जेपा 17 - ॱलोवाथेसालोनीकेरु पाउलु धाङ सीलवानु 1 पाउलु धाङ सीलवानु आम्फीपोली धाङ आपोल्लोनीया ग्याजाने झ्युरी, थेसालोनीकेरु होवालाक। होदुरु याहुदापा छोक्खाङ च्यीक हो़तालाक। 2 च्योई च्योक्रे पाउलु होदे छोक्खाङदुवा सोवालाक। धेनी धी़न्डा सुमगी ङासुगीन ङीमा सुम्गाराला, खी़ सुङरापला तो़न्दी खुङक्यामुला चो़लीङ झ्येवालाक। 3 मास्यीकाला दुक्पु राक घोगीलाक धेनी छीवाने याङ सो़न्पो झ्युङघोगीलाक ॱनागीन लाब देला, खी़ खुङक्याला ढेस्ये ग्याप धेनी पाङपो तेर झ्येवालाक। धेनी “ङी खेक्याला ॱनागीन येशु खोङबाराङ मास्यीका लाक।” ॱनेरी खी़ ॱनेवालाक। 4 धेनी होदेने याहुदापा मी रीङगा धाङ को़न्क्षोकला जीक्टा झ्यीगीन, गीरीक मी माङक्षे धाङ चो केमी माङक्षेगीयाः पाउलुगी लाबला धेपा झ्येवालाक। धेनी खुङक्या पाउलु धाङ सीलवानुमुला सोवालाक। 5 हीना याहुदापा रीङगा ठादोक लारी ॱराङगाकगी मी ङेन्पाक्या ठीक्ती, ग्याजारु टुक्कीन लेगा झ्येवालाक। धेनी पाउलु धाङ सीलवानुला मीक्या दोङदु ठीक्ती हुङयेला, खुङक्या यासोनगी नाङला रुब्ती चारु सोवालाक। 6 धेनी होदुरु खोङ ॱङीउ ॱमाङेपा खुङक्याई यासोन धाङ श्येम्मा पी़न्दा रीङगाला, ग्याजागी पो़न्पोक्या दोङदु ढी़दी होरी, देरे केक ग्याप्पालाक, “घारु हीन्ना घीरीला टुक्तु च्युक्कीनक्या धा दुरुवा होदुक, 7 धेनी यासोनगी खुङक्याला खोरी नाङदु श्याक्दुक। धेनी देक्या घीरीगी येशु ॱनागीन ग्यावु श्येम्मा च्यीक दुक ॱनेरी, रोमापा ग्यावुगी काठीमला ॱमीचीलालाक।” 8 दे ॱहाघोरती ग्याजागी मीक्या धाङ पो़न्पोक्या ठुक्पालाक। 9 श्युकला होदे पो़न्पोक्याई यासोन धाङ श्येम्माक्याला आले तेरतु च्युक्ती, खुङक्याला डोरु च्युक्पालाक। पाउलु धाङ सीलवानु बेरोया ग्याजारु 10 छेन्मु झ्युङलुङ मेताला धेपा-झ्यीगीन पी़नक्याई, पाउलु धाङ सीलवानुला बेरोया ग्याजारु झावालाक। धेनी खुङक्या होदुरु ॱलेप्ती, याहुदापाक्याई छोक्खाङ नाङदु सोवालाक। 11 होदे ग्याजागी याहुदापाक्या थेसालोनीके याहुदापाक्यानेः ॱनावा याङा हो़तालाक। खुङक्याई पाउलुगी क्षो़ला ॱमीच्यीकी दो़नाङ झ्येरी ङेन्बालाक धेनी खी़ ॱनागीन लाबक्या धेन्पा लाक याङना मालाक ॱनेरी, श्याक्मो-श्याक्मोला सुङराप ढोक्ती तालाक। 12 धेनी ॱमीच्यीकी माङा याहुदापाक्याई चोवो येशुला धेपा झ्येवालाक। होझ्येरीराङ श्येम्मा खाक्क्षे गीरीक केमी धाङ ख्योवाक्यागीयाः धेपा झ्येवालाक। 13 हीना पाउलुगी बेरोयादुवा को़न्क्षोकगी का स्येगीनगो, थेसालोनीके याहुदापाक्याई ॱहाघोरती, खुङक्या होदुरुवा होरी मीक्याला टुक्पालाक। 14 धेनी धेपा-झ्यीगीनक्याई पाउलुला उक्कुरा ग्याछो स्योकला झावालाक। हीना सीलवानु धाङ तीमोथेउगो होदुरुराङ धेपालाक। 15 पाउलुला क्यारु डुगीन धेपा-झ्यीगीनक्याई खोला एथेने ग्याजा थुक्पे क्यावालाक। धेनी खुङक्या बेरोयारु सीलवानु धाङ तीमोथेउला पाउलु चारु ग्योक्जे लोक्ती, हुङयेगी लो़न दे पाउलुने खेरती लोक्पालाक। पाउलु एथेनेरु 16 पाउलु एथेनेरु सीलवानु धाङ तीमोथेउला घुक्ती धेदी घाङला, होदे ग्याजा घीरी कुगी खाङखा थोरी ॱमीच्यीकी सेम धुक्पालाक। 17 होझ्येरी खो याहुदापाक्या धाङ को़न्क्षोकला चीगीन, गीरीक मीक्यामुला छोक्खाङदु सोरी चो़लीङ झ्यीदालाक धेनी ठोमला ग्युक्कीन मीक्यामुलाः च्योई येशुगी कोरला चो़लीङ झ्यीदालाक। 