२ कोरीन्थुपा 2 - ॱलोवा1 खेक्याला धाब्ले सेम क्योरु ॱमीच्युक्येगी क्षीदु, ङा याङ खेक्याचारु मेयोङयेगी थाक च्येबी। 2 घीझ्येरी ॱनाना खेक्याई सेम क्योरु च्युक्ना, ङी सेम क्योरु च्युक्चा, खेक्याई माना श्येम्मा सी़ ङाला घारु च्युक्ये? 3 ङा खेक्याचारु हुङी घाङला, ङी सेम घारु च्युक घोये हीन्गीन, खेक्याई ङी सेम क्योरु ॱमीच्युक्येगी क्षीदु, ङी होदे लाबक्या ढीक्पी। धेनी ङी घाटो नी, खेक्या घीरीगी घाटो झ्युङगीलाक ॱनेरी, खेक्या घीरी खाला ङी यीच्चे तेन्पो हो़क। 4 ङी सेम ॱमीच्यीकी क्योरी दुङा झ्येरी क्षीमाक तारी, ङी खेक्याला होदे यीक दे ढीक्पाहीन। धेनी दे नी, खेक्याई सेम क्योरु च्युक्येगी क्षीदु मेन्दा, हीना ङी खेक्याला ॱमीच्यीकी चेवा झ्यीगीनगो, खेक्याई ॱहाघोरयेगी क्षीदु ढीक्पाहीन। धीक्चेनला घोयाङ ताङयेगी कोर 5 धा मी च्यीकगी सेम क्योरु च्युक हो़ना, खी़ ङी सेम क्योरु च्युक्पामालाक हीना च्ये च्यीक हीन्ना, खेक्या घीरीगी सेम क्योरु च्युक्पालाक। धेनी ङा देले ल्हाक पारती ॱमेना। 6 खेक्याने माङक्षेगी थोक्ने, खोला फोक्पा छेपागो ढीक्येदुक। 7 होझ्येरी खो ॱमीच्यीकी सेम क्योरी ॱमेफाम्येगी क्षीला, खेक्याई खोला घोयाङ तेरती सेम्सो पारघो़। 8 होझ्येरी खेक्याई होदे मीला झाम्पा झ्यीगीनगो सावो तो़न ॱनेरी, ङा खेक्याला कुलाहीन। 9 खेक्याला ताक्चा झ्यीये धाङ ॱनेछु घीरीला, खेक्या ङी खाला ङेन्दी-मेङेन्दी ॱनेरी छो़ झ्यीये, ङी खेक्याला यीक ढीक्पी। 10 खेक्याई सुला घोयाङ तेरी, ङाः होदेला घोयाङ तेराहीन। धेनी लाब घारे च्यीक हीन्ना, ङी घोयाङ तेर हो़ना, होदे ङी खेक्याई क्षीदुराङ मास्यीकागी डुङदु घोयाङ तेरपी। 11 दे नी, धी़ सातानगी होराङला गोकोर ॱमेताङयेगी क्षीदु झ्येवालाक। घीझ्येरी ॱनाना खी़ झ्यी़क्याई कोरला, होराङगी ॱमेस्येगीन मालाक। धाम्चा साबागी श्याप्तोक्पाक्या 12 धा मास्यीकागी ताम्शाङ स्येयेला, ङा टोरोआसरु ॱलेवाराङ, चोवोगी ङी क्षीदु घुकाप च्यीक ॱनाङा जेसोङ, 13 हीना होदुरु ङी पी़न तीतोसला ॱमाथुक्पा, ङी सेम कीदा माझ्युजुङ। होझ्येरी ङा खुङक्याने घोङपा श्यी़री, माकेडोनीयारु सोवी। 14 हीना मास्यीकागी नाङ होराङला च्योई ग्याखा थोप्येगी क्षीदु, ठीया जेगीन धाङ खोङबाला ङोस्येगीनगी ढीशाङगो, होरी थोक्ने छोक घीरीदु ख्याबा जेगीन, खोङ को़न्क्षोकला काटीन्क्षे श्यी़। 15 घीझ्येरी ॱनाना थारपा थोप्ये हीन्गीन धाङ मेताला डोये हीन्गीनक्याई खोक्दु, होराङक्या को़न्क्षोकगी क्षीदु मास्यीकागी ढीशाङ च्यीक लाक। 16 ढीशाङ दे च्यीकगी क्षीला छीवे ढीमा ङेन्पा धाङ श्येम्मागी क्षीला छेगी ढीशाङ लाक। धा देरे लेगा सी़ झ्यी थुक्वाले? 17 घीझ्येरी ॱनाना मी माङक्षे च्योक्रे, हेक्या को़न्क्षोकगी का राङला खेब्साङ हुङयेगी क्षीदु ॱमेस्येहो़क। हीना को़न्क्षोकगी ॱङाक जेजा मी ढाङपोक्या च्योक्रे, हेक्या को़न्क्षोकगी डुङदु मास्यीकागी नाङ ताम्शाङ स्येदाहीन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.