जेपा 7 - ॱलोवासेतेफेनगी कालोप 1 धेनी चो क्षो़पो़नगी सेतेफेनला ढीवालाक, “खुङक्याई ख्यी़ कोरला ॱनागीन लाब घीरी धेन्पा ले?” 2 सेतेफेनगी लेन ग्याप्पालाक, “पी़नक्याओ, ङाला ङेन्रोनाङ। शीजेगी को़न्क्षोकगी होरी, मेमे आब्राहामला हारानदु धेगीन एन्लाराङ, मेसोपोटामीया ॱनागीन लुङबादु थोङनाङ ॱनावालाक। 3 खोला को़न्क्षोकगी दे सुवालाक, ‘राङगी यु धाङ पी़न्दाक्या भोरती, ङी ख्यो़ला तो़न्गीन युगोरु सोङ।’ 4 होझ्येरी आब्राहाम काल्दापाक्याई यु भोरती, हारानदु धेदु सोवालाक। धेनी आब्राहामगी आकीगो ढोरी, को़न्क्षोकगी खोङला धान्दा खेराङक्या धेदा युदुरु खेरती होवालाक। 5 हीना को़न्क्षोकगी आब्राहामला दे युदुरु, काङबा घाङ स्योङजा सा च्यीया ॱमानावालाक। होदे धी़ला खोला टु च्यीया मेतालाः को़न्क्षोकगी दे यु दे, खो धाङ खी़ ग्युपाला ॱनाउ सुरी धाम्चा जेपालाक। 6 को़न्क्षोकगी आब्राहामला देरे सुवालाक, ‘ख्यी़ ग्युपाक्या यु ङो ॱमेस्येगीन च्यीकदु धे घोगीलाक। धेनी होदे युगी मीक्याई, खुङक्याला ढेन्योक शोगीलाक धेनी लो श्यीपग्या थुक्पे, ॱमीच्यीकी दुक्पु तेरकीलाक। 7 हीना खुङक्याला ढेन्योक शोगीन मीक्याला, ङा ङेपा ताङयेहीन। धेनी ख्यी़ ग्युपाक्या होदे यु भोरती युदुरु, ङाला क्षाक्क्षो़पा पुगीलाक।’ 8 “धेनी को़न्क्षोकगी आब्राहाममुला धाम्चा च्यीक श्याक जेपालाक। होदेगी ताकगो पाउ चेगीन लाक। धेनी आब्राहामगी भीजा ईसाक केगीनगी ङीमा ग्येगोला, खी़ पाउ चेदी ताक ग्याप्पालाक। ईसाकगी खोरी भीजा याकोब धाङ याकोबगी खोरी भीजा च्युङङीक्याला, होदे च्योक्रे झ्येवालाक। धा, देक्याराङ होरी मीरीक च्युङङीगी मे-मेक्या लाक। 9 “याकोबगी भीजाक्याई खोरी नो योसेफला ठादोक झ्येरी, ढेन्योक झ्यीयेला एजेप युगी मीला चोवालाक। हीना को़न्क्षोक खी़मुला हो़तालाक। 10 धेनी को़न्क्षोकगी खी़ दुक्पु घीरीने थारपा ॱनारी, एजेप ग्याखापगी ग्यावु फारोगी दोङदु थुक्जे ॱनारी, खोला एजेप ग्याखाप धाङ खी़ ग्याखाङगी मी घीरीगी खाला आङजा ॱनावालाक। 11 “होदे स्याम्ने एजेप ग्याखाप धाङ कानान ग्याखाप घीरीदु मुगे स्योरती, ॱमीच्यीकी दुक्पु होवालाक। धेनी होरी धाङबी फामाक्याला शाये घीन्दा माराक्पालाक। 12 हीना याकोबगी एजेप ग्याखापदु लोदोक दुक ॱनेरी ॱहाघोरती, खोरी भीजाक्याला होदुरु थेङ गोमा झावालाक। 13 धेनी खुङक्या डुगीन थेङ ॱङीवागोला, योसेफगी खोराङ सु हीन्गीनगो खोरी आज्योक्याला स्येबालाक। धेनी ग्यावुगी योसेफगी नाङमी कोरला ॱहाघोरपालाक। 14 योसेफगी खोरी आकी याकोब धाङ मीक्जाङ घीरी दोम्दी, मी धी़न्चु धो़ङा ठीक्ती एजेपदु हुङरोझ्यी ॱनेरी लो़न कुरपालाक। 