जेपा 24 - ॱलोवापो़न्पो फेलीकगी दोङदु पाउलु 1 ङीमा ॱङा स्याम्ने, चो क्षो़पो़न आनानीया धाङ याहुदापा गोठी रीङगागी, तेरतुलु ॱनागीन ठीम्पो़न च्यीक ठीक्ती केसारयारु होवालाक। खुङक्या घीरीगी पो़न्पोगी दोङदु पाउलुगी कोरला ठीम पुवालाक। 2 धेनी पाउलु पो़न्पोगी दोङदु ठीक्ती, तेरतुलुगी खी़ कोरला देरे लाब श्याक्ती ॱनेवालाक, “फेलीक ला, खेराङगी हे याहुदापाक्याला धी़चो़ रीङा थुक्पे श्यीदे ॱनाङजुङ। धेनी खेराङगी आङजा होकला धेदी, हीकी लुङबा दे ॱमीच्यीकी घारु सोजुङ। 3 खेराङगी जेजा क्षाक्लेक्याला, हेक्या घीरी ॱमीच्यीकी ङ्यामो घा हो़क। 4 हीना ङा खेराङगी धी़चो़ माङा मेलेन्दा, हीकी लाब ङेन्येला श्युवा पुलाहीन। 5 मी दे ॱमीच्यीकी ॱङ्योक्टा ॱलाङगीन धाङ जाम्बुलीङ घीरीदु हो़गीन, याहुदापाक्याई खोक्दु टुक्कीन लेगा झ्येरी, ग्युक्कीन हीकी ॱङेजुङ। धेनी खो नाजारी ॱनागीन क्षो़लुकगी गोठीगोवा दुक। 6 दे मीगी क्षो़खाङगोवा ॱमेचाङा शोये झ्येजुङ हीना खोला हीकी शीम्बी। [हेक्याई हेरी क्षो़ठीमगी थोक्ने, खोला ठीम चेये झ्येवी। 7 हीना ॱमाक्पो़न लुसीया होरी, खोला हेक्याने ठोक्ती लाजुङ। 8 धेनी खोला क्यो़न चुक्कीनक्याला खेराङचारु सोङ ॱनेरी का ॱनाङजुङ।] खेराङगी खोला ढीनाः हेक्याई खाम्जु ग्याप्कीन लाब दे खोनेराङ ॱहाघोरकीलाक।” 9 श्येम्मा याहुदापाक्यागीयाः तेरतुलुगी लाब दे धेन्पा लाक ॱनेरी पाङपो तेरपालाक। पाउलुगी खोरी लाब पो़न्पो फेलीकला स्येपा 10 धेनी पो़न्पो फेलीकगी पाउलुला लाब ताङयेला लाक्ता झ्येवालाक धेनी पाउलुगी देरे ॱनेवालाक, “लो माङाने, खेराङ दे ग्याखापगी ठीम्पो़न झ्युङगीनगो ङाला क्षाहो़क। होझ्येरी खेराङगी दोङदु ङा ङारी स्योकगी लाब श्याक्येला, ॱमीच्यीकी ङ्यामो घा हो़क। 11 ङा येरुसालेमदु को़न्क्षोकला क्षाक्क्षो़पा झ्यीरु होरी, ङीमा च्युङङीने माङा माझ्यु हो़तालाक ॱनेरी, खेराङगी लेल्हामोमा ॱहाघोर थुक्कीलाक। 12 याहुदापाक्याने सी़या ङाला नामा क्षो़खाङ नाङदु, मी श्येम्मामुला खाने टाप्ती धेगीन ॱमाथो हो़तालाक। धेनी छोक्खाङक्या याङमेना दे ग्याजागी मीक्याला टुक्कीन, लेगा झ्यीगीनगोवा ॱमाथो हो़तालाक। 13 धेनी धान्दा ङी थोकला क्यो़न चुक्कीनगी पाङपोगोवाः, देक्याई तो़न थुक्कीमालाक। 14 हीना देक्याई क्षो़लुक ॱनेरी ताक्कीन लाम दे, ङी धाङबी फामागी को़न्क्षोकला ङा क्षाक्क्षो़पा पुलाहीन ॱनेरी, ङी खेलेन्दी हो़क। धेनी मोशेगी क्षो़ठीमला ढीक्टा धाङ ॱङो़नस्येखेनक्याई धेपक्याला ढीक्टाक्याला ङा चीलीहो़क। 