गालातीयापा 5 - ॱलोवामास्यीकाने राङवाङ 1 राङवाङगी क्षीला, मास्यीकागी होराङला राङवाङ ॱनावालाक होझ्येरी क्षो़ठीमगी ढेन्योक होकला ॱमीछी़दा, तेन्पो झ्येरी धो़क। 2 धा, ङा पाउलु खेक्याला ॱनाहीन, खेक्याई याहुदापाक्याई पाउ चेगीन ॱरो चीना, मास्यीका खीकी क्षीला घीया फेन थोक्कीमालाक। 3 पाउ चेगीन ॱरो चीगीन, घीरीगी क्षो़ठीमगी का घीरी ॱरुङ घो़गुलाक, ॱनेरी ङा याङदा पाङपो झ्यीदाहीन। 4 खे क्षो़ठीमने ढाङपो ग्युरये दो़गीनक्या, मास्यीकाने खा डारी को़न्क्षोकगी थुक्जेने माला ल्हीम हो़तालाक। 5 हीना धेपागी झ्येरी धाम्पे थुक्ङी गोने, होराङ ढाङतेनगी रेवाला घुक्ती धे हो़तालाक। 6 घीझ्येरी ॱनाना मास्यीका येशुगी दोङदु पाउ चेगीन ॱरो चीगीन हीन्ना लाक, ॱमीचीगीन हीन्ना घीया फेन मेतालाक हीना झाम्पागी थोक्ने लेगा झ्यीगीन धेपा च्यीगा फेन थोक्वालाक। 7 खेक्या घायेरे डी़ हो़तालाक हीना, खेक्याला धेन्पागो चीयेला सी़ काक्जो? 8 देरे गो कोरकीन लेगा, खेक्याला भो़ ॱनाङगीन को़न्क्षोकने झ्युवामालाक। 9 क्युरची तीते च्यीकगी भाक्पे री़रा घीरीला, क्युर ॱलाङालाक। 10 खेक्या ङी तावाला माना श्येम्मा खेलेन्गीमालाक ॱनेरी, ङा चोवोला ॱलो कालाहीन। खेक्याला टुक्कीनगो सु हीन्ना, होदेला छेपा फोक्कीलाक। 11 हीना पी़नक्याओ, ङा धोराङा पाउ चेगीन ॱरोगो ची घोगीलाक, ॱनेरी स्येना ङाला श्येम्माक्याई घीझ्येरी ॱनो़ क्याला ले? देगी कोरला ङी स्येहो़नाः, मास्यीकागी ग्याङस्यीङगी कोरला ङी स्येगीनगी घीया ॱनो़ क्याये मेतालाक। 12 खेक्याला टुक्कीनक्याई राङगी पाउ चेये च्यीगा मेन्दा, ज्याराङ चेना ढीक्येहो़क। 13 पी़नक्याओ, खेक्या राङवाङगी दो़नला भो़वालाक। होदे राङवाङ दे ली़गी दो़छाक काङयेला भेचो़ माझ्यी, हीना खेक्या झाम्पागी थोक्ने च्यीकगी च्यीकला श्याप्ची श्यी़। 14 घीझ्येरी ॱनाना क्षो़ठीम घीरी “राङगी खीम्चेला राङला च्योक्रे चेवा झ्यी” ॱनागीन, का च्यीकगी डुप हो़तालाक। 15 हीना खेक्या सेम्चेन च्योक्रे च्यीकगी च्यीकला क्यो़न तारी दुक्पु तेरना, खेक्या खेराङक्यानेराङ मेताला डो माघोवास्योक ॱनेरी शाप-शाप झ्यी। धाम्पे थुक्ङीने ढोवा 16 हीना ङा ॱनाहीन, धाम्पे थुक्ङीने मीछे क्यो धेनी ख्यी़ खेरी ली़गी दो़पाक्या डुप्तु च्युक्कीमालाक। 17 घीझ्येरी ॱनाना ली़गी दो़पाक्या धाम्पे थुक्ङीगी दो़पाला ॱमीथी़न्दालाक धेनी धाम्पे थुक्ङीगी दो़पा ली़गी दो़पाला ॱमीथी़न्दालाक। धेनी दे ॱङीउ डा झ्युरी, खेक्याई थेगीन लेगा झ्यीरु ॱमीच्युक्कीलाक। 18 हीना खेक्या धाम्पे थुक्ङीगी थोक्ने ठीया जेना, खेक्या क्षो़ठीमगी वाङगी होकदु मेतालाक। 19 धा धीक्चेन राङश्यीगी लेगाक्या सावो हो़तालाक। देक्या लोक्येम धाङ दो़क्षाकगी, लेगा धाङ दो़क्षाक घागीन धाङ 20 कुन्डाला क्षो़गीन धाङ ङेन ॱङाक धाङ दाङसेम धाङ धुगा धाङ ठादोक धाङ श्येताङ धाङ राङदो़ धाङ छोक झ्यीगीन धाङ खा डागीन धाङ 21 ॱङीङनाक धाङ रा शीगीन धाङ चो़पा मेगीन श्युक्टा धाङ देरे च्योक्रे लेगाक्या लाक। देरे झ्यीगीनक्याला को़न्क्षोकगी ग्यासीगी ग्युज्यीन थोप्कीमालाक, ॱनेरी ङी एन्ला खेक्याला ॱनेवी धेनी धान्दाः ॱनाहीन। 22 हीना धाम्पे थुक्ङीगी ढेबुगो झाम्पा धाङ घाटो धाङ श्यीदे धाङ शो़पा धाङ ॱङीङजे धाङ शाङपो धाङ ॱलो का थुप्कीन धाङ 23 ॱङ्यामच्युङ धाङ राङ छो़ शीम्गीन लाक। देक्याला ॱमीथी़न्गीन क्षो़ठीम मेतालाक। 24 धेनी मास्यीका येशुगी हीन्गीनक्याई, खोरी धीक्चेन राङश्यीगो दो़क्षाक धाङ दो़पाक्यामुला ग्याङस्यीङदु क्याङदी सेपालाक। 25 धा होराङ धाम्पे थुक्ङी थोक्ने मीछे क्याना, धाम्पे थुक्ङीला थी़न्दी डो घो़गुलाक। 26 होराङक्या राङथोङ धाङ श्येम्माला टुक्कीन धाङ च्यीकगी च्यीकला, ठादोक झ्यीगीन लेगा झ्यीये मेतालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.