२ कोरीन्थुपा 7 - ॱलोवा1 चेवे पी़नक्याओ, होराङक्याला धाम्चा देक्या हो़गीन झ्येरी, होराङक्या राङगी ली़ धाङ सेम्ङीला ॱमेचाङा शोगीन घीरीने, राङला चाङमा शोउ धेनी को़न्क्षोकला ॱङीङकुर झ्येरी, धाम्पे नाङ फी़न्सुम छोक्पा झ्युरी सोङ। पाउलुगी घाटो 2 खेक्याई सेम नाङदु हेक्याला घोक्जा तेर। हीकी सुला ॱनो़ ॱमाक्या। धेनी हीकी सुला ॱमाली़ धेनी हीकी सुला ॱहाम्बा माझ्ये। 3 खेक्याला क्यो़न चुक्येला, ङी देक्या ॱनामेन घीझ्येरी ॱनाना खेक्या हीकी सेम नाङला हो़गीन धाङ खीकीमुला स्यी घोनाः, धेघोनाः हेक्या डाढीक हो़क ॱनेरी, ङी खेक्याला एन्दुरु ॱनेवी। 4 खेक्याई खाला ङा ॱलोतेक्षे हो़क। धेनी खेक्याई क्षीदु, ङा ॱमीच्यीकी ङोम्सो झ्यीदीहो़क। ङा सेम्सोगी खाङहो़क। धेनी दुङा घीरीगी खोक्दुवाः ङा घाटो क्षे झ्यीदीहो़क। 5 हेक्या माकेडोनीयारु ॱलेप्सारतीयाः, हीकी शुला ङासु थोप्की मीदुक हीना छोक घीरीने हेक्याला दुक्पु ठेपालाक। फीला धुगा धाङ सेमला जीक्नाङ झ्युजुङ। 6 हीना ॱलो फाम्बाक्याला सेम्सो ॱनाङगीन को़न्क्षोकगी, तीतोस ॱलेप्ती खी़ थोक्ने हेक्याला सेम्सो ॱनाङजुङ। 7 खो ॱलेप्कीनगी च्यीका मालाक हीना खेक्याने खोला थोप्था सेम्सोगी थोक्ने, हेक्याला सेम्सो थोप्जुङ। ङाला थुक्येला खेक्याई ॱमीच्यीकी दो़पा झ्यीगीन धाङ ङी क्षीला, खेक्याई सेम क्योगीन धाङ दुङा झ्यीगीनगी कोरला, खी़ हेक्याला स्येजुङ। होझ्येरी ङी घाटो ॱयोल्ले फारजुङ। 8 ङी एम्मा ढीक्टा यीगी खेक्याला सेम क्योरु च्युक्हो़ना, ङा ग्यो़पा मीझ्यी। झ्युङये ता ङाला ग्यो़पा च्यीमे च्यीक झ्युजुङ। होदे यीगी धी़ तीते च्यीक हीन्ना, खेक्याई सेम क्योरु च्युक्दुक ॱनेरी ङाला स्येयेहो़क। 9 धा खेक्याई सेम क्योजुङ ॱनेरी, ङा ङ्यामो घामेन हीना खेक्याई सेम क्योगीनगी, खेक्याला सेम ग्युरतु च्युक्जुङ ॱनेरी लाक। घीझ्येरी ॱनाना को़न्क्षोकगी थुकोङ हो़गीन च्योक्रे, खेक्याई सेम क्योवालाक धेनी हीकी थोक्ने, खेक्याला ॱनो़ घीया माझ्युवालाक। 10 को़न्क्षोकगी थुकोङला हो़गीन सेम क्योगीनगी, सेम ग्युरतु च्युक्वालाक धेनी दी होराङला थारपा ॱनाङालाक। धेनी होदुरु ग्यो़पा मेयोङालाक हीना जीक्तेनगी सेम क्योयेगी छीवा खेरती हुङालाक। 11 तो़दाङ, को़न्क्षोकगी थुकोङला हो़गीन च्योक्रे, खेक्याई सेम क्योगीनगी खीकी नाङ घारे ग्युरवा झ्युदो। खेक्या राङला क्यो़न मेगीन तो़न्येला दो़पा क्षे धाङ श्येताङ धाङ जीक्नाङ धाङ सेमस्युक धाङ दो़नाङ धाङ लेङेनक्याला छेपा कायेला डाढीक दुक। खेक्याई राङला दो़न हो़लेला क्यो़न मेगीन तो़न्दुक। 12 ङी दे यीक ढीक्हो़ना, दे क्यो़न ताङगीन मीगी क्षीला ढीयामेन धेनी क्यो़न फोक्पाक्याई क्षीला ढीयामेन हीना को़न्क्षोकगी ॱमीक्वादु हेक्याला खेक्याई ॱङोन्ने चीदुङ झ्यीगीनगो, खेक्याई ॱहाघोरास्योक ॱनेरी ढीक्पी। 13 होझ्येरी हेक्याला सेम्सो थोप्जुङ। धेनी हेक्याला हेरीराङगी सेम्सो च्यीगा मेन्दा, तीतोसगी घाटोला हेक्या ॱयोल्ले माङा ङ्यामो घेजुङ। घीझ्येरी ॱनाना खेक्या घीरीगी थोक्ने, खी़ सेमला श्यीदे थोप्दुक। 14 धेनी खी़ दोङदु ङी खीकी कोरला ङोम्सो झ्येजागोला, ङा ङोजा घीया माझ्युजुङ। हीना हीकी खेक्याला स्येगीन घीरी धेन्पा हीन्गीन च्योक्रे, तीतोसगी दोङदु हीकी ङोम्सो झ्यीगीनगोवाः धेन्पा झ्युजुङ। 15 खेक्या घीरीगी खी़ खाला ङेन्गीन धाङ खेक्याई खोला जीक्टा धाङ दारती सी़याङ श्यी़गीनगो ढेन्दी घाङला, खेक्याई क्षीदु खी़ चेवागो ॱयोल्ले माङा फेदुक। 16 धेनी ङा ॱमीच्यीकी ङ्यामो घी घीझ्येरी ॱनाना खेक्याई खाला, ङा ॱलोते छोक्पा हो़क। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.