२ तीमोथेउ 3 - ॱलोवाथामे धी़गी ङेन्का 1 थामे धी़ला धी़ घाक्वा हुङगीलाक ॱनेरी, ख्यो़ स्येलाझ्यी। 2 घीझ्येरी ॱनाना मीक्या राङला क्षाक्कीन धाङ ॱङुला क्षाक्कीन, पोवा क्षे धाङ ङागेल्चेन, छीक चुक्वा ॱनागीन धाङ फामाला ॱमीचीगीन, डीन मेढेन्गीन धाङ क्षो़ला ॱमीचीगीन 3 धेनी चेसेम मेगीन धाङ दाङसेमचेन, ठामा ग्याप्कीन धाङ छो़ मीशीम्गीन, दुक्चुपचेन धाङ गेवाला मेघागीन 4 धेनी ङोलोक्चेन धाङ साम्लो ॱमेथोङगीन, ङागेलगी खाङखा धाङ को़न्क्षोकले ल्हाक दो़यो़नला क्षाक्कीन, 5 धेनी क्षो़सेम झ्यी दोक-दोक झ्यीगीन हीना होदेगी वाङला खेमेलेन्गीन हुङगीलाक। देरे मीक्याने जेम। 6 खुङक्याने रीङगा गोकोर तारी मीगी नाङक्याला जुरी, धीक्पा धाङ दो़पा ॱनाछोकगी ॱनेम्दी धेता केमी क्योवाक्याला, राङगी वाङदु धी़लालाक। 7 देरे केमीक्या च्योई ज्याङये थापस्यी झ्यीदालाक हीना धेन्पागो नामा स्ये ॱमीथुक्वालाक। 8 यानने धाङ याम्बारे ॱङीउगी मोशेला ङोलोक झ्यीगीन च्योक्रे, ॱलेपा रुरा धाङ धेपा शोक्पो हो़गीन, दे मीक्यागीयाः धेन्पाला ङोलोक झ्यीदालाक। 9 हीना होदे मी ॱङीउला झ्युजा च्योक्रे, खुङक्या ॱलेन्दा हीन्गीनगो घीरीगी दोङदु ॱङो़न्दी, खुङक्या हामी रीङा ॱमीथुप्कीलाक। तीमोथेउला पाउलुगी ॱलापच्या 10 हीना ख्यी़ ङी क्षो़ तो़न्गीन धाङ ङी चो़लाम धाङ ङी मीछेगी ॱमीक्यु धाङ धेपा धाङ ङी शो़पा धाङ ङी झाम्पा धाङ ङा तेन्पो हो़गीन, 11 धेनी ङी दुक्जोङक्या धाङ दुक्पुक्या धेनी आन्तीयोक यु धाङ ईकोनीयोन यु धाङ लुस्टा ग्याजारु, ङाला घी झ्युङगीन धाङ ङी दुक्पु घी ङ्याङगीनगो ॱङो़न्सुमदु थो हो़तालाक हीना चोवोगी ङाला दे घीरीने थारपा जेपालाक। 12 ॱङोन्ने झ्यीना मास्यीका येशुला तेन्दी, क्षो़ला थी़न्गीन मीछे क्याङी दो़गीन घीरीगी दुक्पु ङ्याङराङ घो़गीलाक। 13 हीना मी ङेन्पाक्या धाङ शोक झ्यीगीनक्या श्येम्माक्याला गोवा कोरती धेनी राङ गोकोरला छी़दी, दुक्तु दुक्तु डुगीलाक। 14 हीना होदे ॱलापच्याक्या सुने ज्याजागो ख्यी़राङ स्येलालाक। घीझ्येरी ॱनाना ख्यो़ राङगी ॱलाप्ला ॱलापच्याक्या धाङ तेन्पो झ्येरी झ्येजा धेपाला ॱनेती धो़क। 15 मास्यीका येशुगी खाला धेपागी गोने थारपागी स्येराप ॱनाङगीन, धाम्पे सुङरापगो ख्यी़ च्यीमेने ॱहालाराङ स्ये हो़तालाक। 16 धाम्पे सुङरापला हो़गीन घीरी को़न्क्षोकगी थुक्ङीने झ्युवालाक। धेनी दे ॱलापच्या ॱलाप्ये धाङ क्यो़न तो़न्ये धाङ नोन्डु शोये धाङ ढाङतेनगी लामला ॱलोप्तो़न तो़न्येला, फेन थोवालाक। 17 होझ्येरी को़न्क्षोकगी मीक्या ले शाङा घीरीला, जो़न्पो धाङ छाङगीन झ्युङगीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.