गालातीयापा 4 - ॱलोवा1 ङी ॱनागीन लाबगी दो़न दे लाक, ग्युज्यीन च्यीक नोर घीरीगी दाक्पो हीन्ना, खो टुवा हीन्गीन थुक्पे खो ॱयोक्पो च्योक्रे लाक। 2 आकीगी को़री श्याकश्या धी़चो़ थुक्पे, खो क्योङगीन धाङ ॱङेरपागी वाङ होकदु हुङगीलाक। 3 देरे च्योक्रे होराङक्या टुवा हो़ती घाङला, दे जाम्बुलीङगी ल्हाक्याई वाङगी होकला स्योर हो़तालाक। 4-5 हीना धी़चो़ ताक्तागो होसारती, को़न्क्षोकगी राङगी से ताङा जेपालाक। धेनी क्षो़ठीमगी होकदु हो़गीन, होराङक्याला थारपा जेये धाङ होराङ खोङगी से धाङ सेमो झ्युङयेला, खोङबा भोमो च्यीकने क्षो़ठीमगी होकदु ठुङवालाक। 6 खेक्या से धाङ सेमो झ्येरी, को़न्क्षोक राङगी सेगी थुक्ङी, होरी सेमला ताङा जेपालाक धेनी होदेगी “आब्बा, याप” ॱनेरी भो़लालाक। 7 होझ्येरी खेक्या धा ढेन्योक मेन्दा, को़न्क्षोकगी से धाङ सेमो लाक धेनी से धाङ सेमो झ्येरी, खेक्या को़न्क्षोकगी थोक्ने ग्युज्यीन झ्युङालाक। गालातीयापाक्याला पाउलुगी दुङा 8 एम्मा खेक्या को़न्क्षोकला ङो ॱमेस्येली घाङला, को़न्क्षोक मेगीन ल्हाक्याला ॱयोक्पो ग्युक्वालाक। 9 हीना धान्दा खेक्याई को़न्क्षोकला ङोस्ये धेनी को़न्क्षोक राङगी खेक्याला ङो खेन्दीयाः, खेक्या घाङगी झ्येरी जाम्बुलीङगी नी़थु मेगीन धाङ फेन ॱमेथोक्कीन ल्हाक्या स्योकला लोक्ती, धाब्ले देक्याई ढेन्योक झ्यीये दो़पा झ्यीदाले? 10 खेक्या ङीमा धाङ दावा धाङ धी़शाङ धाङ लोक्या चीलालाक। 11 ङी खेक्याई क्षीला काल्ले झ्यीगीनगो, दो़न मेगीन झ्युवा हीन्ढु ॱनेरी ङाला दुङा हुङी। 12 पी़नक्याओ, ङा खेक्या च्योक्रे दे घीरीने थारकीन च्योक्रे, खेक्याः ङा च्योक्रे झ्युङरो झ्यी ॱनेरी, ङा खेक्याला श्योवा पुलाहीन। खेक्यागी ङाला आ घीयाः माझ्येजुङ। 13 ङी एन्ला खीकीचारु ताम्शाङ स्येगीनगी दो़न्दाकगो, ङी शु ॱमेथाङा झ्येरी लाक ॱनेरी खेक्याला स्येये हो़तालाक। 14 धेनी ङा थाङा मेगीनगो खीकी क्षीला छो़ता झ्युरीयाः, खीकी ङाला ॱनाम्दोक याङना थोङच्युङ माझ्येजुङ हीना को़न्क्षोकगी भाङछेन धाङ येशु मास्यीका हीन्गीन च्योक्रे, ङालाः खेलेन झ्येजुङ। 15 धा होदे घाङला खीकी छोरकीन घाटोगो घारु लाजो? खेक्याई झ्यी थुक्ये हो़ना, ङी क्षीला खेरी ॱमीक तो़न्दीया, ङाला तेरये हो़क ॱनेरी, ङा पाङपो तेर थुक्येहो़क। 16 ङी खेक्याला धेन्पा स्येदी, धा धान्दा ङा खीकी डाला ग्युरजे? 