18 ईपीकुर धाङ स्तोयीकोसगी मी खेवाक्याने, रीङगागीयाः पाउलुमुला चो़लीङ झ्येवालाक। होदेक्याने रीङगागी, “दे खा दीक्कीन मी दे घी ॱनाले?” ॱनेरी ॱनेवालाक धेनी रीङगागी, “दे मी धेनी क्षीग्यागी ल्हाक्याई कोरला स्येली।” ॱनेरी ॱनेवालाक घीझ्येरी ॱनाना पाउलुगी येशु धाङ खोङबा छीवाने याङ सो़न्पो झ्युङगीनगी कोरला ताम्शाङ स्येपालाक। 19 होझ्येरी खुङक्याई पाउलुला आरेओपागुगी छोक्दी़ला ठीक्ती ढीवालाक, “खेराङगी सुङगीन दे क्षो़ साबा दे घी ले ॱनेरी हेक्याई स्येये राक्कीले? 20 घीझ्येरी ॱनाना खेराङगी हेक्याला लाब घोडोमो रे ॱनी धेनी देगी दो़न्दाकगो घी ले ॱनेरी हेक्या स्येङी दो़दी।” 21 एथेनेगी मीक्या घीरी धाङ होदुरु धेगीन क्षीग्यागी मीक्या लेगा घीन्दा मीझ्यीदा, लाब साबाक्या ङेन्ये धाङ ताङये च्यीगा झ्यीदालाक। 22 धेनी पाउलु आरेओपागुगी घुङदु लारी ॱनेवालाक, “एथेनेगी मीक्याओ, खेराङक्या क्षो़ला ॱमीच्यीकी थेदा झ्यीगीन ङी थोङी। 23 खीकी ग्याजाने डी़ घाङला ङी खेक्याई क्षो़ झ्यीजा च्यालाकक्याला तेवी। होदुरु ङी क्षो़ठी च्यीकला देरे ढीक्टा च्यीक थोजुङ, ‘ङो ॱमेस्येगीन ल्हागी क्षीला’। धा खेक्याई ङोमेस्येलाला चीगीन ल्हागो सु लाक ॱनेरी, ङी खेक्याला ॱनाउ। 24 जाम्बुलीङ धाङ देला हो़गीन घीरी को़ ॱनाङगीन, को़न्क्षोकराङ नाम्खे श्यीङखाम धाङ जाम्बुलीङगी चोवो लाक। खोङबा मीक्याई शो़सा ल्हाखाङदु मीश्युक्वालाक। 25 धेनी मीगी लागागी पुपा चालाक घीन्दा, खोङबाला मेघोलालाक। हीना खोङबागीराङ मीक्याला घो़गीन मीछे धाङ उप धाङ श्येम्मा घो़गीन घीरी ॱनाङालाक। 26 खोङबागी मी च्यीकने, जाम्बुलीङ नाङगी मीरीक घीरी को़ ॱनाङजुङ। खोङबागीराङ होदे मीक्याई पी़घोगीन मीछेगी धी़चो़ धाङ धेघोगीन साजा एम्मानेराङ को़ जे हो़तालाक। 27 मीक्याई खोङबा ॱङेदी हो़टु ॱनेरी, हाला सुला ॱयाङयेला को़न्क्षोकगी देरे जेपालाक। हीना खोङबा होराङने थाक्रीङा मेतालाक। 28 ‘घीझ्येरी ॱनाना खोङबागी होराङला मीछे पी़ये धाङ ग्युक्ये धाङ होराङ सु हीन्गीनगो झ्युङयेगी वाङ ॱनाङालाक।’ देगी कोरला खेराङक्याई यीक चोम्गीन रीङगागी ॱनेवालाक, ‘होराङक्या खोङबागी दुङग्यु लाक।’ 29 होझ्येरी होराङ को़न्क्षोकगी दुङग्यु झ्येरी, को़न्क्षोकला मीक्याई रीक्पा धाङ लागागी धोगोङ धाङ सेर धाङ ॱङुने शो़सा कु ॱनेरी साम्ये मेतालाक। 30 एम्मा-एम्मा मीक्याई को़न्क्षोकला ङो ॱमेस्येगीन धी़चो़गो, को़न्क्षोकगी या माझ्येवालाक हीना धान्दा खोङबागी मी घीरीला राङ-राङगी धीक्पाला ग्यो़पा झ्येरी, खोङबा स्योकला लोक ॱनेरी का ॱनावालाक। 31 घीझ्येरी ॱनाना खोङबागी को़ ॱनाङगीन मी देगी क्षीने, जाम्बुलीङगी मी घीरीगी ठीमगो ढाङपो चेये ॱनेरी, खोङबागी ठीम चेगीन ङीमा दे को़ जे हो़तालाक। देगी पाङपोगो खोङबागी खोङला छीवाने याङ सो़न्पो श्याङ जेदी मी घीरीला तो़न जे हो़तालाक।” 32 धा मी स्यीस्या याङ सो़न्पो लाङगीलाक ॱनेरी घोरती, मी रीङगागी पाउलुला घो़ स्योरती ॱमेज्यु तावालाक हीना मी श्येम्माक्याई ॱनेवालाक, “हेक्या देगी कोरला धोराङा ङेन्ङी दो़दीक।” 33 धेनी पाउलु खुङक्या खोक्ने सोवालाक। 34 खुङक्याने मी रीङगागी धेपा झ्येरी पाउलुमुला सोवालाक। होदेक्याने च्यीक आरेओपागुगी दीओनुसीउ ॱनागीन, मी धाङ श्येम्मा धामारी ॱनागीन केमी लाक। धेनी मी श्येम्माक्यागीया चोवोला धेपा झ्येवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.