जेपा 25 - ॱलोवापाउलुगी रोमापा ग्यावुला श्योवा पुवा 1 ङीमा सुम स्याम्ने, फेस्तु केसारयागी लुङबादु ॱलेप्ती होदेने येरुसालेमला सोवालाक। 2 होदुरु हो़ती घाङला क्षो़पो़न क्षेक्या धाङ याहुदापा गोठीक्याई, खोला पाउलुगी कोरला क्यो़न चुक्पालाक 3 धेनी पाउलुला लाम्गाला राङ सेये साम्दी, पाउलुला येरुसालेमदु झाङरोनाङ ॱनेरी श्योवा पुवालाक। 4 हीना फेस्तुगी खुङक्याला देरे लेन तेरपालाक, “पाउलुला केसारयारुराङ धाक्ती श्याक हो़तालाक धेनी ङाः ग्योक्जे होदुरु डोयेहीन। 5 खेक्याने पो़न्पो रीङगा ङामुला डोङी दो़ना डो। धेनी पाउलुगी लेगा नोन्डु झ्येहो़ना, होदेगी होदुरुराङ क्यो़न चुक थुक्कीलाक।” 6 फेस्तु येरुसालेमदु ङीमा ग्याच्यु चो़ धेदी, केसारयाला लोक्पालाक। धेनी ॱङेटोराङ खी़ ठीम्चो़गी ठीला धेदी, पाउलुला खेरती हुङये का ॱनावालाक। 7 पाउलु ॱलेप्ती येरुसालेमने होवा याहुदापाक्या खी़ ॱये-ॱयो़नला लारी, खी़ कोरला ढामेढा क्यो़न छाप्क्षेक्या कावालाक। हीना होदेक्याई पाङपोगो तेर ॱमाथुक्पालाक। 8 धेनी पाउलुगी खोरी छोकला देरे लेन तेरपालाक, “ङी याहुदापागी क्षो़ठीम धाङ क्षो़खाङ याङमेना रोमापा ग्यावुगी ग्यापला, लेगा ङेन्पा घीन्दा माझ्येहो़क।” 9 हीना याहुदापाक्याला ङ्यामो घारु च्युक्येला फेस्तुगी पाउलुला ॱनेवालाक, “ख्यो़ येरुसालेमदु सोरी दे लाबगी कोरला ठीम होदुरुराङ, ङी दोङला चेयेला दो़दी हो़ते?” 10 हीना पाउलुगी ॱनेवालाक, “ङा रोमापा ग्यावुगी ठीम्खाङगी दोङदु लारी धेहो़क। दुरुराङ ङी ठीमगो चे घोगीलाक। धेनी ङी याहुदापाक्याई ग्यापला लेगा आ घीन्दा माझ्ये हो़तालाक ॱनेरी, खोङबाराङलाः क्षा हो़तालाक। 11 ङी लेगा ङेन्पा झ्येहो़ना धेनी से घोगीन छेपा फोक्कीन लेगा झ्येहो़ना, ङा स्यीयेला डाढीक हो़क। हीना याहुदापाक्याई ङी खाला चुक्कीन क्यो़नगो धेन्पा मेना, ङाला खुङक्याई लागाला सी़याः ची ग्याप्ये मेतालाक। ङा दे लाब दे रोमापा ग्यावुगी डुङदु श्योवा पुयेहीन।” 12 धेनी फेस्तुगी खोरी ढो़पो़नक्यामुला ढो़ झ्येरी पाउलुला ॱनेवालाक, “ख्यी़ रोमापा ग्यावुगी डुङदु राङ श्योवा पुरी, ख्यो़ रोमापा ग्यावु चारुराङ डोगीलाक।” फेस्तुगी ग्यावु आगारीपाने ढो़ लेन्बा 13 श्याक्मो घाजो़ स्याम्ने, ग्यावु आगारीपा खोरी नुमु बेरनीकेमुला, केसारयारु फेस्तुला फेप्सु श्युयेला होवालाक। 14 खुङक्या केसारयारु ङीमा माङा धेदी घाङला, फेस्तुगी ग्यावुमुला पाउलुगी कोरला दे लाब स्येपालाक, “फेलीकगी भोरती श्याकश्या चो़न्पा मी च्यीक दुरु दुक। 15 ङा येरुसालेमला हो़ती घाङला क्षो़पो़न क्षे धाङ याहुदापाक्याई गोठीक्याई, खी़ कोरला ठीम श्युरी खोला छेपा को ॱनेरी श्युजुङ। 