कोलोसेपा 4 - ॱलोवा1 खे दाक्पोक्याओ, नाम्खे श्यीङखामदु खेक्यालाः दाक्पो हो़तालाक ॱनेरी स्येरी, राङगी ढेन्योकला ढाङपो धाङ ॱयेवा मेगीन चो़पा झ्यी। ॱमो़लाम श्युघोयेगी कोरला 2 काटीन्क्षे श्युरी धेनी च्याङजे झ्युरी, ॱमो़लाम ॱमेक्षेदा ग्योप। 3 मास्यीकागी साङवागो स्येयेला, को़न्क्षोकगी हेक्याला कागी क्षीदु घो पेवास्योक ॱनेरी, हीकी क्षीलाः ॱमो़लाम ग्योप। दो़न दी क्षीदु ङा चो़न्खाङदु हो़क। 4 ङी स्येघोगीन साङवागो सावो झ्येरी, सेटाक झ्यी थुप्येला ॱमो़लाम ग्योप। 5 घुकाप घी थोप्ना भेचो़ शाङपो झ्येरी, मास्यीकावा मेन्गीनक्यामुला च्याङजे झ्येरी च्यो़पा झ्यी। 6 मी घीरीमुला लेन घारे तेरघोयेगो, खीकी स्येयेगी क्षीदु, खीकी ताम नी छागी डोवा तेरकीन च्योक्रे झ्यीलाप क्षे झ्युङघो़। थामे छाम्डी 7 ङी ॱनेछु घीरी, खेक्याला तुखीकोसगी स्येगीलाक। खो नी, चेवे पी़न धाङ ॱलो का थुप्कीन श्याप्तोक्पा धाङ चोवोगी नाङ लेरोक च्यीक्पा लाक। 8 हीकी ॱनेछु खीकी ॱहाघोरये धाङ खी़ खेक्याला सेमस्युक पारास्योक ॱनेरी, ङा खोला खीकीचारु दो़न दी क्षीदु ताङाहीन। 9 धेनी खेक्याने च्यीक हीन्गीन, होरी ॱलो का थुप्कीन धाङ चेवे पी़न ओनीसीमु खी़मुला हुङगीलाक। खुङ ॱङीउगी दुरु झ्युङगीन ॱनेछु घीरी, खेक्याला स्येगीलाक। 10 चो़न्खाङ नाङदु ङी रोवा आरीस्तारकु धाङ बारनाबागी छाउ मारकुगीयाः, खेक्याला छाम्डी श्यी़क। (मारकुगी कोरला ङी खेक्याला एन्दुरु स्येसाहो़क। धेनी खो खीकीचारु हुङना खोला नाङला सी़।) 11 युसीतो ॱनागीन येशुगीया, खेक्याला छाम्डी श्यी़क। को़न्क्षोकगी ग्यासी क्षीदु, ङी लेरोकक्याने खुङक्या च्यीगा याहुदापा लाक। धेनी खुङक्याने ङाला सेम्सो थोबी। 12 खेक्याने च्यीक हीन्गीन धेनी मास्यीका येशुगी श्याप्ची एपाब्रागी, खेक्याला छाम्डी श्यी़क। धेनी खेक्या को़न्क्षोकगी थुकोङ घीरीला, ॱनाटो ॱङ्येङ्या धाङ छाङवा झ्युङवास्योक ॱनेरी, खो खीकी क्षीला च्योई ची़न्डी़ झ्येरी ॱमो़लाम ग्यावी। 13 खेक्या धेनी लाउदीकेया धाङ हीरापोली ढोङखेरगी मीक्याई दो़नला, खी़ काल्ले ग्याप्कीनगी पाङपोगो ङा हीन। 14 चेवे आम्ची लुका धाङ देमागी खेक्याला छाम्डी श्यी़क। 15 लाउदीकेयारु हो़गीन पी़नक्या धाङ नीम्फा धाङ मी़ नाङदु छोक्कीन, क्षो़छोकला ङी छाम्डी श्यी़। 16 दे यीक दे, खेक्याई ॱलोक छारती लाउदीकेपाक्याई क्षो़छोकला ॱलोक्तु च्युक धेनी लाउदीकेयाने कुका यीक गोवा खेक्या ॱलोक। 17 धेनी आरकीप्पोला, “चोवोगी गोने ख्यो़ला थोप्था लेगेनगो, ख्यी़ घाङगी झ्येरी हीन्ना डुप्पा झ्यी।” ॱनेरी ॱनो़। 18 ङा पाउलु, ङाराङगी लाक्पाने, दे छाम्डी दे ढीयाहीन। ङा चो़न्पा च्यीक हीन्गीनला, खीकी ढेन्सो़ झ्यी। खेक्याला थुक्जे थोप्पास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.