गालातीयापा 6 - ॱलोवाच्यीकगी श्येम्मागी खु खुर 1 पी़नक्याओ, मी च्यीकगी झ्यावा ङेन्पा झ्यीगीनगो थेम्ना, खे धाम्पे थुक्ङीला ॱनेगीनक्याई झाम्बो झ्येरी, मी देला लाम ढाङपोला ठीक। धेनी खेक्याराङ होदेने ॱमीली़येगी क्षीला राङला शाप-शाप झ्यी। 2 च्यीकगी श्येम्मागी खुक्या खुर धेनी देरे झ्येरीराङ मास्यीकागी क्षो़ठीम डुप्तु च्युक। 3 मी च्यीकगी राङ घीया मेन्दा राङला च्यीक हीन ॱनेरी साम्ना, खी़ राङ-राङला गोकोर ताङालाक। 4 हीना रे-रेगी राङगी लेगाला ताक्चा झ्यीघोगीलाक। देरे झ्यीना खी़ राङला श्येम्मामुला मादुरा, राङगी च्यो़पाला ङोम्सो झ्यी थुक्कीलाक। 5 घीझ्येरी ॱनाना राङगी खु राङ-राङ खुर घो़गीलाक। 6 का लेन्गीनक्याई राङमुला हो़गीन, शाङा घीरी राङगी ॱलोपो़नमुला घो़ घोगुलाक। 7 राङगी राङला गो ॱमाकोर। को़न्क्षोकला सी़या क्षाले झ्यी थुक्कीमालाक। घीझ्येरी ॱनाना मी च्यीकगी घी ताप्यी, होदेगी ढेबुराङ धुगीलाक। 8 धीक्चेनगी राङश्यीला थी़न्गीन च्यो़पा ताप्कीनक्याई, राङश्यी देने छीवागी ढेबु धुगीलाक। हीना धाम्पे थुक्ङीला थी़न्गीन च्यो़पा ताप्कीनक्याला, थुक्ङीने थामेपे छेसोकगी ढेबु धुगीलाक। 9 धेनी शाङा झ्यीयेला होराङक्या थाङ क्षेये मेतालाक घीझ्येरी ॱनाना हुरे झ्यीना होराङला ढेबु धी़चो़ ताक-ताकला राक्कीलाक। 10 होझ्येरी घुकाप जोरी घाङला होराङ मी घीरीला शाङा झ्येरी डो, धेनी ॱङोन्ने झ्यीना होरी धेपागी मीजाङक्याला झ्यी। पाउलुगी थामे ङेन्ता धाङ छाम्डी 11 तो़दाङ, ङा ङारी लाक्पागी खेक्याला यीगी क्षे-क्षेला ढी हो़क। 12 राङला जीक्तेनदु ढा छाक्पोमा तो़न्ये दो़पा हो़गीनक्याई राङ, खेक्याला पाउ चेगीन ताक ग्याप्येला उजुक झ्यीये थापस्यी झ्यीदालाक। खुङक्या राङला मास्यीकागी ग्याङस्यीङगी झ्येरी दुक्पु मारास्योक ॱनेरी, च्यीगा देरे झ्यीदालाक। 13 याहुदापा पाउ चेगीन ॱरो ॱरुङगीनक्यागीया क्षो़ठीम ॱमीरुङालाक। हीना खुङक्या खीकी दो़नने राङला तो़टा राक्येला, खेक्याई पाउ चेगीन ॱरो ॱरुङये दो़पा झ्यीदालाक। 14 ङा राङ-राङला चोवो येशु मास्यीकागी ग्याङस्यीङला माना, श्येम्मा घीला ङोमग्यु ॱमीझ्युङास्योक। खोङबागी ग्याङस्यीङगी गोने ङी क्षीला जीक्तेन धाङ ङा जीक्तेनगी क्षीला स्यीवा हीन। 15 साबा केगीन माना, पाउ चेगीन ॱरो ॱरुङगीन धाङ ॱमीरुङगीन ॱङीगारा दो़न मेतालाक। 16 धा दे ठीमला चीरी ग्युक्कीन घीरी धाङ को़न्क्षोकगी मीरीक ईस्राएलला श्यीदे धाङ ॱङीङजे भापास्योक। 17 ङी शुला येशुगी ॱमागी ताकक्या हो़गीन झ्येरी, धा देने ॱहाला सी़या ङाला दुक्पु ॱमाताङास्योक। 18 पी़नक्याओ, होरी चोवो येशु मास्यीकागी थुक्जे, खेक्याई सेमला श्युक्वास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.