जेपा 22 - ॱलोवा1 “पी़नक्या धाङ गेम्पाक्याओ, ङारी स्योकने ङी कोरला ॱनाघोगीन लाब खेराङक्या ङेन्रोनाङ।” 2 पाउलुगी ईब्रीपा केकला लाब ताङगीनगो घोरती, मी घीरी खाबा धेपालाक। धेनी पाउलुगी ॱनेवालाक, 3 “ङा कीलीकीयागी टारसो ग्याजारु केक्या याहुदापा च्यीक हीन, हीना ङा दुरु येरुसालेम ग्याजारु गामालीएलगी ॱलोप्टुक झ्येरी छारपालाक। होरी धाङबी फामाक्याने राङ चीरी होवा क्षो़ठीमगी ॱलापच्याक्या, ङी घामोमा झाङ हो़क। धीरीङ खेराङक्याई को़न्क्षोकला ॱमीच्यीकी चीगीन च्योक्रे, ङीयाः होझ्येरीराङ चीहो़क। 4 चोवोगी लामला डुगीन मीक्याला स्यीये थुक्पे ङी दुक्पु तावी। केवे ख्योवा धाङ केमीक्याला शीम्दी, ङी चो़न्खाङला दाक्तु च्युक्पी। 5 ङी ॱनागीन दे लाबक्या धेन्पा लाक ॱनेरी, चो क्षो़पो़न धाङ छोक्दी़गी गोठीक्याः पाङपो लाक। खोङबाक्याईराङ ङाला दामासेकोरु हो़गीन, याहुदापा पी़नक्याई मीङला यीक कुरपालाक धेनी होदे यीक देला चोवो येशुला धेपा-झ्यीगीनक्याला शीम्येगी आङजा, ङाला ॱनाङ हो़तालाक। होझ्येरी होदेक्याला येरुसालेमदु ठीक्ती क्षेपा कायेला, ङा दामासेकोरु सोवी।” पाउलु ग्युरकीनगी कोरला स्येपा ( जेपा ९:१-१९ ; २६:१२-१८ ) 6 “ङा दामासेकोरु ङीङघुङ ॱलेप्कु झ्यीदी घाङला, ॱहाताक्पाला ॱनामने ॱमीच्यीकी साला हो़क च्यीक, ङी ॱये-ॱयो़नला स्यारजुङ। 7 धेनी ङा साला गेजुङ। धेनी केक देरे च्यीक घोरजुङ, ‘साउल, साउल, ख्यो़ घीझ्येरी ङाला दुक्पु ताङाले?’ 8 धेनी ङी ढीवी, ‘चोवो, खेराङ सु हीनो?’ धेनी खोङबागी ङाला सुजुङ, ‘ख्यी़ दुक्पु ताङगीन नाजारेतगी येशु ङा हीन।’ 9 ङीमुला हो़गीनक्याई हो़क दे थोजुङ, हीना केकगो घोरतीया दो़न्दाकगो ॱहामाघोरजुङ। 10 ङी ॱनेवी, ‘चोवो, धा ङा घी झ्यीये?’ धेनी चोवोगी ङाला सुजुङ, ‘लारी दामासेकोरु सोङ धेनी ख्यी़ घी झ्यीघोगीन लेगाक्याई कोरला, ख्यो़ला होदुरुराङ ॱनागीलाक।’ 11 होदे हो़क ॱमीच्यीकी साला झ्येरी, ङा ॱमीक थोङ ॱमाथुप्कीन झ्युजुङ। होझ्येरी ङी रोवाक्याई ङाला लाक्ते ठीक्ती दामासेकोरु ठीक्पालाक। 12 “धेनी होदे ग्याजारु आनानीया ॱनागीन मी च्यीक धेदालाक। खो क्षो़ठीमला चीगीन मी ढाङपो धाङ होदुरु धेगीन याहुदापाक्या घीरीगी चीगीन मी च्यीक लाक। 13 खो ङाचारु होरी धेनी ङी बोलोक्तु लारी ॱनेवालाक, ‘साउल, ख्यो़ थोङास्योक।’ खी़ देरे ॱनालुङ मेताला, ङा ॱमीक थोङगीन झ्युरी खोला थोजुङ। 14 धेनी खी़ ङाला ॱनेजुङ, ‘होरी धाङबी फामाक्याई चीगीन को़न्क्षोकगी खोङबा राङगी दो़पा, ख्यी़ ॱहाघोरयेला धाङ होदे मी ढाङपोला थोङये धाङ खोङबागी सुङकेक ङेन्येला खेराङला को़ जेपालाक। 15 घीझ्येरी ॱनाना खोङबागी छीला खेराङगी थोङगीन धाङ ङेन्गीनगी पाङपो झ्युरी, मी घीरीला स्येगीन ख्यो़ झ्युङगीलाक। 16 होझ्येरी धा ख्यो़ घीला घुक्ती धेता? लोङ धेनी ठी़सो़ लेन धेनी ख्यो़री धीक्पाक्या चाङमा शोयेला, चोवो येशुगी छेन भो़।’ 17 “होदेने ङा येरुसालेमदु लोक्पी धेनी क्षो़खाङ नाङदु सोवा ग्याई घाङला, ङी थोङनाङ च्यीक थोजुङ। 18 थोङनाङला चोवो येशु ज्याजुङ धेनी ङाला सुजुङ, ‘ग्योक्जे येरुसालेम भोरती सोङ घीझ्येरी ॱनाना ङी कोरला स्येगीन, ख्यी़ पाङपोक्याला दे मीक्याई खेलेन्गीमालाक।’ 19 ङी ॱनेवी, ‘चोवो ला, छोक्खाङ च्यीकने श्येम्माला सोरी, ङी खेराङला धेपा-झ्यीगीनक्याला शीम्दी आटाला धाक्कीन धाङ श्युरकीन लाबक्या दे मीक्या घीरीला क्षा हो़तालाक। 20 धेनी खेराङगी पाङपो तेरकीन सेतेफेनला ठाक ॱमाशीङी सेदी घाङला, ङा होदुरुराङ हो़तालाक। धेनी खोला सेगीनक्यामुला ङा थी़न्दी, खुङक्याई घोलाक ॱरुङदी धेबी।’ 21 हीना चोवोगी ङाला सुजुङ, ‘ख्यो़ सोङ, ङा ख्यो़ला ॱमीच्यीकी थाक्रीङा याहुदापा मेन्गीन मीरीकक्या चारु झाङयेहीन।’” 22 खुङक्याई पाउलुगी लाब देचो़ थुक्पेराङ ङेन्बालाक। धेनी खुङक्याई देरे फेरा ग्याप्पालाक, “देरे मीला से घोगीलाक! धेनी देला सो़न्पो धेदु च्युक्ये मेतालाक!” 23 खुङक्या खोरी शेनक्या ॱयुक्ती धेनी ॱनामला थाला तोरती फेरा ग्याप्पालाक। 24 धेनी घीझ्येरी याहुदापाक्या खी़ डाला फेरा ग्याप्पा ले ॱनेरी, ॱहाघोरयेला रोमापा ॱमाक्पो़नगी खोला नाङदु ठीक्ती ताजाक श्युरये का तेरपालाक। 25 ॱमाक्मीक्याई खोला श्युरयेला धाम्ये झ्यीदी घाङला, पाउलुगी खोरी बोलोक्तु हो़गीन ग्यापो़नला ॱनेवालाक, “रोमापा ठीमला रोमापा च्यीकगी नोन्डु झ्ये-माझ्ये ॱहामाघोराः, खोला ताजाक श्युर छोक्वाले?” 26 धेनी ग्यापो़नगी दे घोरती खो ॱमाक्पो़नचारु सोरी ॱनेवालाक, “खेराङगी घी झ्यीये झ्यीदा? होदे मी नी रोमापा दुक।” 27 दे लाब ॱहाघोरती ॱमाक्पो़नगो नाङदु सोरी पाउलुला ढीवालाक, “ख्यो़ ॱङोन्नेराङ रोमापा ले?” पाउलुगी ॱनेवालाक, “ङा हीन।” 28 धेनी ॱमाक्पो़नगी ॱनेवालाक, “ङा नी ॱमीच्यीकी आले ज्यारी रोमापा झ्युजा हीन।” हीना पाउलुगी ॱनेवालाक, “ङा नी केने ॱहालाराङ रोमापा हीन।” 29 देरे घोरलुङ मेताला खोला ढीवा झ्यीयेला हुङगीन घीरी उक्कुरा ग्याप लोक्पालाक। धेनी पाउलु रोमापा झ्येरीया, होदेरे झ्येरी च्याक्थाकगी धाम्दु च्युक्ती, ॱमाक्पो़नगोवा जीक्पालाक। पाउलु छोक्दी़ क्षेगी दोङदु 30 याहुदापाक्याई पाउलुला घीझ्येरी क्यो़न चुक्पाले ॱनेरी, ॱमाक्पो़नगी घोरङी दो़पालाक। होझ्येरी ॱङेटोगो खी़ क्षो़पो़न क्षेक्या धाङ छोक्दी़ क्षेगी मी घीरीला केक तारी जोम्येला का ॱनावालाक धेनी पाउलुला ठीक्ती, खुङक्या दोङदु ॱलावालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.