जेपा 16 - ॱलोवातीमोथेउगी पाउलु धाङ सीलवानुमुला लेगा झ्येवा 1 पाउलु धेरबे धाङ लुस्टारु फेप्ती, होदुरु तीमोथेउ ॱनागीन ङेने च्यीक हो़तालाक। खी़ आमागो चोवो येशुला धेपा-झ्यीगीन याहुदापा लाक धेनी आकीगो गीरीक लाक। 2 लुस्टा धाङ ईकोनीयोनला हो़गीन धेपा-झ्यीगीनक्याई तीमोथेउला, मी ढाङपो लाक ॱनेरी चीलालाक। 3 पाउलुगी खोला मुला ठीक्ङी दो़पालाक। धेनी याहुदापाक्याला घीन्दा क्यो़न माझ्युङवास्योक ॱनेरी, खी़ तीमोथेउगी पाउ चेदी ताक ग्याप्कीन ॱरोगो झ्येवालाक। घीझ्येरी ॱनाना होदे साजाला धेगीन याहुदापाक्याला, तीमोथेउगी आकी गीरीक लाक ॱनागीन लाब क्षा हो़तालाक। 4 होदे स्याम्ने खुङक्या ग्याजा-ग्याजारु सोवालाक धेनी साजा घीरीला हो़गीन, चोवोगी ङेनेक्याला येरुसालेमगी कुछाप धाङ धेपा-झ्यीगीन क्षो़छोकगी गोठीक्याई, ढो़ झ्येजा लाबक्या स्येपालाक। धेनी दे लाबक्या ची ॱनेरी ॱलापच्या तेरपालाक। 5 देरे झ्येरी क्षो़छोकगी मीक्याई धेपा स्युक्क्षेरु सोवालाक धेनी ङीमा तेनग्याङ धेपा-झ्यीगीन मीक्या माङदु सोवालाक। पाउलुगी तोरोआस ग्याजारु थोथा थोङनाङ 6 धाम्पे थुक्ङीगी पाउलु धाङ सीलवानु धाङ तीमोथेउला एशीया स्योकला, ताम्शाङ स्येरु डोयेला काक जेदी, खुङक्या फारुगीया धाङ गालातीया स्योकने झ्युरी सोवालाक। 7 मोसीया ग्यारापगी साजामला ॱलेप्ती, खुङक्याई बीथानीया ग्याराप स्योकला डोये साम्लो तावालाक। हीना येशुगी थुक्ङीगी खुङक्याला होदुरुवाः डोरु ॱमाच्युक्पालाक। 8 होझ्येरी खुङक्या मोसीया झ्युरी, स्यारी तोरोआस ग्याजारु सोवालाक। 9 होदे घोमुराङ पाउलुगी थोङनाङला माकेडोनीया स्योकगी, मी च्यीक लारी देरे श्योवा पुगीनगो थोवालाक, “खेराङ माकेडोनीयाला फेप्रोनाङ धेनी हेक्याला रोवा जेरोनाङ।” 10 पाउलुगी होदेरे थोङनाङ थोरी, हेक्या उक्कुरा माकेडोनीया स्योकला डोये डाढीक झ्युवी। घीझ्येरी ॱनाना होदे साजागी मीक्याला चोवोगी ताम्शाङ स्येयेला, को़न्क्षोकगीराङ भो़ जेपालाक ॱनागीन लाब, हेक्याला क्षा झ्युजुङ। लीडीयागी येशुला धेपा झ्येवा 11 तोरोआसदु डुशीङ श्यो़न्दी हेक्या स्यारी ॱहाकीनगी, सामोथारके स्योकला सोवी। ॱङेटोगो नेआपोली ग्याजारु ॱलेप्सुङ। 12 होदेने माकेडोनीया स्योकगी चो ग्याजा फीलीप्पी स्योकला, हेक्या घोबा चुक्ती सोवी। होदे ग्याजागो रोमापाक्याई आङजाला हो़तालाक। होदुरु हेक्या ङीमा घाजीङ धेवी। 13 ग्याजागी फीला चाङबुगी थामाला याहुदापाक्याई सोवा ग्याप्जा साजा हो़टु ॱनेरी, साम्दी हेक्या ङासुगीन ङीमाला होदुरु सोवी। धेनी होदुरु जोम्दी धेता भोमोक्यामुला धेदी लाब तावी। 