२ कोरीन्थुपा 13 - ॱलोवाथामे ङेन्ता 1 धा थेङ सुम्बा, ङा खेक्याचारु हुङयेहीन। क्यो़न्जुक घारे हीन्ना, पाङपो ॱङी याङना सुमगी गोने खुङ क्याघोगुलाक। 2 थेङ ॱङीवागोला ङा खीकी घुङदु हो़ताराङ, ङी खेक्याला ङेन्ता ताता च्योक्रे, धा ङा खीकी घुङदु मेती घाङलाः, ङा खेक्याला धान्दा ङेन्ता तेराहीन। ङा धाब्ले हुङाराङ, एम्मा खे धीक्पा झ्यीगीनक्या धाङ श्येम्मा सुलाः ङा शो़पा मीझ्यी। 3 घीझ्येरी ॱनाना मास्यीकागी ङी थोक्ने, कामो़न सुङगीनगी पाङपोगो खेक्या चालालाक। धेनी खीकीमुला ढेवा जेदाराङ खोङबा क्योवा मेतालाक हीना खीकी घुङदु खोङबा स्युक्क्षे हो़तालाक। 4 घीझ्येरी ॱनाना खोङबा क्योवा हो़ताराङ ग्याङस्यीङला क्याङबालाक हीना को़न्क्षोकगी नी़थुगी थोक्ने, खोङबा सो़न्पालाक। देरेराङ झ्येरी हेक्या खोङबागी नाङ क्योवा हो़क हीना खीकीमुला ढेवा झ्यीयेला, हेक्या को़न्क्षोकगी नी़थुगी थोक्ने, हेक्या खोङबा मुलाराङ सो़न्पो ॱनेगीलाक। 5 राङगी धेपाला खेक्या ॱनेदुई याङना मीदुई ॱनेरी, राङला ताक्चा झ्यी। राङला छो़ता झ्यी। छो़ताला ॱमेथारना, येशु मास्यीका खीकी नाङ ॱनेगीनगो खेक्याई स्येघु मालाक से? 6 धेनी हेक्या ॱमेथारकीनगो खीकी स्येगीलाक ॱनेरी, ङी रेवा हो़क। 7 खेक्याई लेगा ङेन्पा घीया मीझ्यीदास्योक ॱनेरी, हेक्या को़न्क्षोकला ॱमो़लाम श्यी़हो़क। दे नी हेक्या छो़ताने थारथा च्योक्रे, थोङयेगी क्षीदु मालाक हीना हेक्या छो़ताला ॱमेथारकीनगो थोङनाः, खेक्याई शाङा घी हीन्गीनगो झ्यीदास्योक ॱनेरी लाक। 8 घीझ्येरी ॱनाना धेन्पाला गारी, हेक्या घीया झ्यी ॱमीथुक्वालाक हीना धेन्पागी क्षीदु च्यीगा झ्यी थुक्वालाक। 9 धेनी हेक्या क्योवा झ्युङाराङ हीना खेक्या स्युक्क्षे झ्युङाराङ, हेक्या ङ्यामो घी हो़क। धेनी खीकी यारकेगी क्षीदु हेक्या ॱमो़लाम ग्यावीहो़क। 10 चोवोगी ङाला ॱनाङना आङजा दे, ङा खीकीचारु हुङाराङ चुक्वा झ्येरी भेचो़ झ्यी मेघोयेगी क्षीला, ङा खेक्या घुङदु मेताराङ, दे लाबक्या ढीयाहीन। आङ दे नी खेक्याला तोरयेला मेन्दा, खेक्याला यारके ताङयेगी क्षीदु ङाला ॱनावालाक। थामे छाम्डी 11 थाला पी़नक्याओ, टास्यीवा स्योक। फी़न्सुम छोक्पा झ्युङयेगी क्षीदु ॱमीक्यु श्योक। धेनी च्यीकगी च्यीकला सेम्सो पोर। फी़न्सुममुला थी़न्दी सोङ। धेनी श्यीदेला धो़क। धेनी झाम्पा धाङ श्यीदेगी को़न्क्षोक, खीकीमुला श्युक्कीलाक। 12 च्यीकगी च्यीकला धाम्पे ओगी छाम्डी श्यी़। 13 धाम्पे मी घीरीगी खेक्याला छाम्डी श्यी़क। 14 चोवो येशु मास्यीकागी थुक्जे धाङ को़न्क्षोकगी झाम्पा धाङ धाम्पे थुक्ङीगी ङ्याम्ढेल, खेक्या घीरीमुला हुङास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.