15 धेनी याकोब एजेपदु सोवालाक। होदुरुराङ खो धाङ होरी धाङबी फामाक्या ढोवालाक। 16 होदे स्याम्ने, खुङक्याई फुङबुगो स्येकेम ॱनागीन साजारु खेरती, होरी मेमे आब्राहामगी होदुरु हेमोरगी भीजाक्याने रीङ तेरती ङ्यो़ङ्या धी़ठोदु कुङबालाक। 17 “धेनी को़न्क्षोकगी आब्राहाममुला श्याकश्या धाम्चागो डुप्कीन धी़चो़गो हुङये झ्यीदी घाङला, एजेपदु ईस्राएल्पा मीक्या माङदु सोरी ॱमीच्यीकी फेवालाक। 18 धेनी एजेपदु योसेफगी कोरला, घीन्दा ॱमेस्येगीन ग्यावु श्येम्मा च्यीक झ्युवालाक। 19 खी़ होरी धाङबी फामाक्याला खोक्पा झ्येरी ॱमीच्यीकी दुक्पु तेरपालाक। धेनी ईस्राएल्पाक्याई टु ॱमाङ्याकक्या स्यीरु च्युक्येला, केलुङ मेताला हीन्जीमीन्जी खाङबाने फीला तो़न्दु च्युक्पालाक। 20 “होदे धी़चो़लाराङ मोशे केवालाक। खो ॱमीच्यीकी टु जेवा हो़तालाक। खी़ आकी आमागी खोला दावा सुम थुक्पे, नाङदुराङ हीप्ती सो़वालाक। 21 हीना स्याम्ला हीप्ती श्याक ॱमाथुक्पा नाङने फीला तो़न्बालाक। धेनी ग्यावुगी भोमोगी खोला खेरती सोरी, मोरी भीजा च्योक्रे झ्येरी सो़वालाक। 22 मोशेला एजेप्पाक्याई ॱलोप्चुङ घायोकक्या घीरी राक्पालाक। खो लाब ताङये धाङ लेगा घीरीला ॱमीच्यी वाङक्षे झ्युवालाक। 23 “धेनी मोशे लो श्यीपच्यु ॱलेप्ती, खी़ सेमला खोरी ईस्राएल्पा पी़न्दाक्या थुक्तु डोयेगी दो़पा केवालाक। 24 श्याक्मो च्यीक खोरी पी़न्दाक्याने च्यीकला एजेप्पा च्यीकगी दुङगीनगो थोरी, होदेला क्योप्येला खी़ होदे एजेप्पा गोला सेपालाक। 25 को़न्क्षोकगी मोशेला राङ मीक्याला राङवाङ तेरयेला, भो़चे झ्यीगीनगोराङ मीक्याई ॱहाघोरास्योक ॱनेरी मोशेगी साम्बालाक हीना खुङक्याई ॱहामाघोरपालाक। 26 “ङीमा स्याम्मागो मोशेगी ईस्राएल्पा पी़न ॱङी टाप्यी धेगीनगो थोरी, खुङ ङीउला छाम्दु च्युक्येला हो ॱनेवालाक, ‘खेक्या पी़न्दा झ्येरीया घीझ्येरी राङ नाङदु टाबा ले?’ 27 हीना मी आङक्षेगी़ मोशेला ॱहाला पुरी ॱनेवालाक, ‘ख्यो़ला हीकी खाला वाङ धाङ ठीम झ्यीयेला सी़ को़जो? 28 ख्यी़ दाङ होदे एजेप्पाला सेगीन च्योक्रे ङालाः सेये झ्यीदाले?’ 29 होदे मीगी होरे लाब ताङगीन घोरती मोशे एजेपने डो़री, खोला सी़या ङो ॱमेस्येगीन मीदीयान ॱनागीन ग्याखापदु धेदु सोवालाक। होदुरु धेदी घाङला खोला भीजा ॱङी झ्युवालाक। 30 “लो श्यीपच्यु स्याम्ने सीना ॱनागीन रीगी बोलोक्तु हो़गीन, रीतोङदु मे भारती धेगीन छेम्मा च्यीकगी खोकला, नाम्खे भाङछेन च्यीक खी़चारु थोवालाक। 31 मोशेगी होदे थोरी ॱमीच्यी ॱहाङसारी, धोराङा घामोमा तायेला भोलोक्तु सोवालाक। धेनी चोवोगी सुङकेक दे ॱहाघोरपालाक, 32 ‘ङा ख्यी़ धाङबी फामा आब्राहाम धाङ ईसाक धाङ याकोबगी को़न्क्षोक हीन।’ होदे घोरती मोशे जीक्ती दारपालाक धेनी होदे स्योकला ताः ॱमाथुक्पालाक। 33 धेनी चोवोगी खोला सुवालाक, ‘ख्यी़ पोल्ले पी़ घीझ्येरी ॱनाना ख्यो़ लारी धेता, सा दे नी धाम्पे सा लाक। 34 एजेपदु ङी मीक्याई दुक्पु ङ्याङगीनगो ङी थोजुङ। धेनी खुङक्याई ङुकेकगो ङी ॱहाघोरजुङ। धा खुङक्याला क्योप्येला ङा माला होवाहीन। धा ङा धाब्ले ख्यो़ला एजेपदु झाङाहीन।’ 35 “खुङक्याई ‘ख्यो़ला हीकी खाला आङजा धाङ ठीम चेयेला सी़ को़जो?’ ॱनेरी ॱनागीन मोशेगो देराङ लाक। मे भारती धेता छेम्मा खोक्दु मोशेगी थोथा नाम्खे भाङछेनने, को़न्क्षोकगी खोला खुङक्याई गोठी झ्यीये धाङ क्योप्येगी क्षीला झावालाक। 36 धेनी मोशेगी ईस्राएल्पा मीक्याला एजेपने ठीक्ती, ग्याछो माउ धाङ रीतोङने झ्युरी लो श्यीपच्यु थुक्पे ॱहाङसागीन लेगा धाङ ताकक्या तो़न्दी होवालाक। 37 ‘को़न्क्षोकगी खेक्याई क्षीला, खेक्या नाङने ङा च्योक्रे ॱङो़नस्येखेन च्यीक दाम्गीलाक।’ ॱनेरी ईस्राएल्पा मीक्याला ॱनागीन मीगो मोशेराङ लाक। 38 दे होदे मोशेराङ लाक। ईस्राएल्पाक्या रीतोङदु धेदी घाङला, सीना रीरु नाम्खे भाङछेनगी मोशे धाङ होरी धाङबी फामाक्यामुला कामो़न सुवालाक। धेनी को़न्क्षोकगी खोला होरी क्षीला, छे ॱनाङगीन का ॱनाङवालाक। 39 “हीना होरी धाङबी फामाक्याई मोशेगी खाला माङेन्बालाक। धेनी खुङक्या खोला ङो ॱलोक्ती, एजेपदुराङ लोक्ङी दो़पालाक। 40 धेनी खुङक्याई आरोनला ॱनेवालाक, ‘होराङला लाम ठीक्कीन ल्हाक्या शोरोनाङ घीझ्येरी ॱनाना मोशेगी होराङला एजेपने ठीक्ती होवालाक हीना धान्दा खोला घी झ्युवाले ॱनेरी, होराङ सुला क्षा मीदुक।’ 41 धेनी खुङक्याई भीगी कु च्यीक शो़री, धेनी क्षो़पा पुरी खोराङक्याई लाक्पागी शो़सा लेगागोला ङ्यामो घेबालाक। 42 हीना को़न्क्षोकगी खुङक्याला ङोलोक जेपालाक धेनी ङीमा धाङ दावा धाङ कारमाक्याला क्षाक्क्षो़पा पुयेला भोर श्याक्पालाक। ॱङो़नस्येखेनक्याई धेपला, दी कोरला देरे ढीक हो़तालाक, ‘ईस्राएल्पा मीक्याओ, खेक्या लो श्यीपच्यु थुक्पे रीतोङदु हो़ती घाङला, खेक्याई ङाला ॱमारछो़ धाङ क्षो़पाक्या पुवे? 43 खेक्याई ल्हा मोलोखगी घुर धाङ, ल्हा रेफानगी कारमा गोवा खेरती सोवालाक। खेक्याई होदे कुक्या शो़री होदेक्याला क्षो़पा पुवालाक। होझ्येरी ङा खेक्याला बाबीलोनने ॱहाला पी़येहीन।’ 44 “होरी धाङबी फामाक्याई, को़न्क्षोकला क्षो़पा पुगीन घुरखाङगो खुङक्याईमुला रीतोङदु हो़तालाक। को़न्क्षोकगी मोशेला घुर दे शोयेला ॱलोप्तो़न ॱनावालाक धेनी को़न्क्षोकगी खोला तो़न्दा पे च्योक्रे होदे शो़वालाक। 