२ तीमोथेउ 2 - ॱलोवामास्यीका येशुगी ॱमाक्मी शाङपो 1 ङी भु ख्यो़, मास्यीका येशुगी थुक्जे नाङदु ॱङीङक्षे झ्युङ श्यीक। 2 धेनी पाङपो माङागी दोङदु ङाने घोरकीन ङी ॱलाप्ला लाबक्या, श्येम्माक्याला ॱलाप थुप्कीन, ॱलो का थुप्कीन केवे-भुक्याला चो। 3 मास्यीका येशुगी ॱमाक्मी ढाङपो च्यीक च्योक्रे, ङीमुला दुक्ङेलगी गेन खुर। 4 ॱमाक्मी च्यीकगी ॱमीक्यु राङगी पो़न्पोला च्यीगा घारु च्युक्ये हुङालाक, होझ्येरी खो ङीन्रेगी लेगाक्याला ॱमेथेलालाक। 5 देरे झ्येरीराङ गेपा च्यीकगी ठीमला चीरी मीदुरना, खोला होदेगी ज्यागा ॱमेथोवालाक। 6 काल्ले ग्याप्कीन श्यीङबागोला, तो़न्दोकगी कादा धाङपोगो थोप घोलालाक। 7 चोवोगी ख्यो़ला घीरीगी थोकला स्येराप ॱनाङगीलाक होझ्येरी, ङी घी ॱनागीनगोला साम्लो घामोमा तोङ। 8 ङी स्येगीन ताम्शाङ च्योक्रे, दावीदगी दुङग्युने हीन्गीन छीवाने सो़न्पो श्याङस्या येशु मास्यीकाला ढेन्सो़। 9 ताम्शाङ दी दो़नला ङा मी नाक्चेन च्योक्रे, च्याक्डोकगी दाम्दी दुक्पु ङ्याङी हो़क। हीना को़न्क्षोकगी का मादाम हो़तालाक। 10 होझ्येरी धाम्दा मीक्यागी दो़नला ङा घीरी शो़पा घोमीहो़क। देरे झ्येरी खुङक्याला थामेपे शीजेमुला, मास्यीका येशुने थारपा थोप्कीलाक। 11 दे ताम दे ॱलो खेलादुक, “होराङ खोङबामुला स्यी हो़ना, खोङबा मुलाराङ सो़न्गीलाक। 12 होराङ तेन्पो ॱनेती धेना, खोङबा मुलाराङ ग्यासीगी वाङ झ्यीगीलाक। होरी खोङबाला ग्याप ॱलोक्ना, खोङबागीया होराङला ग्याप ॱलोक्वा जेगीलाक। 13 होराङ धेपाने लोक्ना, खोङबा नी ॱलोते छोक्पा ॱनेलालाक। घीझ्येरी ॱनाना खोङबा राङगी राङला ङोलोक जे ॱमीथुक्कीलाक।” ङोलेन जेजा लेजे 14 खुङक्याला देक्याई ढेन्सो़ ॱलोङ। मीला ॱमेफेन्गीन हीना ङेन्गीनक्याला ॱनो़ क्यागीन छीकक्याई कोरला, चो़लीङ माझ्यी ॱनेरी, को़न्क्षोकगी डुङदु ॱलापच्या तेर। 15 ङो छामेघोगीन धाङ धेन्पागी का सावो ॱलाप्कीन लेजे च्योक्रे, राङगी राङला को़न्क्षोकगी डुङदु थुक्ङेउ झ्युङयेला घी थुप्तु थापस्यी झ्यी। 16 क्षो़ला ॱमीथी़न्गीन लाबक्याने जेम घीझ्येरी ॱनाना देरेक्याई मीक्याला को़न्क्षोकने थाक्रीङा ठीक्कीलाक। 17 धेनी देरे लाबक्या ॱङेन्गा झ्युजा नाजा च्योक्रे ख्याप्कीलाक। देरे लाब ताङगीन मी नाङने, हुमेनायु धाङ फीलेतोस ॱङीउ लाक। 18 छीवाने ॱलार सो़न्गीन दे झ्युसालाक ॱनेरी, खुङक्या धेन्पाने लोक्पालाक। धेनी खुङक्याई मी रीङगाला धेपाने ॱलोक्येला टुक्ई। 19 हीना “चोवोगी राङगी मीक्याला खेन्दालाक।” धेनी “चोवोगी छेन भो़गीनक्या लेङेनक्या पाङास्योक” ॱनेरी ढीक्टा को़न्क्षोकगी चीक्माङगो तेन्पो झ्येरी ॱनेलालाक। 20 खाङबा क्षे च्यीक नाङदु सेर-ॱङुगी ॱनो़क्या च्यीका मेन्दा, स्यीङ धाङ जागी ॱनो़क्या हुङालाक। रीङगा ॱमीक्सेगी धी़ शाङागी क्षीला धेनी रीङगा नामग्यु भेचो़गी क्षीला हुङालाक। 21 ॱमेचाङा घीरीने राङला चाङमा झ्यीगीन मीगो, धी़ शाङागी क्षीला भेचो़ झ्युरी धेनी धाम्पा जेगीलाक। खीमगी दाक्पोगी क्षीला, फेन्थोवा धाङ ले शाङा घीला हीन्ना डाढीक झ्युङगीलाक। 22 होझ्येरी श्योन्नुगी दो़क्षाकक्या पोङ धेनी सेम चाङमागी थोक्ने, चोवोगी छेन जो़गीनक्यामुला ढाङतेनगी मीछे धाङ धेपा धाङ झाम्पा धाङ श्यीदेगी ॱमीक्यु चो। 23 हीना ॱलेन्पा धाङ दो़न्दाक मेगीन ॱङ्योक्टाक्याई, धुगा स्योरतु च्युक्कीनगो, ख्यी़ स्येये झ्येरी देक्याला जेम। 24 धेनी चोवोगी श्यीप्चीवा ठुक्चारा हुङये मेतालाक हीना घीरीला ॱङीङजे झ्यीगीन धाङ ॱलाप थुप्कीन धेनी शो़पा घोम थुप्कीन, 25 धेनी राङगी स्योकला मेगीनक्याला ज्याबोमा ॱलोप्तो़न झ्यी थुप्कीन हुङघोवालाक। देरे झ्यीना को़न्क्षोकगी खुङक्याला धीक्पा पारी सेम ग्युरये धाङ धेन्पाला ॱहा घोथुप्कीनगी सेम ॱनाङगीलाक। 26 धेनी धी़कगी दो़पा झ्यीयेला, धी़कगी वाङ होकदु स्योरस्याक्या राङगी रीक्पा शीम्दी, धी़कगी ॱङीप नाङने थारकीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.