२ कोरीन्थुपा 5 - ॱलोवा1 घीझ्येरी ॱनाना होरी ली़ नी, दे जीक्तेनदु ॱनेसा घुर च्योक्रे लाक। धेनी घुर दे स्यीक्ना, होरी क्षीदु मीगी लाक्पी शो़सा मेन्दा हीना नाम्खे श्यीङखामदु धी़ तेन्दु ॱनेगीन खाङबा, को़न्क्षोकगी ॱनाङ हो़तालाक ॱनेरी होराङ स्येलालाक। 2 धेनी दे जीक्तेनगी ॱनेसारु होराङ थाङ क्षेदी, नाम्खे श्यीङखामगी खाङबागी होराङला घो़ च्योक्रे काप्येला, होराङ ॱमीच्यीकी दो़पा झ्यीदालाक। 3 घीझ्येरी ॱनाना होदे घो़न्दी होराङ ॱमाराङा हुङगीमालाक। 4 धेनी होराङ दे घुर नाङदु हो़ताराङ, दुङागी खारी थाङ क्षेदालाक। दे होराङ ॱमाराङा धेयेगी क्षीदु मेन्दा, देले ल्हाक नाम्खे श्यीङखामगी ॱनेसागी घो़ घो़न्येगी क्षीदु लाक। धेनी मेताला डोये हीन्गीनगो, छेसोकगी नाङ छी़दास्योक ॱनेरी लाक। 5 धेनी होराङला दे राङगी क्षीदु डाढीक जेगीनगो को़न्क्षोक लाक। धेनी खोङ राङगी होराङला गेलेनगी क्षीदु धाम्पे थुक्ङी ॱनाङा जेपालाक। 6 होझ्येरी हेक्याला च्योई यीच्चे तेन्पो हो़क। धेनी दे ली़ नाङदु ॱनेगीन थुक्पे, होराङ चोवोने थाक्रीङा हो़तालाक ॱनेरी होराङला स्येये हो़तालाक। 7 घीझ्येरी ॱनाना हेक्या थोङगीनला तेन्ती मेन्दा, धेपागी गोने मीछे क्यालालाक। 8 हेक्याला यीच्चे तेन्पो हो़क धेनी ली़ने खा डारी चोवोमुला ॱनेयेगो, हेक्या दो़दीहो़क। 9 होझ्येरी हेक्या ली़ला हो़ना याङना खा ढाना, खोङबाला थुक घेरु च्युक्येगोराङ हीकी ॱमीक्यु लाक। 10 घीझ्येरी ॱनाना होराङ घीरी मास्यीकागी ठीम्चो़गी, श्युक्ठी दोङदु लाङ घोगुलाक। देरे झ्येरी ली़ दे नाङ हो़ताराङ, शाङा याङना ङेन्पा घी झ्यीगीनगोला तेन्ती, होदेगी ढेबुगो होराङ रे-रेला थोप्कीलाक। थी़न्ढीलगी श्याप्तोक 11 चोवोला कुरती झ्यीयेगो हेक्याई स्येगीन झ्येरी, हेक्या मी श्येम्माक्याला च्याक ग्यावीहो़क। हेक्या घारे हो़गीनगो को़न्क्षोकगी खेन्दा जेदालाक धेनी खेक्याई सेम्बा नाङदुवाः, हेक्याला ङोस्येगीनगो हेक्या दो़दीहो़क। 12 हेक्या याङ खेक्याई दोङदु राङला तो़टा झ्यीदामेन हीना सेम नाङगी दो़नला मेन्दा, फीदी दो़नला ङोम्सो झ्यीगीन च्योक्रे, मीक्याला खेक्याई लेन तेर थुक्वास्योक ॱनेरी, खेक्याला हीकी खाला ङोम्सो झ्यीयेगी घुकाप हेक्या तेराहीन। 13 धा हेक्या रीक्पा मीशीम्गीन च्योक्रे हीन्ना, दे नी को़न्क्षोकगी क्षीदु लाक धेनी हेक्या रीक्पा शीम्दी धेहो़ना, होदे खेक्याई क्षीदु लाक। 14 घीझ्येरी ॱनाना मास्यीकागी झाम्पागी हेक्याला वाङग्युर जेदालाक। धेनी मी च्यीक घीरीगी दो़न्दु ढोङगीन झ्येरी, घीरी ढोवालाक ॱनेरी हेक्या तेन्देन हो़क। 15 धेनी खोङबा घीरीगी क्षीदु ढोङा जेपालाक। धा सो़न्पो ॱनेगीनक्या राङगी क्षीदु मेन्दा, खुङक्याई क्षीदु ढोङा जेगीन धाङ ॱलार सो़न्पो श्याङा जेगीन, खोङ मास्यीकागी क्षीदु सो़न्पो ॱनेघो़। 16 होझ्येरी देने ॱहाला हेक्या सुलाः मीगी तादाङने ॱमेता। एम्मा मास्यीकाला हेक्याई मीगी तादाङने तेवालाक। धा देने ॱहाला, हेक्या खोङला हुरेझ्येरी ॱमेता। 17 होझ्येरी मास्यीकागी नाङ हो़गीनगो नी को़पा साबा लाक। ॱङीङबा नी मेताला सोदुक, धा तो़दाङ साबागो गो चुक्दुक। 18 दे घीरी को़न्क्षोकने झ्युवालाक। धेनी खोङबागी होराङला मास्यीकागी थोक्ने, राङमुला दुमा जेपालाक धेनी थी़न्ढीलगी श्याप्तोक ॱनावालाक। 19 होदे नी, मास्यीकाई थोक्ने, को़न्क्षोकगी जीक्तेन देला राङमुला दुमा जेदी हो़तालाक। धेनी मीक्याई धीक्पागी क्यो़नक्याई ची मेश्या, थी़न्ढीलगी ताम्शाङगो होराङला ॱनावालाक। 20 होझ्येरी हेक्या मास्यीकागी कुछापक्या लाक धेनी को़न्क्षोकगी हेक्याई थोक्ने, मीक्याला कुला जेदालाक। हेक्या मास्यीकागी छाप्ने खेक्याला को़न्क्षोकमुला दुमा झ्यी ॱनेरी, श्योवा पुलाहीन। 21 घीझ्येरी ॱनाना मास्यीकागी गोने, होराङ को़न्क्षोकगी डुङदु ढाङपो चीयेगी क्षीदु, धीक्पा मेगीन मास्यीकाला होरी क्षीदु धीक्चेन जेपालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.