कोलोसेपा 2 - ॱलोवा1 खेक्या धाङ लाउदीकेयागी मीक्या धाङ ङी ङोरोङ थोङ माङ्युङगीन श्येम्मा मी घीरीगी क्षीदु, ङी ग्यापक्या काल्ले क्षेगो खेक्याई स्येलाझ्यी ॱनेरी, ङा दो़दीहो़क। 2 ङी देरे झ्यीगीनगी दो़न नी, खेक्याला सेमस्युक थोप्ती झाम्पागी गोने, खेक्या नाङ थी़न्डी हुङयेगी क्षीदु लाक। धेनी खेक्याला स्येयो़न छाङगोगी तेर घीरी थोबास्योक धेनी को़न्क्षोकगी साङवा नी, मास्यीका हीन्गीनगो स्येलास्योक ॱनेरी लाक। 3 मास्यीकागी नाङ, स्येराप धाङ रीक्पागी तेर घीरी बे हो़तालाक। 4 मी सी़या खेक्याला ॱली़गीन ताम ॱङेन्बोगी गोकोर ॱमाताङास्योक ॱनेरी, ङा देरे ॱनाहीन। 5 घीझ्येरी ॱनाना ङा ली़गी थोक्ने खीकी घुङदु मेनाः, सेम्ङीगी थोक्ने खीकीमुला हो़क। धेनी खेक्याई थी़न्डील धाङ मास्यीकागी खाला खीकी धेपा तेन्पो हो़गीनगो ॱहाघोरती, ङा ङ्यामो घी हो़क। मास्यीकागी नाङ छे साबा 6 होझ्येरी खीकी मास्यीका येशुला चोवो ॱनेरी, खेलेन झ्येजा च्योक्रे, धा मास्यीकागी नाङ मीछे पी़। 7 धेनी खोङगी नाङ चावा तीङ रीङबो चुक धेनी खोङगी खाला, खेरी मीछेगी ॱमाङस्यी चीक धेनी खेक्याला ॱलाप्ला च्योक्रे, खेरी धेपा स्युक्क्षेरु तोङ। धेनी काटीन्क्षे श्यी़येला माङदु तोङ। 8 मी सु च्यीकगीया खेक्याला खुङ मेगीन धाङ ॱली़गीन ॱलापच्याक्याई थोक्ने, वाङदु धी़रु ॱमाच्युक। देक्या नी, मास्यीकागी थोक्ने मेन्दा, मीगी लुक्सो़ धाङ जीक्तेनगी तावाक्याला तेन्दालाक। 9 घीझ्येरी ॱनाना को़न्क्षोकगी फी़न्सुम छोक्पा घीरी, ली़ला मास्यीकागी नाङ ॱनेलालाक। 10 धेनी मास्यीकागी नाङ खेक्या फी़न्सुम छोक्पा जे हो़तालाक। खोङ नी, पो़न्पो घीरी धाङ वाङग्युर झ्यीगीन घीरीगी उ लाक। 11 मास्यीकागी नाङ खेक्यागीयाः पाउ चेबालाक। दे नी, मी लाक्पी झ्येजा पाउ चेगीन ॱरो मालाक हीना खेरी स्यारी़गी दो़क्षाकक्या मास्यीकागी सेदी, खेक्याई पाउ चेबालाक। 12 धेनी ठी़सो़ श्यी़ घाङला, खेक्या खोङबामुला धी़ठोदु बेवालाक धेनी खोङबाला छीवाने ॱलार सो़न्पो जेगीन को़न्क्षोकगी नी़थुला, खेक्याई धेपा झ्येरी खेक्यालाः खोङमुला सो़न्पो जेपालाक। 13 खेक्या खेरी धीक्पाक्याई झ्येरी स्यीस्या च्योक्रे, धेनी ली़ला पाउ ॱमाचेचा हो़ताराङ, को़न्क्षोकगी खेक्याला मास्यीकामुला सो़न्पो जेपालाक। धेनी खोङबागी होरी धीक्पा घीरी सेल जेदी, 14 होरी ग्याप्केलला ढीक्ती श्याकश्या होरी, धीक्पाक्याई क्यो़न्जुकक्या सुप जेपालाक धेनी होदेला ग्याङस्यीङ खाला शेर ग्याप्ती, खोङबागी मेताला जेपालाक। 15 धेनी को़न्क्षोकगी पो़न्पोक्या धाङ वाङग्युर झ्यीगीनक्याई लाक्चाक्या ठोक्वा जेदी, खुङक्याला मीमाङगी खोकला ॱङो़न्दी ङोछारु च्युक्पालाक। धेनी ग्याङस्यीङगी थोक्ने, खुङक्या घीरी खाला खोङबागी ग्याखा थोप जेपालाक। 16 होझ्येरी शाये-थुङये याङना धी़छेन याङना ॱनाम्गाङ याङना ङासुगीन ङीमाक्या ॱरुङयेगी कोरला, मी सी़या खेक्याला क्यो़न चुक्तु ॱमाच्युक। 17 देक्या नी हुङये हीन्गीन ॱनेछुगी ढीम्जाक च्यीका लाक हीना ङोतोकगो मास्यीका लाक। 18 धेनी मी सी़या खेक्याला ॱङ्यामच्युङ झ्युङये धाङ नाम्खे भाङछेनला क्षाक्क्षो़पा पुयेला उजुक ग्याप्ती, खीकी ज्यागा ठोक्तु ॱमाच्युक। देरे मीक्या राङगी थोङनाङगी कोरला, लाब ॱना माङा ताङालाक धेनी राङगी जीक्तेनगी साम्लो ताङदाङला, खुङक्या दो़न्मेदु ङागेलगी खाङालाक। 19 देरेक्या नी, कुली़गी उ हीन्गीन मास्यीकाने, खा डा हो़तालाक। दे उ नेराङ शु घीरीला री़छीक धाङ ग्युपागी थोक्ने, च्यी़ जोरती मुला ढीक्ती, को़न्क्षोकने झ्युङगीन छारलुङला केरी डोवालाक। मास्यीकागी थोक्ने छे साबा 20 खेक्या जीक्तेनगी तावाक्याने मास्यीकामुला स्यीवा हीन्ना, खेक्या धोराङा दे, जीक्तेनगी हीन्गीन च्योक्रे मीछे घीझ्येरी पी़दा ले? ठीमक्याई होकला घीझ्येरी घुरा ले? 21 “माशीम, ढोवा मालेन धेनी माज्यु” 22 (दे घीरी मीगी लाक्लेन तारी जोक्ती डोवालाक)। देक्या नी मीगी ठीम धाङ ॱलापच्याक्याला तेन्दालाक। 23 देरे ठीमक्याई राङगी शो़सा क्षो़क्या धाङ ॱङ्यामच्युङ शोक्पो तो़न्ये धाङ ली़ला क्यो़न ताङयेला स्येराप तो़न्गीन च्योक्रे झ्यीदालाक हीना देरेक्याई स्यारी़गी दो़क्षाकक्या, वाङदु धी़येला फेन ॱमेथोक्वालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.