15 धेनी देक्याई यीच्चे झ्यीगीन च्योक्रे, को़न्क्षोकगी मी शाङपो धाङ मी ङेन्पा घीरीला छीवाने सो़न्पो जेगीलाक ॱनागीन लाब देला, ङाः रेवा झ्यीदाहीन। 16 होझ्येरी ङा को़न्क्षोक धाङ मीक्या दोङदु नोन्डु मीझ्यीदा, सेम शाङपो झ्येरी धेयेगी स्युक झ्यीदीहो़क।” 17 “लो घाजीङगी स्याम्ने, ङा येरुसालेमदु ङारी मीक्याला ज्यीम्बा ताङदु धाङ को़न्क्षोकला क्षो़पा पुयेला होवाहीन। 18 दे लेगा झ्यीदी घाङला, खुङक्याई ङाला क्षो़खाङ नाङदु थुक्जुङ। होदे घाङला ङी चाङमा झ्युङगीन ॱरोगो झ्येसा हो़तालाक। होदुरु मीगी छाङगाक्या, ङी स्याबाला मेतालाक धेनी ठुक घीन्दा ॱमास्योर हो़तालाक। 19 हीना एशीया स्योकने होवा याहुदापा रीङगागी ङाला क्षो़खाङ नाङदु थोवालाक। खुङक्याला ङी कोरला क्यो़न रे ॱनाये हो़ना, खुङक्याराङ खोङबाचारु होरी श्योवा पुघोगुले। 20 याङमेना ङा याहुदापे छोक्दी़गी दोङदु लाङी घाङला, ङी नोन्डु घी थोजुङ होदेगो दे मीक्याला ॱनारु च्युक्रोनाङ। 21 ‘मी स्यीस्या याङ सो़न्पो लाङगीलाक ॱनागीन लाबला, ङी धेपा झ्येरी धीरीङ ङा खेराङक्या दोङदु ठीम पुयेला लाङाहीन।’ दे लाब दे ङी थेङमा च्यीक फेरा ग्याप्ती ॱनेवी। होदेला च्यीगा खुङक्याई ङी नोन्डु तो़न थुक्कीलाक।” 22 फेलीकला चोवोगी लामगी कोरला घामोमा क्षा हो़तालाक। होझ्येरी खी़ ठीमगो थाक चेदी ॱनेवालाक, “ॱमाक्पो़न लुसीया दुरु ॱलेवी घाङला, लाब देला ङा ठीम चेयेहीन।” 23 दे ॱनेसारती फेलीकगी ग्यापो़नला, पाउलुला चो़न्खाङ नाङदु दोक हीना खोला राङवाङ तीते तेर धेनी खी़ रोवाक्याई खोला घो़गीन चालाकक्या खेरती हुङना, खुङक्याला ॱमाकाक ॱनेरी का ॱनावालाक। पाउलु चो़न्खाङदु धाक्पा 24 ङीमा घाजीङ स्याम्ने, फेलीक खोरी याहुदापा केमी दुरुसीलामुला होवालाक। धेनी पाउलुला केक तारी, खी़ येशु मास्यीकाला धेपा झ्यीगीनगी कोरला स्येगीनगो, खुङ ॱङीउगी ङेन्बालाक। 25 हीना पाउलुगी ढाङपो झ्युङये धाङ राङ छो़ शीम्गीन धाङ ठीम चेगीन ङीमागी कोरला स्येली घाङला, फेलीक जीक्पालाक। धेनी खोला ॱनेवालाक, “धीरीङगी क्षीदु ढीक्सुङ धा सोङ धेनी घुकाप राक्ना, ङी ख्यो़ला याङदा केक ताङु।” 26 पाउलुगी आले तेरटु साम्दी, फेलीकगी खोला धी़-धी़ला केक तारी लाब तावालाक। 27 लो ङी छासारती फेलीकगी छापला पोरकीहु फेस्तु होवालाक। धेनी फेलीकगी याहुदापाक्याला ङ्यामो घारु च्युक्येला, पाउलुला चो़न्खाङ नाङदुराङ श्याक्पालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.