कोलोसेपा 3 - ॱलोवाछे ॱङीङबा धाङ साबा 1 धा खेक्या मास्यीकामुला ॱलार सो़न्पो ॱलाङला हीन्ना, को़न्क्षोकगी क्षाक ॱयेरु मास्यीका श्युक्सा, नाम्खे श्यीङखामगी दो़नक्या चो। 2 साश्यीदु हो़गीन दो़नक्याला मेन्दा, नाम्खे श्यीङखामदु हो़गीन दो़नक्याला साम्लो तोङ। 3 घीझ्येरी ॱनाना खेक्या स्यीवालाक धेनी खीकी छे नी, मास्यीकामुला को़न्क्षोकगी नाङ बे हो़तालाक। 4 धेनी खेक्याई छेसोक हीन्गीन मास्यीका ॱङो़न्दी घाङला, खेक्याः खोङबामुला शीजे नाङदु ॱङो़न्गीलाक। 5 होझ्येरी खीकी नाङला हो़गीन लोक्येम धाङ ॱमेचाङा धाङ दो़क्षाक धाङ दो़ङेन धाङ कुन्डाला क्षो़ये हीन्गीन, दो़ङाम च्योक्रे जीक्तेनगी स्यीकाक्या सो़। 6 दो़न देक्याई झ्येरी, को़न्क्षोकगी थुक्ठो़ भाप्कीलाक। 7 खेक्या दो़न देक्याला मीछे क्याली घाङला, एम्मा देरेक्याराङ झ्यीदालाक। 8 हीना धान्दा खेक्याई खोङडो धाङ स्येताङ धेनी ङेन्सेम धाङ ॱमेबेप धाङ खेरी खाने थो़न्गीन, छीक झ्योरा घीरी पोङ। 9 धेनी च्यीकगी च्यीकला शोक ॱमास्ये घीझ्येरी ॱनाना खीकी स्यीका ॱङीङबाक्या, होदेगी लाक्लेन मुलाराङ खीकी पाङ सावालाक। 10 धेनी स्यीका साबा दे खेलेन हो़तालाक। धेनी दे नी, खेक्याई को़पापोगी कोरला स्येराप छाङघोगो थोप्येगी क्षीदु, खेक्याला खोङबाराङगी स्यीकाला साबा जेदी हो़तालाक। 11 दुरु गीरीक धाङ याहुदापा धेनी पाउ चेचा धाङ ॱमाचेचा धेनी क्षीग्या धाङ यारके मेगीन धेनी ढेन्योक धाङ राङवाङगी मी ॱनेरी, ॱयेवा मेतालाक हीना मास्यीका नी, घीरी लाक धेनी घीरीगी नाङ श्युक हो़तालाक। 12 होझ्येरी खेक्या को़न्क्षोकगी दाम्दा, धाम्पा धाङ चेवे मीक्या हीन्गीन झ्येरी, राङला ॱङीङजे धाङ काटीन धाङ ॱङ्यामच्युङ धाङ श्यीवा धाङ शो़पागी घो़ को़न। 13 धेनी च्यीकगी च्यीकला शो़पा घोम्दी, च्यीकगी श्येम्माला क्यो़न चुक हो़ना, च्यीकगी च्यीकला घोयाङ तेरती, चोवोगी खीकी धीक्पा सेल्गीन च्योक्रे, खेक्यागीयाः घोयाङ तेरघो़। 14 धेनी दे घीरीगी थोकला झाम्पागो घो़नघो़। झाम्पा दी, घीरीला याङदाक्पे थी़न्डीकला धाम्गीलाक। 15 मास्यीकागी श्यीदेगी, खेरी सेमला वाङग्युर झ्यीदु च्युक। घीझ्येरी ॱनाना खेक्या श्यीदे नाङदु ली़ च्यीकगी येन्लाक च्योक्रे, ॱनेयेला भो़पाहीन। धेनी को़न्क्षोकला काटीन्क्षे श्यी़। 16 मास्यीकागी का खेक्या नाङ मेछो़ली ॱनेघो़। धेनी स्येराप घीरीने च्यीकगी च्यीकला ॱलोप धेनी ॱलापच्या ग्योप। धेनी को़न्क्षोकला राङगी ॱङीङ थाक्पाने, काटीन्क्षे श्यी़री सुङगुर धाङ तो़याङ धाङ घुरलुक्या लेन। 17 धेनी छीक धाङ लेगी थोक्ने खेक्याई घी झ्यीना, घीरी चोवो येशुगी छेनने याप को़न्क्षोकला, खोङगी थोक्ने काटीन्क्षे श्यी़री झ्यी। मास्यीकावे नाङमीला ॱलापच्या 18 खे केमीक्याओ, राङगी ख्योवाक्याई होकदु धो़क। दे नी, चोवोगी डुङदु ढाङा दुक। 19 धेनी खे ख्योवाक्याओ, राङगी केमीक्याला चेवा झ्यी धेनी खुङक्याला चुवा माझ्यी। 20 धेनी खे टुवाक्याओ, घीरीगी थोक्ने राङगी फामाक्याई खाला ङेन। घीझ्येरी ॱनाना देरे झ्यीना चोवोला थुक्ङेउ झ्युङालाक। 21 खे आकेक्याओ, राङगी टुवाक्याला खोङडो ॱमालाङ। ॱलाङना खुङक्याई सेमस्युक क्षाक्कीलाक। 22 खे ढेन्योकक्याओ, दे जीक्तेनदु राङगी दाक्पोगी ॱमीकगी दोङदु च्यीगा घारु च्युक्ये मेन्दा, हीना ॱङोन्ने डाङने सेम्ङीने चोवोला चीकुर झ्येरी, घीरीगी थोक्ने राङगी दाक्पोगी खाला ङेन। 23 खेक्याई घी झ्यीना, मीगी क्षीदु मेन्दा चोवोगी क्षीदु श्याप्ची श्यी़गीन च्योक्रे, खेरी सेम तीङने झ्यी। 24 घीझ्येरी ॱनाना चोवोने खेक्याला ग्युज्यीन झ्युङयेगो ज्यागाला थोप्कीलाक ॱनेरी, खेक्या स्येलालाक। धेनी खेक्याई चोवो मास्यीकाला श्याप्ची श्युलालाक। 25 हीना ङेन्पा झ्यीगीनला ङेन्पे ढेबु थोप्कीलाक। को़न्क्षोकगी क्षोक्री मेजेदालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.