेक्याला ज्यागा क्षे थोप्कीलाक। 36 खेक्याई को़न्क्षोकगी थुकोङ डुप्ये धाङ खोङगी धाम्चा जेजागो थोप्येगी क्षीदु शो़पा झ्यीघो़। 37 घीझ्येरी ॱनाना तीते च्यीकने, “फेप्ये हीन्गीनगो फेप्कीलाक। धेनी खोङगी धाला जेगीमालाक। 38 ङी ढाङतेनगी मीक्या धेपेगोने छोवा क्यागीलाक, धेनी ग्याप लोक्ती डोगीनक्यामुला ङा मेघा हो़क।” 39 हीना होराङ नी, ग्याप लोक्ती डोगीन धाङ मेताला डोगीनक्या मालाक। होराङक्या नी, धेपा झ्येरी थारपा थोप्थाक्या लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.