२ कोरीन्थुपा 3 - ॱलोवा1 धा हेक्या याङ राङगी तो़टा ताङये गो चुक्ये? धेनी मी श्येम्माक्या च्योक्रे हेक्यालाः, खेक्याचारु याङना खेक्याने ङोटो़गी यीगी घोगुलाक से? 2 खेक्याराङ हीकी सेम नाङला ढीक्ती श्याकश्या, मी घीरीगी ॱहाघोर थुक्कीन धाङ ढोक थुक्कीन यीक लाक। 3 धेनी खेक्या नी हीकी श्याप्ची श्युगीनगी ढेबु हीन्गीन, मास्यीकागी ढीया जेजा यीक लाक। दे यीक नी, ॱनाक्चागी ढीक्टा मालाक हीना कुसो़न्पो श्युक्कीन को़न्क्षोकगी थुक्ङीने ढीक्टालाक। धेनी धोलेप खाला ढीक्टा मेन्दा, मीगी सेम नाङदु ढीक्टा यीक लाक। 4 मास्यीकागी थोक्ने, को़न्क्षोकगी खाला हीकी यीच्चे देरे तेन्पो हो़क। 5 हीकी लेगा घारे च्यीक झ्येहो़ना, होदे राङगी जो़न्दाङने हीन ॱनेरी मेसाम्हो़क हीना हीकी जो़न्दाङ नी, को़न्क्षोकने झ्युङालाक। 6 खोङबागी हेक्याला धाम्चा साबागी श्याप्तोक्पा झ्युङयेला, ज्यो़न्पो जेजुङ। धेनी दे नी, यीगी थोक्ने मेन्दा हीना धाम्पे थुक्ङीगी थोक्ने लाक घीझ्येरी ॱनाना ढीक्टा क्षो़ठीमगी मीला छीवागी छेपा कालालाक हीना धाम्पे थुक्ङीगी छे ॱनाङालाक। धाम्चा साबागी शीजेगी कोर 7 धा धोलेप खाला को़का छीवाला कागीन क्षो़ठीमगो शीजेला फेप्ती, होदे शीजे दे येरी डुगीन हीन्ना, ॱमीच्यीकी ठाछाई झ्येरी, ईस्राएल्पाक्याई मोशेगी ङोरोङला तेरी धेक ॱमाथुक्पालाक। 8 धा हुरे हीन्ना धाम्पे थुक्ङीगी क्षाक्लेगो, क्षो़ठीम ले ल्हाक शीजेक्षे मेयोङगीले? 9 घीझ्येरी ॱनाना छेपा कागीन क्षो़ठीमगो शीजेक्षे हो़ना, ढाङतेन जेगीन ताम्शाङगो ॱयोल्ले माङा शीजेक्षे हुङघो़। 10 घीझ्येरी ॱनाना एम्मा शीजेक्षे झ्युङ हो़गीनगोला, धान्दागी शीजे ॱमीच्यीकी क्षे झ्युरी, होदे शीजे ॱङीङबागो येवालाक। 11 धेनी येरी डुगीनगो शीजेगी थोक्ने होवा हीन्ना, तेन्दु ॱनेगीनगो धोराङा ल्हाक शीजेक्षे हुङ घो़गुलाक। 12 हीकी रेवा देरे हो़गीन झ्येरी, हेक्या ॱमीच्यीकी ॱलोगोक क्षे झ्येरी ॱनीहो़क। 13 ईस्राएल्पाक्याला येरी डुगीन शीजेगी थागो तारु ॱमीच्युक्येगी क्षीदु, मोशेगी राङगी ङोरोङ दोङकेपगी काप्कीन च्योक्रे, हेक्या खो च्योक्रे मालाक। 14 हीना खुङक्याई सेम ग्योङा झ्युवालाक घीझ्येरी ॱनाना धीरीङ ङीमा थुक्पे, खुङक्या धाम्चा ॱङीङबागो ढोक्वाराङ, होदे रेगो काप्ती धेतालाक। घीझ्येरी ॱनाना मास्यीकागी थोक्ने च्यीगा होदे स्यु थुक्वालाक। 15 धीरीङगी ङीमा थुक्पे, खुङक्या मोशेगी क्षो़ठीमक्या ढोक्वाराङ, राङगी सेमक्या रेगी काबालाक। 16 हीना चोवो स्योकला सेम ग्युरकीनक्याई, सेम काप्कागो स्युवा जेगीलाक। 17 धा चोवो नी थुक्ङी लाक धेनी चोवोगी थुक्ङी घारु श्युक्यी होदुरु राङवाङ हुङालाक। 18 धेनी होराङ दोङकेप स्युस्याक्याई चोवोगी शीजेला मेलोङ च्योक्रे तो़न्दालाक धेनी शीजे देले ल्हाक शीजे क्षेला, होराङक्या खोङबा च्योक्रे झ्युङयेला ग्युरती डोवालाक। शीजे दे नी, थुक्ङी हीन्गीन चोवोने हुङालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.