45 होरी धाङबी फामाक्याई धी़चो़ला, को़न्क्षोकगी याहुदापा मेन्गीन मीरीकगी मीक्याला तो़न्दा जेदी, होदे ग्याखापक्या योस्युआगी आङजाला लेन्दी घाङला, खी़मुला होदे घुरगो खुरती होवालाक। धेनी होदे घुरगो ग्यावु दावीदगी धी़चो़ थुक्पे, खुङक्यामुला राङ झ्युवालाक। 46 दावीदला को़न्क्षोकगी ॱङीङजे थोप्पालाक धेनी खी़ याकोबगी को़न्क्षोकला ‘खोङबागी श्युक्जा शोरु च्युक्रोनाङ’ ॱनेरी श्युवा पुवालाक। 47 हीना को़न्क्षोकगी क्षो़खाङगो, खी़ भीजा सोलोमोनगी शो़वालाक। 48 “हीना मीगी शो़सा क्षो़खाङदु ॱलानामेपे को़न्क्षोक श्युक्कीमालाक। ॱङो़नस्येखेनक्याई देरे सुङ हो़तालाक, 49 को़न्क्षोकगी सुङालाक, ‘नाम्खे श्यीङखाम ङी श्युक्ठी हीन, धेनी जाम्बुलीङ ङी काङतेक हीन। धा खेक्या ङाला खाङबा घारे च्यीक शोये हीनो? ङा ङासुजागो घाना? 50 दे घीरी ङी लाक्पागी शो़वा माले?’ 51 “खेक्याई सेम पाउ ॱमाचेचाक्याई, सेम च्योक्रे ॱरा दुक। धेनी खेक्या को़न्क्षोकगी का ङेन्ङी मेदो़दालाक। खेक्याई धाङबी फामाक्या च्योक्रे, धाम्पे थुक्ङीगी तो़न्दा लाबक्याला खेलेन मीझ्यीदालाक। 52 खेराङक्याई धाङबी फामाक्याई दुक्पु ॱमाताङगीन, ॱङो़नस्येखेन च्यीया हो़ताले? को़न्क्षोकगी मी ढाङपोगो फेप्यी हो़तालाक ॱनेरी, लो़न तेरकीन ॱङो़नस्येखेनक्याला खुङक्याई सेजुङ। धेनी खेराङक्याई खोङला गो कोरती सेजुङ। 53 नाम्खे भाङछेनक्याई थोक्ने, खेराङक्याला को़न्क्षोकगी क्षो़ठीमगो राक्पालाक हीना खेक्याई होदेला ॱमारुङवालाक।” सेतेफेन सेपा 54 सेतेफेनगी होदे लाबगो घोरती, छोक्पा क्षेरु हो़गीन गोठीक्या ॱमीच्यीकी खोङडो लावालाक धेनी खुङक्या खोङडो लारी खोला सो ढीक्पालाक। 55 हीना खो धाम्पे थुक्ङीगी खारी, नाम्खे श्यीङखाम स्योकला तेरी धेपालाक। खी़ को़न्क्षोकगी शीजे धाङ चोवो येशुला, को़न्क्षोकगी ॱये स्योकला श्यारी श्युक्कीन थोवालाक। 56 खी़ ॱनेवालाक, “तो़दाङ, ङी नाम्खे श्यीङखाम भेगीन धाङ को़न्क्षोकगी ॱये स्योकला, मी-भु श्याङदी श्युक्कीनगो थोङी।” 57 धेनी खुङ घीरी ॱमीच्यीकी फेरा ग्याप्ती लावालाक धेनी मीरी-मीरी आमच्योक काक्पालाक। धेनी लाम्साङ खुङ घीरीमुला रुप्ती, खो स्योकला भाङ तारी होवालाक। 58 धेनी खुङक्याई खोला ढी़दी ग्याजा फीला तो़न्दी धोगोङ श्युरपालाक। धेनी पाङपोक्याई खोरी घोलाकक्या साउल ॱनागीन, ख्योक्तोङ च्यीकगी काङबारु श्याक्पालाक। 59 खुङक्याई सेतेफेनला धोगोङ श्युरी घाङला, खी़ ॱमो़लाम ग्याप्पालाक, “चोवो येशु, ङी सेम्ङी ॱनुमा जेक।” 60 खी़ पीमु चुक्ती केक ग्याप्ती ॱनेवालाक, “चोवो, दे धीक्पागी छेपागो खुङक्याला ॱमाफोक्वास्योक।” हो़जो़ ॱनेरी खी़ उप छेपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.