गालातीयापा 2 - ॱलोवाकुछापक्याई पाउलुला खेलेन झ्येपा 1 लो च्युपश्यी स्याम्ने, तीतोसला ठीक्ती ङा याङ बारनाबामुला येरुसालेमदु सोवी। 2 को़न्क्षोकगी ङाला तो़न्दा जेदी, ङा होदुरु सोवी। धेनी ङी झ्येजा धाङ झ्यीगीन लेगाक्या दो़न मेगीन माझ्युङास्योक ॱनेरी, ङा होदुरु हो़ती घाङला, ङी याहुदापा मेन्गीन मीरीकक्यामुला स्येगीन ताम्शाङगी़ कोरला, क्षो़छोकगी गोठीक्याला शुरला थुक्ती स्येवी। 3 धा ङीमुला हो़गीन तीतोस गीरीक मी हीन्ना, खोला सी़या पाउ चेगीन ॱरो ॱरुङ ॱनेरी उजुक माझ्येजुङ। 4 घीझ्येरी ॱनाना हेक्याई खोकला मास्यीकावा शोक्पो रीङगा सारी जुरी, मास्यीकाने होराङला हो़गीन राङवाङगोला सोवा ग्याप्तु होरी, होराङला क्षो़ठीमगी वाङला स्योरतु च्युक्ये थापस्यी झ्यीदीक। 5 हीना ताम्शाङगी धेन्पा दे, खीकी क्षीला क्योप्येला हीकी खुङक्याई होकला तीते च्यीया माघुर। 6 धेनी पो़न्पोक्या घाजो़ ओजोखा हो़ना, ङाला घीया झ्यी़दोक माझ्युजुङ घीझ्येरी ॱनाना को़न्क्षोकगी मीला ॱयेवा टाला मेजेदालाक। होदे पो़न्पोक्याई ङी स्येगीन लाबक्या खाला घीया ॱनो़न्गा ग्याप्की मीदुक। 7 धा पेटोला याहुदापाक्याला ताम्शाङ स्येये गेन ॱनाङगीन च्योक्रे, ङालाः याहुदापा मेन्गीन मीरीकक्याला ताम्शाङ स्येये गेन ॱनाङनागो खुङक्याई थोजुङ। 8 घीझ्येरी ॱनाना याहुदापाक्याई खोक्दु कुछापगी क्षाक्ले पेटोने जेगीन को़न्क्षोकगीराङ, ङाने याहुदापा मेन्गीन मीरीकक्याई खोक्दु कुछापगी क्षाक्ले जे ॱनाङसोङ। 9 धेनी क्षो़छोकगी कावा चीगीन, याकोब धाङ पेटो धाङ योहान्नागी को़न्क्षोकगी ङाला ॱनाङगीन क्षाक्लेगो ॱहाघोरती, ङा धाङ बारनाबाला खुङक्याई लेरोक झ्यीयेला खेलेन्जुङ। धेनी हेक्या याहुदापा मेन्गीन मीरीकक्या चारु धाङ खुङक्या याहुदापाक्या खोक्दु डोये थाक चो़पालाक। 10 मी उटेक्याला ढेन्सो़ झ्यी ॱनेरी च्यीगा, खुङक्याई हेला कुजुङ धेनी देरे झ्यीयेला एम्माने ङाला ॱमीच्यीकी दो़पा हो़क। पाउलुगी पेटोला खाते झ्येपा 11 हीना पेटो (केफास) आन्तीयोक ग्याजारु होरी, ङी खोला दोङदुराङ खाते झ्येवी घीझ्येरी ॱनाना खी़ मेढाङा झ्येवालाक। 12 याकोबगी झाजा मीक्या ॱमालेप्कीन एन्ला, पेटो धेपा झ्यीगीन याहुदापा मेन्गीन मीरीकक्यामुला धेती शालाक हीना होदे मीक्या ॱलेप्ती, खो पाउ चेगीन ॱरो चीगीनक्यामुला जीक्ती, खो याहुदापा मेन्गीन मीरीकक्याने बेरी राजा धेपालाक। 13 धेनी खी़मुला श्येम्मा याहुदापाक्यागीया देरे शोक झ्येवालाक। धेनी खुङक्याई शोकगी, बारनाबाला ॱली़री ठीक्पालाक। 14 धेनी खुङक्याई लेगा दे, ताम्शाङगी धेन्पाला ॱमीथी़न्गीनगो थोरी, ङी घीरीगी दोङदु पेटोला ॱनेवी, “ख्यो़ याहुदापा झ्येरीया याहुदापा च्योक्रे मेन्दा, याहुदापा मेन्गीन मीरीक च्योक्रे मीछे पी़ना, याहुदापा मेन्गीन मीरीकक्याला याहुदापा च्योक्रे मीछे पी़ ॱनेरी, ख्यो़ घाङ झ्येरी उजुक ग्याप थुक्वाले?” 15 होराङ केने ॱहालाराङ याहुदापा झ्येरी “याहुदापा मेन्गीन मीरीक धीक्चेनक्या” ॱनागीन च्योक्रे मालाक। 16 हीना क्षो़ठीमगी लेक्याने ढाङपो मीग्युरा, येशु मास्यीकाला धेपा झ्यीना ढाङपो ग्युरालाक ॱनेरी, होराङक्या स्येलालाक। होझ्येरी क्षो़ठीमगी लेने सुवा ढाङपो मीग्युरकीन झ्येरी, लेगाने मेन्दा मास्यीकाला धेपा झ्येरी ढाङपो ग्युरयेगी क्षीला, होराङक्यागीया येशु मास्यीकाला धेपा झ्येवालाक। 17 हीना होराङ मास्यीकागी गोने ढाङपो झ्युङयेगी थापस्यी चाली घाङला, होराङक्याराङ क्षो़ठीमगो पारी धीक्पा झ्यीगीन थुक्ना, मास्यीकागी धीक्पा झ्यीरु च्युक्पाले? दे फुक्की मालाक। 18 घीझ्येरी ॱनाना ङी ठीम तोतागो, ङी याङ शोना, ङाराङ ठीम तोगीन लाक ॱनेरी खुङ क्यागीलाक। 19 धेनी को़न्क्षोकगी क्षीला ङा सो़न्पो ॱनेयेला, ङा क्षो़ठीमगी थोक्ने स्यीसागीन झ्येरी, क्षो़ठीमगी गेन घीया खुर मेघोगीलाक। 20 ङा मास्यीकामुला ग्याङस्यीङला स्यीवी। धा देने ॱहाला ङाराङ छोवा क्याला मेन्दा, मास्यीका ङी नाङदु छोवा क्यालालाक। धा धान्दा ङा ली़ला छोवा क्यागीन मीछे दे, ङाला झाम्पा झ्यीगीन धाङ ङी क्षीला राङगी कुसोक ॱलो़ ताङगीन को़न्क्षोकगी सेला धेपा झ्येरी क्यालाहीन। 21 को़न्क्षोकगी थुक्जेला, ङा ङोग्येल मीझ्यी घीझ्येरी ॱनाना क्षो़ठीमगी थोक्ने ढाङपो ग्युरये हीन्ना, मास्यीका दो़न मेताला ढोवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.