२ कोरीन्थुपा 4 - ॱलोवाताम्शाङगी हो़ 1 होझ्येरी को़न्क्षोकगी ॱङीङजेगी गोने, हेक्याला दे श्याप्ची दे थोप्ती हेक्या सेमस्युक ॱमेक्षाक। 2 हीना हेक्याई साङवा धाङ ङोछागीन लेगा घीरी पा हो़क। धेनी हेक्या ॱली़टे धाङ को़न्क्षोकगी काला ॱयो़येगी लेगाक्या मीझ्यीहो़क। हीना को़न्क्षोकगी ॱमीक्वादु मी घीरीगी स्येशाङला, हेक्या मी घा हीन्गीनगो तो़न्येला, हेक्या धेन्पे कागो सावो झ्येरी सेटाक झ्यीदीहो़क। 3 याङ हीकी स्येगीन ताम्शाङगो काप हो़ना, होदे नी मेताला डुगीनक्याई क्षीदु च्यीगा काप हो़तालाक। 4 खुङक्याई कोरला स्ये घोना, को़न्क्षोकगी ॱयीप हीन्गीन मास्यीकागी, शीजेगी ताम्शाङगो खुङक्याला थोङदु ॱमीच्युक्येला, दे जीक्तेनगी ल्हागी धेपा मीझ्यीगीनक्याई सेम श्याराक्या लेमो ॱमेथोङगीन शो़ हो़तालाक। 5 घीझ्येरी ॱनाना हेक्या राङगी कोरला मेन्दा, हीना हेक्या येशुगी क्षीदु खेक्याई श्याप्चीपा झ्युरी, येशु मास्यीकाराङ चोवो हीन ॱनेरी सेटाक झ्यीदाहीन। 6 येशु मास्यीकागी श्यालला ज्यागीन को़न्क्षोकगी शीजेगो होरी स्येलास्योक ॱनेरी, “मी़नाक नाङ हो़ झ्युङास्योक” सुरी सुङगीन, होरी को़न्क्षोकगी हो़ दे, होरी सेम नाङदु स्यारतु जेपालाक। 7 हीना पाक्तु मेगीन नी़थुगो हेक्याई मेन्दा, को़न्क्षोकगी लाक ॱनेरी तो़न्येगी क्षीदु, होदे तेर दे होरी जामागी ॱनो़ नाङदु हो़तालाक। 8 छोक घीरीने हेक्याला ॱनेम हो़तालाक हीना हेक्या ॱमाचीर हो़क। धेनी हेक्या थोम्दी धेहो़क हीना सेमस्युक छाक्ती माधेहो़क। 9 हेक्याला दुक्जोङ फोक हो़क हीना पाङपा मेक धेनी हेक्याला दुङदाक फोक हो़ना, हेक्या मेताला ॱमासोहो़क। 10 धेनी येशुगी छेसोक हीकी ली़ला ॱङो़न्दास्योक ॱनेरी, हेक्या च्योई खोङबागी छीवागो हेरी ली़ला खेरती ग्युक्यीहो़क। 11 घीझ्येरी ॱनाना येशुगी छेसोक, होरी छीवाला डोये हीन्गीन ली़ला ॱङो़न्दास्योक ॱनेरी, होराङ सो़न्पो हो़गीनक्या च्योई येशुगी क्षीदु छीवे खाला छी़दालाक। 12 होझ्येरी छीवागी हीकी मीछेला लेगा झ्यीदालाक हीना छे नी, खेक्याई मीछेला लेगा झ्यीदालाक। 13 सुङरापला देरे ढीक्टा “ङी धेपा झ्येवी होझ्येरी ङी लाब तावी।” सुरी सुङगीन, धेपागी थुक्ङी च्यीक्पागो हीकी नाङ हो़गीन झ्येरी हेक्याः धेपा झ्यीदीहो़क। होझ्येरी हेक्या लाब ताङाहीन। 14 घीझ्येरी ॱनाना चोवो येशुला कुसो़न्पो श्याङा जेगीन, खोङबागी हेक्याला येशुमुला सो़न्पो जेगीलाक धेनी हेक्याला खीकीमुला खोङबागी डुङदु ठीया जेदालाक ॱनेरी, हेला स्येयेहो़क। 15 घीझ्येरी ॱनाना देक्या घीरी खेक्याला फेन्येगी क्षीदु लाक। धेनी दे नी थुक्जेगो मी माङाचारु फेरी डोवाराङ, को़न्क्षोकगी शीजे हुङयेला काटीन्क्षे श्युयेगोवा फेयेगी क्षीदु लाक। धेपागी गोने मीछे क्याये 16 होझ्येरी हेक्या सेमस्युक छाक्ती मेधेहो़क। हीकी फीदी ली़ ङ्याम्दी डोनाः, हीकी सेम्ङी नी श्याक्मो डाई साबा झ्युरी डोवालाक। 17 घीझ्येरी ॱनाना युन तुङागी दुक्पो याङा दी, हेक्याई क्षीदु दुरये मेगीन, थामेपे शीजेगो डाढीक झ्यीदी हो़तालाक। 18 होझ्येरी हेक्या थोङगीनक्याला मेन्दा, ॱमेथोङगीन दो़नक्याला तीहो़क, घीझ्येरी ॱनाना थोङगीनक्या नी, ॱनेकापगी क्षीदु लाक हीना ॱमेथोङगीनगो नी थामेपे क्षीदु लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.