२ कोरीन्थुपा 6 - ॱलोवा1 हेक्या को़न्क्षोकगी लेरोक हीन्गीन झ्येरी, हेक्या खेक्याला को़न्क्षोकगी थुक्जेगो दो़न्मेदु मालेन ॱनेरी, श्योवा पुलाहीन। 2 घीझ्येरी ॱनाना खोङबागी सुङालाक, “धी़ भावी घाङला, ङी खेक्याई श्योवा ङेन्बी, धेनी थारपे ङीमागोला ङी खेक्याला रोवा झ्येवी।” तो़दाङ, धी़ भाप्येगो धान्दा लाक धेनी थारपे ङीमागो धान्दा लाक। पाउलुगी काल्ले 3 हीकी श्याप्तोकला क्यो़न ॱमेफोक्वास्योक ॱनेरी, हीकी सी़याः लामला भारचे ॱमाकाहो़क। 4 हीना हेक्या राङला को़न्क्षोकगी श्याप्चीपा हीन्गीनगो, दे घीरीगी थोक्ने तो़न्दाहीन, शो़पा क्षे धाङ दुङा धाङ काङे धाङ क्यो़न हुङाराङ, 5 धेनी दुङदाक फोक्वाराङ धेनी चो़न नाङदु छी़दाराङ धेनी शीङटा लाङाराङ धाङ काल्ले ग्याराङ धेनी ॱङी मेताराङ धेनी फोवा तोक्वाराङ, 6 धेनी सेम चाङमा धाङ स्येयो़न धाङ शो़पा धाङ ॱङीङजे धाङ धाम्पे थुक्ङी धाङ चेवा ॱङोन्नेगो 7 धाङ धेन्पे ताम धाङ को़न्क्षोकगी नी़थु धाङ लाक्पा ॱये धाङ ॱयो़नला ढाङतेनगी छो़न्छाक्या, 8 धेनी शीजे धाङ ॱमेबेप धेनी ॱमेटा धाङ तो़टागी थोक्ने तो़न्दाहीन। हेक्याला ॱली़टे च्योक्रे चीवालाक हीनाः हेक्या ढाङपो हो़क। 9 हेक्याला केटाक मेगीन चीनाः, हेक्या केटाक्क्षे हो़क। धेनी हेक्या छीवे खारु ॱलेप हो़नाः, हेक्या सो़न्पोराङ हो़क। धेनी ङेपा फोक हो़नाः, ॱरोक ॱमास्योरहो़क। 10 धेनी हेक्या सेम क्यो़ हो़नाः, च्योई घाटोगी खाङहो़क धेनी उटे हो़नाः, माङक्षेला क्षुक्पु शो़ थुक हो़क। धेनी घीया मेगीन च्योक्रे हो़नाः, हेक्याला घीरी हो़क। 11 कोरीन्थुपाक्याओ, हीकी खेक्याला खा साङा झ्येरी ॱनेहो़क धेनी हीकी सेम खीकी क्षीदु ग्याक्षे शो़हो़क। 12 खेक्याई क्षीदु हीकी झाम्पा नी ङ्युङदु ॱमाता हो़क, ॱयोल्ले हेक्याई क्षीदु खीकी झाम्पागो ङ्युङदु सोदुक। 13 धा दी छापला ङा खेक्याला राङगी टुवा च्योक्रे झ्येरी ॱनाहीन, खेक्याः खेरी सेम ग्याक्षेरु तोङ। को़न्क्षोकगी क्षो़खाङ 14 धेपा मीझ्यीगीनक्यामुला ॱङ्यास्यीङ ॱमाखुर। घीझ्येरी ॱनाना ढाङाक्याई मुला मेढाङाक्याई, ढेवा घी हो़तालाक से? याङना मी़नाकमुला हो़गी ढेवा घी हो़तालाक से? 15 मास्यीका धाङ धी़ बेलीयार थी़न थुक्वाले? धेपा झ्यीगीनक्याई धेपा मीझ्यीगीनक्यामुला ढेवा घी हो़ताले? 16 को़न्क्षोकगी क्षो़खाङ धाङ ल्हाकुन्डाक्या ढेवा घी हो़ताले? घीझ्येरी ॱनाना होराङ कुसो़न्पो को़न्क्षोकगी क्षो़खाङ लाक, होझ्येरी को़न्क्षोकगी देरे सुङ हो़तालाक, “ङा खुङक्याई घुङदु ॱनेयेहीन धेनी खुङक्यामुला ग्युक्येहीन। धेनी ङा खुङक्याई को़न्क्षोक झ्युङयेहीन, धेनी खुङक्या ङी मीग्यु झ्युङगीलाक।” 17 होझ्येरी चोवोगी सुवालाक, “खुङक्याई घुङने थो़न्दी स्योक, धेनी खुङक्याने खेक्या खा ढो, ॱमेचाङा घीया माजु, धेनी ङा खेक्याला खेलेन झ्यीयेहीन।” 18 धेनी “ङा नी खेक्याई याप झ्युङयेहीन, धेनी खेक्या ङी भु धाङ भोमो झ्युङगीलाक, सुरी कुवाङ को़न्क्षोकगी सुङी।” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.