जेपा 20 - ॱलोवापाउलु माकेडोनीया धाङ गीरीसरु 1 होदे फेरा घीरी तीङचोई झ्युसारती, पाउलुगी धेपा-झ्यीगीनक्याला मुला रुप्ती, खुङक्याला सेमस्युक पारकीन लाब स्येपालाक। धेनी घोङपा श्यी़री माकेडोनीया स्योकला सोवालाक। 2 होदुरु ॱलेप्ती साजा-साजाला सोरी, धेपा-झ्यीगीनक्याला सेमस्युक पारपालाक। धेनी खो गीरीसला सोवालाक। 3 होदुरु दावा सुम थुक्पे धेपालाक। होदे स्याम्ने पाउलुगी सीरीयाला ग्याछोने डोये साम्लो तावालाक। देरे डोये झ्यीदी घाङला, याहुदापाक्याई खी़ छीला ढो़ ङेन्पा झ्यीगीनगो खी़ ॱहाघोरती, खो धाब्ले माकेडोनीयाने घोबा चुक्ती डोये ढो़ झ्येवालाक। 4 होदे ढु ग्याप्येला खोमुला श्येम्मा मीक्याः हो़तालाक। होदेक्या बेरोया ग्याजागी पुररुसगी भीजा, सोपातेर धाङ थेसलोनीके ग्याजागी आरीस्तारकु धाङ सेकुनदु धाङ धेरबे ग्याजागी गायु धेनी तीमोथेउ धाङ एशीया स्योकने होवा, तुखीकोस धाङ तोरोफीमोस लाक। 5 खुङक्या तोरोआसरु एन्ला सोरी, होदुरु हेक्याला घुक्ती धेपालाक। 6 हेक्यागो क्युरची मेगीन ग्याङगा शागीन धी़छेनगो तारी, फीलीप्पी ग्याजाने ग्याछोगी लाम्गा झ्युरी, ङीमा ॱङा स्याम्ने, खुङक्याला तोरोआसरु थुक्पालाक। होदुरु हेक्या ङीमा धी़न धेपालाक। तोरोआसरु पाउलुगी थुक्ठे थागो 7 धी़न्डागी श्याक्मो धाङपोगी घोमुगो, हेक्या होदुरु हो़गीन धेपा-झ्यीगीनक्यामुला शामा शायेला जोम्बालाक। पाउलुगी खुङक्याला ॱलापच्या तेरती धेपालाक धेनी ॱङेटोगो होदेने लोक्ये झ्येरी, खो छेन फेचाम थुक्पे लाब तारी धेपालाक। 8 हेक्या जोम्जा खीम तो़ देला, ॱमीच्यीकी माङा क्युङ पार हो़तालाक। 9 धेनी पाउलु लाब रीङा तारी धेदी घाङला, ईहुतीकुस ॱनागीन भीजा ख्योक्तोङ च्यीक खुङगी खाला घुङी लोक्ती धे हो़तालाक। धेनी खो ॱङीला स्योरती थोक्चा सुमगी होकला ल्हीम्दी स्यीबालाक। 10 पाउलु होकला सोरी खी़ खाला घुक झ्येरी खोला थाम्दी ॱनेवालाक, “दुङा माझ्यी, खो सो़न्पोराङ दुक।” 11 धेनी खुङक्या घीरी तो़ला सोरी, खोङ घीरीमुला चोवोगी श्युक्टागो शेबालाक। धेनी पाउलु खुङक्यामुला ॱङारोक माझ्युङगीन थुक्पे, लाब तारी धेपालाक धेनी खो होदेने सोवालाक। 12 धेनी होदेगी मीक्याई होदे भीजाला, खोरी नाङदु सो़न्पो ठीक्पालाक धेनी खुङक्या ॱमीच्यीकी ङ्यामो घेबालाक। तोरोआसने मीलेतु थुक्पे 13 तोरोआसने पाउलु माना, हेक्या घीरी डुशीङ श्यो़न्दी आसो ग्याजारु एन्ला सोवी। होदेने हीकी पाउलुला डुशीङ खाला क्यो़न्ये झ्येवालाक घीझ्येरी ॱनाना खो आसो थुक्पे, घोबा चुक्ती डोयेला दो़पा झ्येवालाक। 14 धेनी हेक्या आसोरु ॱलेप्ती, खोवाः हीकीमुला डुशीङला श्यो़न्बालाक धेनी हेक्या घीरीमुला मीतीलेने ग्याजारु सोवालाक। 15 धेनी ङीमा स्याम्मागो हेक्या ग्याछोने झ्युरी, खीहुगी डामगी साजा च्यीकला ॱलेप्पालाक धेनी होदेगी ङीमा स्याम्मागोला सामोसरु ॱलेप्पालाक। धेनी याङ होदे ङीमागी स्याम्मागोला मीलेतुरु ॱलेप्पालाक। 16 ङीमा ॱङापच्युपागी धी़छेनला, येरुसालेमदु ॱलेप्येला छाटा झ्युरी पाउलु एशीयारु मागोरा, एफेसुने झ्युरी डोयेला थाक चेवालाक। एफीसुगी क्षो़छोकगी गोठीक्यामुला घोङपा श्युवा 17 धा मीलेतु ग्याजाने पाउलुगी एफीसु ग्याजागी क्षो़छोकगी गोठीक्याला भो़रु झावालाक। 18 खुङक्या ॱलेप्ती खी़ ॱनेवालाक, “एशीयारु हुङगीन ङीमानेराङ खेराङक्यामुला धेदी घाङला, ङी होदे ङीमाक्या घाङ झ्येरी चेबालाक ॱनेरी, खेराङक्याला क्षा हो़तालाक। 19 याहुदापाक्याई ङाला खोक्पा झ्यीयेला ढो़ ॱना माङा झ्येहो़ना, ङी ॱमीच्यीकी ॱङ्यामच्युङा झ्युरी छीमाक तारी, चोवोगी श्याप्तोक श्युवी। 20 धेनी खेराङक्या खोक्दु धाङ नाङ-नाङला जुरी, ङी ॱलापच्या तेरी घाङला, खेराङक्याला फेन थोक्कीन लाब घीन्दा ङी सेम नाङदु माश्याक्पी। 21 धेनी याहुदापाक्या धाङ गीरीकक्याला को़न्क्षोक स्योकला राङ-राङगी धीक्पा पारी, सेम ग्युरती हुङये धाङ होरी चोवो येशु मास्यीकाला धेपा झ्यी ॱनेरी स्येवी। 22 “धान्दा ङा धाम्पे थुक्ङीगी ठीक्ती, येरुसालेमला डोयेहीन। होदुरु ङाला घी झ्युङगीलाक ॱनेरी ङाला क्षामेक। 23 ङाला चो़न्खाङदु धाक्कीन धाङ दुक्ङेल हो़गीन लाब, धाम्पे थुक्ङीगी ङाला ग्याजा रे-रेला तो़न जेसुङ। 24 हीना को़न्क्षोकगी थुक्जेगी कोरला ताम्शाङगो स्येगीन, चोवो येशुने ङाला थोप्था लेगा दे माडुप्कीन थुक्पे, ङा ङारी मीछे देगी दो़न घीन्दा ॱमीची हो़क। 25 धा ङा साजा-साजाक्याला सोरी, खेराङक्याला को़न्क्षोकगी ग्याखापगी कोरला ताम्शाङ स्येदी सोवी। हीना देने ॱहाला खेराङक्याने सी़या ङाला धाब्ले थोङगीमालाक ॱनेरी ङाला क्षाहो़क। 26 होझ्येरी धीरीङ ङा खेराङक्याला ॱनाहीन, खेराङक्याने मी सुलाः ङेपा फोक्ना होदेगी खे ङाला मेक। 27 घीझ्येरी ॱनाना ङी खेराङक्याला को़न्क्षोकगी थुकोङला हो़गीन, स्येघोगीन लाब घीरी स्येयेला ग्याप ॱमालोक हो़क। 28 धा खेराङक्या राङ-राङ चाङजे झ्येरी धो़क धेनी धाम्पे थुक्ङीगी खेक्याला ची ग्याप्ती, श्याकश्या लुकक्याला घामोमा ॱरुङ। को़न्क्षोकगी क्षो़छोकगी लुक्जी शाङपो च्यीक झ्युरी धो़क घीझ्येरी ॱनाना होदे मीक्या चोवो येशुगी कुठाकगी ॱली़री ङ्यो़ जेपालाक। 29 ङा सोसारती ॱमीच्यीकी जीक्टाक्षे च्याङगु च्योक्रे, मी श्येम्माक्या खेरी घुङदु झुगीलाक धेनी दे लुकक्याला दुक्पु तेरकीलाक ॱनेरी ङाला क्षाहो़क। 30 खेराङक्या खोक्नेराङ क्षो़ शोक्पो तेरकीन मीक्या थो़न्दी, चोवोगी ङेनेक्याला खोराङक्या स्योकला ग्युरतु च्युक्कीलाक। 31 होझ्येरी चाङजे झ्येरी धो़क धेनी ङी लो सुम थुक्पे ङीन-छेन ॱमीक्क्षु तारी, चोवोगी ङेने रे-रेला ॱलाप्ला ॱलापच्याक्या माज्येदा धो़क। 32 “धा ङा खेराङक्याला को़न्क्षोकगी क्षाकला पुयेहीन धेनी खोङबागी थुक्जेगी खाङखा काला भोरयेहीन। होदेगी खेराङक्याला धेपाला स्युक्क्षे शो थुक्कीलाक धेनी को़न्क्षोकगी राङगी मीक्याला ॱनाङना, झ्यीलाप खेराङक्यालाः थोप्कीलाक। 33 ङी मी सी़याः सेर धाङ ॱङु धाङ घोलाकगी दो़पा माझ्ये। 34 ङी ङारी राङगी लाक्पागी काल्ले ग्याप्ती, ङा धाङ ङारी रोवाक्याला घो़गीन घीरी चागीन लाब दे खेराङक्यालाः क्षा हो़तालाक। 35 देरे झ्येरी ‘लेन्गीनक्यानेः तेरकीनक्याला माङा झ्यीलाप हो़तालाक’ ॱनेरी, चोवो येशु खोङबा राङगी सुङसा लाब देला ढेन्सो़ झ्येरी, मी क्योवाक्याला काल्ले झ्येरी रोवा झ्यी थुप्कीनगो झ्यीघोये लाब, दे ङी लेगा घीरीला तो़न्हो़क।” 36 दे ॱनेसारती पाउलु खोङ घीरीमुला पीमु चुक्ती ॱमो़लाम ग्याप्पालाक। 37 खुङक्या घीरी ङी़री पाउलुला थाम्दी, खोला ओ झ्येरी झावालाक। 38 धेनी पाउलुगी खुङक्यामुला याङ नामाः थुक्कु मालाक ॱनागीन लाबला, खुङक्या ॱमीच्यीकी ॱलो फाम्बालाक। होदे स्याम्ने खुङक्याई पाउलुला डुशीङ थुक्पे क्यावालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.