14 हीकी लाब ङेन्गीनक्याने, लीडीया मीङ हो़गीन भोमो च्यीक दुक। मो थीयातीरा ॱनागीन साजाने होरी फीलीप्पीदु घोङ क्षे झ्यीगीन, छो़ ॱमुक्पे घोनामगी छोङ ग्यालाक। लीडीया याहुदापा मेन्गीन मीरीक हीन्ना को़न्क्षोकला चीगीन केमी लाक। पाउलुगी ॱनागीन लाबला ङेन्येला, चोवोगी मी़ सेम डाढीक झ्येवालाक। 15 धेनी धेपा झ्येरी लीडीया धाङ मी़ नाङमीगी ठी़सो़ लेन्बालाक। होदे स्याम्ने मी़ हेक्याला मोरी नाङला, धेयेला श्योवा पुरी ॱनेवालाक, “खेराङक्याई ङाला ॱङोन्नेराङ चोवोला धेपा झ्येजा नुमु चीली हो़ना, हीकी नाङला होरी हेक्यामुला श्युक्रोनाङ।” देरे झ्येरी मी़ हेक्याला मोरी नाङला डोये शो़जुङ। पाउलु धाङ सीलवानुला चो़न्खाङला धाक्पा 16 ङीमा च्यीक हेक्या सोवा ग्याप्सा साजाला डी़ घाङला, ॱयोक्मो च्यीकला थुक्सुङ। मोला ॱनो़पा च्यीक ज्यु हो़तालाक धेनी होदे ॱनो़पागी स्युकने, मो मी श्येम्माक्याई माउपारला झ्युङये हो़गीन लाबक्या स्येदी, मोरी दाक्पोक्या क्षीला ॱमीच्यीकी आले घा शो़वालाक। 17 दे भोमो दे पाउलु धाङ हीकी स्याबाला डारी होरी देरे ॱनेरी फेरा ग्याप्पालाक, “दे मी देक्या थोस्योक को़न्क्षोकगी ॱयोक्पोक्या लाक। धेनी देक्या थारपा राक्येगी लाम्गागी कोरला खेक्याला स्येदालाक।” 18 धेनी मी़ देरे ङीमा माङा झ्येवालाक। हीना पाउलुगी मी़ देरे फेरा ग्याप्कीनगो थेदा ॱमास्येवा, होदे ॱनो़पाला ॱनेवालाक, “चोवो येशु मास्यीकागी छेनला ख्यो़ दे भोमोगी नाङने थो़न्दी स्योक।” धेनी खी़ देरे ॱनालुङ मेताला, होदे ॱनो़पागो थो़न्दी होवालाक। 19 धा होदे भोमोगी दाक्पो देक्याई होदे भोमोने आले हुङजागो मेगीन स्येरी, पाउलु धाङ सीलवानुला शीम्दी धेनी ठीम चेजा साजारु ढी़दी खेरती सोवालाक। 20 धेनी रोमापा पो़न्पोक्या दोङदु ॱलारी खुङक्याई ॱनेवालाक, “दे याहुदापाक्याई होरी ग्याजारु दुक्पु तेरी। 21 धेनी होरी रोमापा ठीमला मेगीन धाङ चीये मेगीन क्षो़लुकक्या देक्याई ॱलावी।” 22 होदे घाङलाराङ मीक्या खुङ ॱङीउला दुक्पु तेरयेला रुप्ती होवालाक धेनी पो़न्पोक्याई, खुङ ॱङीउगी घोलाक पी़दी च्याक्थाकगी श्युरये का ॱनावालाक। 23 ॱमीच्यीकी आ श्युर सारती, खुङक्याई खुङ ॱङीउला चो़न्खाङदु धाक्ती, चो़न्खाङगी घोरेगोला घामोमा ॱरुङयेला का ॱनावालाक। 24 दे का जोरती होदे घोरेगी़ खुङ ॱङीउला, चो़न्खाङगी नाङ बुक्योकगोला ठीक्पालाक धेनी खुङक्याई काङबागो दुङमाक्याई खोकला दाम्बालाक। 25 धा छेनगी तीक-तीकला पाउलु धाङ सीलवानु सोवा ग्याप्ती, को़न्क्षोकला तो़लु पुली धेबालाक धेनी श्येम्मा चो़न्पाक्या ङेन्दी धे हो़तालाक। 