२ कोरीन्थुपा 9 - ॱलोवा1 धाम्पे मीक्याई क्षीदु खेक्याई श्यान्देप पुगीनगी कोरला, ङी खेक्याला ढीक घोये मीदुक। 2 घीझ्येरी ॱनाना खेक्या डाढीक हो़गीनगो, ङाला स्येयेहो़क। धेनी नाङी लोने राङ आकाईयागी मास्यीकावाक्या डाढीक दुक ॱनेरी, ङी माकेडोनीयागी मीक्याई दोङदु खेक्याई कोरला ङोम्सो झ्येरी ॱनेवी। धेनी खेक्याई श्यान्देप तेरयेला देरे दो़पा झ्यीगीनगी मी माङक्षेला, सेमस्युक पारदुक। 3 हीना दो़न दी कोरला हीकी खेक्याई क्षीदु ङोम्सो झ्यीगीनगो दो़न्मेदु माझ्युङास्योक धेनी ङी ॱनेना च्योक्रे, खेक्या डाढीक झ्युङवास्योक ॱनेरी, ङा पी़नक्याला झाङाहीन। 4 धेनी माकेडोनीयागी मी रे, ङीमुला होरी खेक्याला डाढीक मेगीनगो ॱङेना, हेक्या ङोछा घोवालाक धेनी खेक्याः ङोछागुलाक घीझ्येरी ॱनाना हेक्याई खेक्या खाला ॱमीच्यीकी यीच्चे झ्येवालाक। 5 होझ्येरी खेक्याई क्षो़ताम झ्येजा श्यान्देप एन्लाराङ, डाढीक झ्यीयेगी क्षीदु, ङाने एन्ला पी़नक्या खीकीचारु ताङ घोयेगो ङी साम्जुङ। धेनी दे नी खेक्याई हुदुक्ती मेन्दा, हीना खेरी दो़पागी डाढीक झ्येजा ॱङेन्बा झ्युङगीलाक। ॱलो ॱमेफाङा पुगीनगी कोरला 6 ङी ॱनागीनगी दो़न नी दे लाक, साङा ङ्युङा ताप्कीनगी लोदोक ङ्युङा दुवालाक धेनी साङा माङा ताप्कीनगी लोदोक माङा दुवालाक। 7 मी रे-रेगी राङगी मेदो़दा धेनी हुदुक्ती मेन्दा, हीना राङगी सेमगी थाक्चो़चाने राङ श्यान्देप पुघो़। घीझ्येरी ॱनाना ङ्यामो घेरी पुगीनगोला को़न्क्षोक थुक्ङेउ जेदालाक। 8 धेनी खेक्याला घो़गीन घीरी च्योई मेछो़ली हुङये धाङ ले शाङा घीरीगी क्षीदु, खेक्याई मेछो़ली पु थुक्वास्योक ॱनेरी, को़न्क्षोकगी खेक्याला झ्यीलाप हो़लेगो मेछो़ली ॱनाङ जे थुक्वालाक। 9 सुङरापला देरे ढीक हो़तालाक, “खी़ ॱलो ॱमेफाङा छोक घीरीदु तेरालाक धेनी उटेक्याला ज्यीम्बा ताङालाक, खी़ ढाङतेन थामेपे क्षीदु ॱनेलालाक।” 10 साङा ताप्कीनला साङा धाङ शायेला शामा ॱनाङा जेगीन, खोङगी खेक्याला ताप्येला साङा ॱनाङा जेदी, होदेला फेरु च्युक्वा जेगीलाक धेनी खीकी ढाङतेनगी लोदोकगो माङा जेगीलाक। 11 धेनी खेक्या च्योई ॱलो ॱमेफाङा पु थुक्कीन झ्युङयेगी क्षीदु, दो़न घीरीला खेक्या क्षुक्पु जेगीलाक धेनी हेक्याई थोक्ने मीक्याई को़न्क्षोकला काटीन्क्षे श्यी़गीलाक। 12 घीझ्येरी ॱनाना देरे श्याप्तोक पुगीनगी, धाम्पे मीक्याई घो़गीनगो डुप्ये च्यीगा मेन्दा हीना, को़न्क्षोकला काटीन्क्षे माङा श्यी़गीन झ्युङास्योक ॱनेरीयाः लाक। 13 खेक्याई श्यान्देप पुगीन श्याप्तोकगी थोक्ने, खुङक्याई को़न्क्षोकला तो़पा पुगीलाक घीझ्येरी ॱनाना खेक्याई खुङक्या धाङ श्येम्मा घीरीला श्यान्देप पुगीनगी गोने, खेक्याई मास्यीकागी ताम्शाङला खेलेन झ्यीगीनगो पाङपो झ्यीदालाक। 14 धेनी को़न्क्षोकगी छे मेगीन थुक्जे, खेक्या खाला ॱनाङना झ्येरी खुङक्या खेक्याला ॱमीच्यीकी ढेन्दी, खीकी क्षीदु ॱमो़लाम श्यी़गीलाक। 15 ढेस्ये राङ ग्याप ॱमीथुक्कीन ॱनाङज्यीनगी क्षीदु, को़न्क्षोकला थुक्जेक्षे श्युउ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.