२ कोरीन्थुपा 12 - ॱलोवापाउलुगी थोङनाङ धाङ खी़ छेम्मागी कोरला 1 ङी ङोम्सो झ्यीराङ घोगुलाक। देने ङाला फेन्ये घीया मेना, चोवोने थोप्था थोङनाङक्या धाङ साल्तो़नक्याई कोरला ङा स्येयेहीन। 2 लो च्युपश्यी एन्ला नाम्खे श्यीङखाम सुम्बारु ठीक्ठा, मास्यीकाला धेपा झ्यीगीन मी च्यीक ङी ङोस्येलीहो़क। खो ली़ला याङना सेम्ङीला ठीक्कीनगो, ङी मेस्येहो़क हीना को़न्क्षोक खेन जेदालाक। 3 होदे मीगो नाम्खे श्यीङखामला ठीक्कीनगो, ङाला स्येयेहो़क हीना ली़ला याङना सेम्ङीला हीन्गीनगो, ङाला स्येयेमेक। होदे को़न्क्षोकगी खेन जेदालाक। 4 धेनी होदुरु खी़ छीकला तो़न ॱमीथुक्कीन लाबक्या घोरपालाक धेनी होदे नी, मी सी़या ॱना मेछोक्वालाक। 5 होदे मीगी क्षीला ङा ङोम्सो झ्यीदाहीन हीना ङाराङगी क्षीदु ङा ङारी क्योवाक्याई कोरला माना, श्येम्माला ङोम्सो झ्यीयेमेन। 6 ङा ङोम्सोराङ झ्यीङी दो़हो़ना, ङा कुक्पा झ्युङगीमालाक घीझ्येरी ॱनाना ङी धेन्पागो राङ स्येगीलाक। हीना मी सी़या ङी नाङ थोङगीन धाङ ङाने घोरकीनने ल्हाक ङाला ॱमासामास्योक ॱनेरी, ङा ङोम्सो झ्यीयेने राङला काईहो़क। 7 ङाला ॱङो़न्गीन साल्तो़नगो ग्याक्षे झ्येरी, ङा राङला ॱमीच्यीकी क्षे ॱमाचीवास्योक ॱनेरी, ङी ली़ला छेम्मा च्यीक ॱनाङसोङ। धेनी दे नी ङाला दुक्पु ताङयेला, धी़ सातानगी भाङछेन च्यीक लाक। 8 दे ङाने डालास्योक ॱनेरी, ङी थेङमा सुम थुक्पे चोवोला श्योवा पुवी। 9 हीना खोङबागी ङाला सुजुङ, “ङी थुक्जे ख्यी़ क्षीदु छाङयेहो़क घीझ्येरी ॱनाना ङी नी़थु नी, क्योवागी नाङला छाङगो झ्युङालाक।” होझ्येरी मास्यीकागी नी़थु ङी नाङदु ॱनेलास्योक ॱनेरी, ङा ङारी थापक्योवागोला ॱयोल्ले घाटो झ्येरी ङोम्सो झ्यीयेहीन। 10 होझ्येरी मास्यीकागी क्षीदु ङा, थापक्योवाक्या धाङ ॱमेबेपक्या धाङ काङेक्या धाङ दुक्जोङक्या धाङ घाक्वाक्या घाङला दो़पा खारी धेतीहो़क। घीझ्येरी ॱनाना ङा क्योवा हो़ताराङ, ङा स्युक्क्षे हो़क। कोरीन्थुपाक्याई क्षीदु पाउलुगी सेम्डा 11 ङा कुक्पा झ्युहो़क। देरे झ्यीयेला खीकी ङाला उजुक झ्यीदु च्युक्जुङ। खेक्याने ङाला तो़टा थोप घोयेहो़क घीझ्येरी ॱनाना ङा घी च्यीया मेन्नाः, खाक्क्षे कुछापक्याने ङा ॱमावा मेन। 12 खेक्याई घुङदु कुछाप ॱङोन्नेगी ताकक्या, ङी शो़पा क्षे झ्येरी ताकक्या धाङ ॱहाङसागीनक्या धाङ नी़थुक्याई लेगाक्याई थोक्ने, तो़न्बालाक। 13 श्येम्मा क्षो़छोकक्याने खेक्याला ङी घीन्गी थोकला ॱमावा चीजो? ङा खीकी क्षीदु घाक्वा माझ्यु। दे नोन्डुगी क्षीदु ङाला घोङपा तेर। 14 धा ङा खीकीचारु थेङमा सुम्बागो, हुङयेला डाढीक हो़क। धेनी ङा खीकी क्षीदु घाक्वा झ्युङयेमेन घीझ्येरी ॱनाना ङा खीकी ग्युनोर मेन्दा, खेक्याला चालाहीन। घीझ्येरी ॱनाना टुवागी फामी क्षीदु मेन्दा, फामागी टुवागी क्षीदु ग्यु साक घोवालाक। 15 धेनी ङा खेक्याई क्षीदु घाटोगी गोने ङाला हो़गीन घीरी धाङ ङा राङ-राङला पुयेहीन। ङी खेक्याला चेवा माङा झ्यीना, ङाला चेवा ङ्युङा थोप्कुलाक से? 16 धेनी ङी खेक्याला घाक्वा माशो़ ॱनेरी, खेक्या क्षा श्यालाक। हीना रीङगाक्याई ङी खेक्याला चाङग्यु झ्येरी, गो कोरपालाक ॱनेरी सामालाक। 17 ङी खेक्याचारु झाजा मीक्याई थोक्ने, खेक्याने खेब्साङ लेन्जे? 18 ङी तीतोसला खीकीचारु डोयेला च्याक ग्याप्ती, खी़मुला पी़न च्यीकला झावी। धा तीतोसगी खेक्याने खेब्साङ रे शेजे? हे ॱङीउ सेम्ङी च्यीक धाङ चो़लाम च्यीकगी गोने माग्युक्जे? 19 धान्दा थुक्पे हेक्या खीकी दोङदु राङगी क्यो़न मेगीनगी कोरला, सेस्ये झ्यीगीनगो खेक्या सामाले? हेक्या नी मास्यीकागी नाङ को़न्क्षोकगी डुङदु ॱनीहो़क। चेवेक्याओ, दे घीरी खेक्याला यारके ताङयेगी क्षीदु लाक। 20 घीझ्येरी ॱनाना ङा हुङाराङ ङी दो़गीन च्योक्रे, खेक्या मेगीन धाङ खीकी दो़गीन च्योक्रे ङा मेगीनगो थुक्टु ॱनेरी, ङा जीक्ई। च्यीक झ्यीना होदुरु धुगा धाङ ठादोक धाङ खोङडो धाङ राङदो़ धाङ ॱमेबेप धाङ ठामा धाङ ङागेल धाङ ॱङ्योक्टाक्या झ्युङहुङ। 21 ङा याङ हुङी घाङला, खीकी घुङदु ङी को़न्क्षोकगी ङाला ॱमावा जेटु ