२ कोरीन्थुपा 8 - ॱलोवाश्यान्देप पुघोयेगी कोरला 1 पी़नक्याओ, को़न्क्षोकगी माकेडोनीयागी क्षो़छोकक्याला ॱनाङना थुक्जेगी कोरला, खेक्याई ॱहाघोकीनगो हेक्या दो़दीहो़क। 2 खुङक्या दुङा छाप्क्षेगी छो़तागी घुङदुवाः ॱमीच्यीकी उटे झ्येरीयाः, घाटो क्षेगी गोने खुङक्याई ॱमेफाङा श्यान्देप पुवालाक। 3 घीझ्येरी ॱनाना खुङक्याई राङगी थेगीनने, राङगी तेर थुक्कीनगोने पुवालाक धेनी देले ल्हाक पुवालाक। 4 धाम्पे मीक्याला श्याप्ची श्युयेला थोप्ताङ ॱनाङरोझ्यी ॱनेरी, खुङक्याई हेला ॱङीङ थाक्पाने श्योवा ग्याप्पालाक। 5 धेनी हीकी रेवा झ्येजाने ल्हाक, खुङक्याई एन्ला राङ-राङला चोवोला पुवालाक धेनी को़न्क्षोकगी थुकोङला तेन्ती, खुङक्याई राङ-राङला हेक्याई लागला ची ग्याप्पालाक। 6 होझ्येरी तीतोसगी एम्मा लेगा दे गो चुक्चा झ्येरी, धा खेक्याई खोक्दु थुक्जेगी लेगा दे डुप घो़गुलाक ॱनेरी, हेक्याई खोला च्याक ग्याप्पी। 7 धा धेपा धाङ ताम धाङ स्येयो़न धाङ लेशाङ झ्यीयेगी दो़पा धाङ खेक्याई क्षीदु हीकी चेवा धाङ दो़न घीरीला खेक्या ज्यो़न्गीन च्योक्रे, थुक्जेगी लेगा देला खेक्या ज्यो़न्पो झ्यी। 8 ङा खेक्याला का तेरामेन हीना मी श्येम्माक्याई हुरा झ्येरी रोक्राम झ्यीगीनमुला दुरती, खेक्याई चेवागोवाः धेन्पा लाक ॱनेरी पाङपो झ्यीयेला, ङा देक्या ॱनाहीन। 9 घीझ्येरी ॱनाना होरी चोवो येशु मास्यीकागी थुक्जे खेक्या स्येलालाक। खोङ क्षुक्पु झ्येरीयाः, खेक्याई दो़न्दु उटे झ्युवालाक। दे नी खोङ उटे झ्युङगीनगी थोक्ने, खेक्या क्षुक्पु झ्युङवास्योक ॱनेरी लाक। 10 धा खीकी फेन्थोकगी क्षीला दो़न दी कोरला, ङा देरे ॱलापच्या तेराहीन, नाङी श्यान्देप पुगीन लेगा दे गो चुक्येला च्यीगा मेन्दा, हीना देरे झ्यीयेला दो़पा झ्यीगीनगोवाः, खेक्या धाङस्योक लाक। 11 होझ्येरी धा होदे घामोमा डुप्तु च्युक। खेक्याई तेर थुक्कीनने खेक्याई तेरना, एम्मा खेक्याई तेरयेगी दो़पा झ्यीगीनगो, खेक्याई डुप्तु च्युक्कीलाक। 12 घीझ्येरी ॱनाना श्यान्देप पुयेला दो़पा हो़ना, खेक्याला मेगीनगोने मेन्दा हीना हो़गीनगोने पुगीनगोला को़न्क्षोक थुक्ङेउ जेगीलाक। 13 ङी ॱनागीन दे श्येम्माक्याला याङा धाङ खेक्याला च्ये हुङयेगी क्षीदु ॱनामेन हीना घीरी क्षा ङ्याम्येगी क्षीदु ॱनाहीन। 14 धान्दा खेक्याला मेछो़ली हो़गीनगोने, खुङक्याई घो़गीनला रोवा झ्यीघो़ धेनी स्याम्ला खुङक्याला मेछो़ली हो़ताराङ, खीकी घो़गीनला खुङक्याई रोवा झ्यीगीलाक। देरे झ्येरी खेक्या क्षा ङ्याम्गीलाक। 15 धाम्पे सुङरापला देरे ढीक हो़तालाक, “माङा धुगीनक्याला ल्हाक्मा घीया मेल्हालाक, धेनी ङ्युङा धुगीनक्याला ॱमेछाङगीन घीया मेयोङालाक।” तीतोस कोरीन्थुरु 16 हीना ङी खेक्याला दो़नाङ तेरकीन च्योक्रे, तीतोसगी सेम नाङदु खीकी क्षीला होदे दो़नाङ ॱनाङा जेगीन, को़न्क्षोकला काटीन्क्षे श्युवाहीन। 17 घीझ्येरी ॱनाना तीतोसगी हीकी कुगीनला ङेन्दी च्यीगा मेन्दा, हीना खोराङ राङ खेक्याला रोवा झ्यीयेला ॱमीच्यीकी दो़पा झ्येरी, खेक्याचारु हुङी हो़तालाक। 18 धेनी ताम्शाङ स्येयेला क्षो़छोक घीरीला ॱमीच्यीकी केटाक्क्षे हो़गीन पी़नगोवाः खी़मुला झाङाहीन। 19 होदे च्यीगा मेन्दा, चोवोगी शीजे ॱङो़न्ये धाङ हीकी रोक्राम झ्यीयेगी दो़पागो तो़न्येगी क्षीदु, हेक्याई झ्येरी धेता थुक्जेगी लेगा देला, हीकीमुलाराङ डु ग्याप्येला क्षो़छोकने खोला दाम्बालाक। 20 दे नी हेक्याला ॱमेफाङा तेरता श्यान्देप देला धी़वाराङ, सी़या हेक्याला क्यो़न ॱमीचुक्वास्योक ॱनेरी, हेक्या दो़दीहो़क। 21 घीझ्येरी ॱनाना चोवोगी ॱमीक्वादु च्यीगा मेन्दा हीना मीक्याई दोङदुवाः, हेक्या शाङा घी हीन्गीनगो झ्यीयेगी ॱमीक्यु श्याईहो़क। 22 हेक्याई थेङ माङा छो़ता झ्येरी, दो़न माङक्षेला हुरा थोथा पी़नगोला हेक्या खुङक्याईमुला झाङाहीन। धेनी खो खेक्याला ॱमीच्यीकी यीच्चे झ्यीगीन झ्येरी, खो खेक्याला रोवा झ्यीयेला ॱयोल्ले दो़पा क्षे झ्युदुक। 23 धेनी तीतोस नी, रोवा धाङ खेक्याला श्याप्तोक पुयेगी क्षीदु ङी लेरोक लाक। धेनी होरी पी़न श्येम्माक्या नी, मास्यीकागी शीजे हीन्गीन क्षो़छोकक्याई भाङछेनक्या लाक। 24 होझ्येरी खेक्याई चेवा धाङ खेक्याई कोरला, हीकी झ्येजा ङोम्सोगी दो़नगो क्षो़छोकक्याई दोङदु तो़न। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.