गालातीयापा 3 - ॱलोवाधेपा धाङ क्षो़ठीम 1 गालातीयापा ॱलेन्पाक्याओ, खेक्याला सी़ थी़ ग्याप्जो? येशु मास्यीका ग्याङस्यीङ खाला ढोङगीनगो, खीकी ॱमीकगी दोङदु ङी सावो तो़न्गीनगो ढेन्बा मीदुई? 2 ङा खेक्याला लाब दे च्यीगा ढीलाहीन, खेक्याला क्षो़ठीमगी लेगाने धाम्पे थुक्ङी थोप्जो याङमेना ताम्शाङ घोरती धेपा झ्येरी थोप्जो? 3 खेक्या धाम्पे थुक्ङीने गो चुक्ती, धा धान्दा खेरी स्युकगी थाक्चेये झ्यीदी, खेक्या हुरे ॱलेन्दा ले? 4 खेक्याई देरे दुक्पु माङा दो़न मेताला ङ्यावा ले? ॱङोन्ने होदे दो़न मेगीन माझ्युङ हो़टु। 5 खेक्याला धाम्पे थुक्ङी ॱनारी, खेक्या खोक्दु ॱहाङसागीन लेगाक्या जेगीन को़न्क्षोकगी, दे लेगा घीरी खीकी क्षो़ठीमगी लेगा गोने ले याङमेना ताम्शाङ ङेन्दी, धेपा झ्येरी ले? 6 धा आब्राहामला क्षा श्याक्ना, “खी़ को़न्क्षोकला धेपा झ्येवालाक धेनी को़न्क्षोकगी खो मी ढाङपो च्यीक ची ॱनावालाक।” 7 होझ्येरी धेपा झ्यीगीनक्या नी, आब्राहामगी टुवा लाक ॱनेरी खेक्या स्येलाझ्यी। 8 को़न्क्षोकगी धेपागी थोक्ने, याहुदापा मेन्गीन मीरीकक्याला दाक्तु जेये हीन्गीनगो, सुङरापगी एन्लाराङ शीक्ती आब्राहामला, “ख्यी़ थोक्ने मीरीक घीरीला झ्यीलाप थोप्कीलाक।” ॱनेरी एम्मानेराङ ताम्शाङ दे सुङा जेपालाक। 9 होझ्येरी धेपा झ्यीगीन मीक्या घीरीला, धेपागी मी आब्राहाममुला राङ झ्यीलाप थोप्पालाक। 10 क्षो़ठीमगी लेगाक्याला तेन्गीनक्या छेपागी होकला धेतालाक घीझ्येरी ॱनाना सुङरापला देरे ढीक हो़तालाक, “क्षो़ठीमगी धेपला ढीक्टा घीरी चीरी ॱमेनेगीनक्याला छेपा फोवालाक।” 11 को़न्क्षोकगी डुङदु क्षो़ठीमगी थोक्ने, सुवा दाक्कीमालाक ॱनेरी सावो हो़तालाक घीझ्येरी ॱनाना, “ढाङतेन्पा नी धेपागी थोक्नेराङ सो़न्पो ॱनेगीलाक।” 12 हीना क्षो़ठीम दे धेपाला ॱमेतेन्दालाक। घीहीन्ना “होदे चीगीनक्या क्षो़ठीमगी थोक्नेराङ छोवा क्यागीलाक।” 13 मास्यीकागी होरी छापला छेपा झ्युरी, होराङला क्षो़ठीमगी छेपाने ॱली़वालाक, घीझ्येरी ॱनाना “स्यीङ खाला क्याङगीन घीरी छेपा फोक्पालाक।” ॱनेरी ढीक हो़तालाक। 14 आब्राहामला ॱनाङना झ्यीलापगो मास्यीकागी थोक्ने, याहुदापा मेन्गीन मीरीकक्याला थोबास्योक धेनी धेपागी थोक्ने होराङला धाम्चा जेजा धाम्पे थुक्ङीगो थोबास्योक ॱनेरी, मास्यीका येशुगी होराङला ॱली़री थारपा जेपालाक। क्षो़ठीम धाङ धाम्चा 15 पी़नक्याओ, श्याक्मो डाङी मीछेला तेरी पे च्यीक क्षा श्याक्ना, मीगी थेचे ग्याप्सागीन खाछेमला सी़या सुप ॱमीथुक्कीलाक धेनी होदेला ॱनो़न्गा ग्याप ॱमीथुक्कीलाक। 