17 शोक्पो ॱलापच्या ॱलाप्कीनक्याई, खेक्याला खोरी स्योकला ॱयो़ये ॱमीच्यीकी थापस्यी तो़न्दी, हीना खुङक्याई ॱमीक्यु घा मीदुक। धेनी खीकी खुङक्याला ॱमीच्यीकी चीलास्योक ॱनेरी, खुङक्याई खेक्याला हेक्याने खा टाये झ्यीदालाक। 18 दो़न शाङपो क्षीला दो़पा क्षे झ्यीना घा लाक हीना ङा खीकीमुला हो़ती घाङला च्यीगा मालाक। 19 ङी चेवे टुवाक्याओ, खेक्या मास्यीकागी स्यीका च्योक्रे माझ्युङगीन थुक्पे, ङा खीकी क्षीला याङदा केशुकला हो़गीन च्योक्रे दुक। 20 धान्दा ङा खीकीमुला हो़ना, ङी केकगी दाङ ग्युरये रेवा हो़क घीझ्येरी ॱनाना ङा खीकी क्षीला गो थोम्दी धेहो़क। हागार धाङ सारा 21 खे क्षो़ठीमगी वाङगी होकला धेङी दो़गीनक्या, ङाला ॱनो़दाङ, क्षो़ठीमगी ॱनागीनगो खेक्या ॱहामेघोराई? 22 सुङरापला ढीक हो़तालाक, आब्राहामला भीजा ॱङी हो़तालाक। ढेन्योक्मा स्योकने च्यीक धाङ राङवाङ हो़गीन केमीने च्यीक। 23 हीना ढेन्योक्मा स्योकने, झ्युजा भीजागो जीक्तेनगी लुक्सो़ने केवालाक धेनी राङवाङ हो़गीन, केमीने केक्यागो को़न्क्षोकगी धाम्चा डुप्येला लाक। 24 दे नी पे च्यीक श्याक्ना, केमी दे ॱङीउ धाम्चा ॱङी लाक। सीना रीने झ्युजा धाम्चा च्यीकगो ढेन्योकगी क्षीला, टुवा केगीन हागार लाक। 25 हागारगी आराब युगी सीना रीला तो़न्दालाक धेनी धान्दागी येरुसालेमला क्षा श्याक्ना ढीक्कीलाक घीझ्येरी ॱनाना मो मोरी टुवाक्यामुला क्षो़ठीमगी ढेन्योकला दुक। 26 हीना नाम्खे येरुसालेमगोला राङवाङ हो़तालाक धेनी मो होरी आमा लाक। 27 घीझ्येरी ॱनाना सुङरापला ढीक हो़तालाक, “टु के ॱमीथुप्कीन राप्चे, घाटो झ्यी, केशुक माङ्योङगीनक्या ओ, ङ्यामो घेरी केक क्षे ग्योप, घीझ्येरी ॱनाना ख्योवा हो़गीन केमीने ॱयुक्ती श्याक्सा, केमीला टुवा माङा दुक।” 28 धा पी़नक्याओ, खेक्या को़न्क्षोकगी धाम्चागी गोने केक्या, ईसाक च्योक्रे टुवा लाक। 29 हीना होदे घाङला जीक्तेनगी लुक्सो़ने केक्यागी़, धाम्पे थुक्ङी गोने केक्यागोला ॱनो़ क्यागीन च्योक्रे धान्दा देरेराङ दुक। 30 हीना सुङरापगी घी सुङी? “ढेन्योक्मा धाङ मी़ भीजाला तो़न्दी जोङ घीझ्येरी ॱनाना ढेन्योक्मा टुवाला राङवाङ हो़गीन भीजीमुला, को़न्क्षोकगी धाम्चागी थोप्ताङ थोप्कीमालाक।” 31 होझ्येरी पी़नक्याओ, होराङ ढेन्योक्मागी टुवा मेन्दा राङवाङ हो़गीन केमीगी टुवा लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.