26 होदे घाङला ॱहाताक्पाला ॱमीच्यीकी जीक्टाक्षे सुङगु ग्याप्ती, चो़न्खाङगी डामगोवा ठुक-ठुक झ्युवालाक। धेनी घोक्या घीरी भेवालाक धेनी चो़न्बा घीरीगी च्याक्थाकक्या डोवालाक। 27 चो़न्खाङ ॱरुङगीन घोरेगो ॱङी छेदी, होदुरु खी़ घो घीरी भेरी धेता थोवालाक। धेनी चो़न्पा घीरी डो़री सोवा हीन्ढु ॱनेरी साम्दी, खो खोराङला सेयेला खोरी डीगो तो़न्बालाक। 28 हीना पाउलुगी फेरा ग्याप्ती ॱनेवालाक, “ख्यो़ ख्यो़राङला ॱमासे। हेक्या घीरी दुरुराङ हो़क।” 29 दे ॱहाघोरती चो़न्खाङ ॱरुङगीन घोरेगी़ क्युङ पोर ॱनेरी, भाङ तारी नाङदु सोवालाक। धेनी जीक्टागी शु दारी-दारी, खो पाउलु धाङ सीलवानुगी दोङदु क्षाक क्षावालाक। 30 धेनी खी़ खुङ ॱङीउला फीला ठीक्ती सोरी देरे ॱनेवालाक, “घेगेनक्याओ, ङाला थारपा थोप्येला ङी घी झ्यीघोगुले?” 31 खुङक्याई ॱनेवालाक, “चोवो येशुला धेपा झ्यी धेनी ख्यो़ला थारपा थोप्कीलाक। दे ख्यो़ धाङ ख्यी़ नाङमी घीरीगी क्षीला थारपालाक।” 32 धेनी पाउलु धाङ सीलवानुगी खो धाङ खी़ नाङमी घीरीला, चोवोगी कोरला स्येपालाक। 33 छेन्मो होदे धी़चो़गोला राङ घोरेगी़ पाउलु धाङ सीलवानुला, ठीक्ती खुङक्याई ॱमागो ठी़वालाक। धेनी खो धाङ खी़ नाङमी घीरीगी ठी़सो़ लेन्बालाक। 34 धेनी घोरेगी़ खुङ ॱङीउला खोरी नाङदु ठीक्ती शामा तेरपालाक। धेनी खो धाङ खी़ नाङमी घीरीगी को़न्क्षोकला धेपा झ्येरी, खुङ घीरी ङ्यामो घेवालाक। 35 ॱङेटो ॱनाम लारी रोमापा पो़न्पोक्याई ॱमाक्मी रीङगाला, “होदे मी ॱङीउला डोरु च्युक” ॱनागीन का दे चो़न्खाङ ॱरुङगीन घोरेला तेरयेला ज्येबालाक। 36 धेनी चो़न्खाङ ॱरुङगीन घोरेगी पाउलुला ॱनेवालाक, “खेराङ ॱङीउला तो़न्दी शोङ ॱनेरी, रोमापा पो़न्पोगी का ॱनाङदुक। होझ्येरी खेराङक्या सेम कीपो झ्युरी फेप।” 37 हीना पाउलुगी ॱमाक्मीक्याला ॱनेवालाक, “हेक्या रोम ग्याखापगी मी झ्येरीयाः खुङक्याई हीकी ठीम ॱमाचेपालाः हेक्याला मीमाङक्याई दोङदु ॱमीच्यीकी आ श्युरजुङ धेनी धोराङा हेक्याला चो़न्खाङला दाक्जुङ। धा हेला खाबा तो़न्ये झ्यीदाले? दे हुङ छोक्ये मेतालाक। खुङक्याराङ होरी हेक्याला देने, फीला तो़न घोगीलाक।” 38 होदे ॱमाक्मीक्याई होदे लाब रोमापा पो़न्पोक्याला ॱनेवालाक। धेनी पाउलु धाङ सीलवानु रोम ग्याखापगी मी लाक ॱनेरी, घोरती खुङक्या जीक्पालाक। 39 होझ्येरी खुङक्या होरी पाउलु धाङ सीलवानुला घोङपा श्यी़वालाक धेनी खुङक्याला फीला तो़न्दी, होदे ग्याजा भोरती डोयेला श्योवा पुवालाक। 40 धेनी पाउलु धाङ सीलवानु चो़न्खाङने थो़न्दी, लीडीयागी नाङला सोवालाक धेनी धेपा-झ्यीगीन पी़नक्याला थुक्ती, खुङक्याला सेमस्युक पारती होदे साजा भोरती सोवालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.