16 धाम्चाक्या आब्राहाम धाङ खी़ भुग्युला ॱनावालाक। सुङराप नाङदु “भुग्युक्याला” ॱनेरी, से माङागी कोरला ॱमेनालाक हीना “ख्यी़ भु” ॱनेरी, से च्यीकगी कोरला ॱनालाक धेनी से दे मास्यीका लाक। 17 ङी ॱनागीन लाबगी दो़न्दाकगो दे लाक, लो श्यीपग्या सुमच्यु स्याम्ला होवा क्षो़ठीम दी, को़न्क्षोकगी थाक चेगीन धाम्चा देला मेताला डोगीन झ्येरी स्यीक ॱमीथुक्कीलाक। 18 घीझ्येरी ॱनाना ग्युज्यीन दे, क्षो़ठीमने थोप्ये हीन्ना धाम्चाने थोप्येगी लाबराङ मेयोङगीलाक हीना को़न्क्षोकगी आब्राहामला दे धाम्चाने राङ थुक्जे जेपालाक। 19 धा हाना क्षो़ठीम ॱनाङगीनगी दो़नगो घी ले? धाम्चा ॱनाङना से दे ॱमाफेप्कीन थुक्पे, ङेक्यो़नक्या तो़न्ये क्षीला को़न्क्षोकगी भाङछेनक्यागी बारमी च्यीकगी थोक्ने, क्षो़ठीम ॱनाङा जेपालाक। 20 छोक च्यीक च्यीगा हो़ना बारमी मेघोलालाक धेनी को़न्क्षोक च्यीकराङ हीन। 21 धा हाना, को़न्क्षोकगी धाम्चाक्याला क्षो़ठीमगी ग्याप्केल झ्यीदाले? देरे फुक्की मालाक। छे ॱनाङ थुप्कीन क्षो़ठीम तेर हो़ना, क्षो़ठीमने राङ ढाङतेनला ग्युरये हो़क। 22 हीना मी घीरी धीक्पागी होकला ॱनेम हो़तालाक, ॱनेरी सुङरापगी ॱनालाक होझ्येरी को़न्क्षोकगी धाम्चा दे, येशु मास्यीकाला धेपा झ्यीगीनक्याला थोप्कीलाक। 23 हीना धेपा माडुप्कीन एन्ला, होराङ क्षो़ठीमगी होकला छी़ हो़तालाक धेनी धेपा ॱङो़न्सुमदु माग्युरकीन थुक्पे, होराङ ॱनेम्दी धे हो़तालाक। 24 होराङ धेपागोने को़न्क्षोक डुङदु याङदाक्पा ग्युरयेला, मास्यीका ॱमाफेप्कीन थुक्पे क्षो़ठीम होरी तादोक झ्यीगीन झ्युवालाक। 25 हीना धान्दा धेपा ॱङो़न्सुमदु ग्युरती, धा होराङ तादोक झ्यीगीन क्षो़ठीमगी होकदु मेतालाक। को़न्क्षोकगी से धाङ सेमो 26 घीझ्येरी ॱनाना मास्यीका येशुला धेपा झ्येरी, खेक्या घीरी को़न्क्षोकगी से धाङ सेमो लाक। 27 मास्यीकागी थोक्ने ठी़सो़ लेन्गीन घीरीगी, मास्यीकागी स्यीकाला खेलेन्बालाक। 28 धा देने ॱहाला खेक्या याहुदापा धाङ गीरीक, ढेन्योक धाङ राङवाङ हो़गीन धेनी फो धाङ मो ॱनेरी ॱयेवा मेन्दा, मास्यीका येशुगी थोक्ने घीरी च्यीक्पा लाक। 29 धा खेक्या मास्यीकागी हीन्ना, खेक्या आब्राहामगी भुग्यु लाक धेनी को़न्क्षोकगी धाम्चाला थी़न्गीन ग्युज्यीनक्या लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.