16 ‘क्यो़न फोक्पा मीगो क्यो़न चुक्कीनक्याई दोङदु मालाङ थुक्पे धेनी खोरी क्यो़नक्याई क्षीदु ॱरुङक्योप झ्यीयेगी घुकाप माजोर थुक्पे, रोमापा ठीमला होदे मीगोला ठीम्चो़गी क्षीदु ची ग्याप्ये मेरालाक’ ॱनेरी ङी खुङक्याला ॱनेवी। 17 धेनी खुङक्या दुरु ॱलेप्ती, ङी धाला माझ्येवा ॱङेटोगो राङ, पाउलुला ठीम चेजारु ठीक्ती हुङये का तेरपी। 18 धेनी खोला ठीम कागीनक्याई लाब ताङयेला लारी, खी़ लेगा ङेन्पा झ्येजुङ ॱनेरी क्यो़न तो़न्दी हेटु ॱनेरी, ङी साम्बी हीना खुङक्याई ङी साम्गीन च्योक्रे क्यो़न्जुक ॱमाकाजुङ। 19 हीना खुङक्याई क्षो़ धाङ ढोसागीन येशु ॱनागीन मी च्यीकगी कोरला च्यीगा, खुङक्याई पाउलुमुला ठुक स्योरदुक। पाउलुगो ढोढा येशु सो़न्पो दुक ॱनेरी था पी़दी धेदुक। 20 दे लाबगी कोरला चाजो़ घी झ्यीये ॱनेरी, ङी ॱमास्येजुङ। होझ्येरी ङी खोला येरुसालेमदुराङ सोरी, खोरी ठीम होदुरुराङ चेना ढीक्कुले ॱनेरी खोला ढीवी। 21 हीना खी़ रोमापा ग्यावुने खोला ठीम रास्योक ॱनेरी, श्योवा पुजुङ धेनी ङी खोला ग्यावुचारु माझाङगीन थुक्पे, खोला घामोमा ॱरुङगीन श्याक्ती दुरुराङ श्याक्ये का तेरहो़क।” 22 दे लाब ॱहाघोरती आगारीपागी फेस्तुला ॱनेवालाक, “ङा ङाराङ होदे मीगी लाब ङेन्ङी दो़दीक।” फेस्तुगी ॱनेवालाक, “ॱङेटो खोङबाराङगी ङेन्ये राक्कीलाक।” पाउलु ग्यावु आगारीपागी दोङदु 23 ॱङेटोगो आगारीपा धाङ बेरनीके ॱमीच्यीकी तेमो क्षे झ्येरी, ॱमाक्पो़नक्या धाङ ग्याजागी मी खाक्क्षेक्यामुला जोम्खाङ नाङदु होवालाक। धेनी फेस्तुगी पाउलुला होदुरु ठीक्ती स्योक ॱनेरी का ॱनावालाक। 24 धेनी फेस्तुगी ॱनेवालाक, “ग्यावु आगारीपा धाङ दुरु छोक्दी़दु हो़गीनक्याओ, याहुदापा घीरीगी ङाचारु ठीम श्युगीन मीगो देराङ लाक। दे मीला से घोगीलाक ॱनेरी, याहुदापा घीरीगी येरुसालेम धाङ दुरु केसारयारुवाः ॱनी। 25 हीना दे मीला सेयेगी छेपा राक्कीन लेगा ङेन्पा झ्येजा, ङी घीन्दा ॱमाथोजुङ। धेनी खो खोराङगी रोमापा ग्यावुचारु ठीम श्युये ॱनेरी, ङाला श्योवा पुरी, ङी खोला रोमदु झाङये ढो़ झ्येवी। 26 हीना खी़ कोरला ढीक्ती ग्यावुला कुरये, ङाला घीया मेक। होझ्येरी ङी खोला खेराङक्या दोङदु धाङ ॱङोन्ने झ्यीना ग्यावु आगारीपा खेराङगी दोङदु ठीक्ती हुङये थेवी। धेनी खेराङगी खोला ढीवा कु झ्यीना, ङाला ढीक्येगी छीक रे राई हेटु ॱनेरी ङाला रेवा हो़क। 27 घीझ्येरी ॱनाना चो़न्पागी क्यो़न्जुक ॱङोन्नेगो ॱमातो़न्दा, रोमापा ग्यावुचारु झाङयेगी लेगा दे ङाला घा ॱमास्येजुङ।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.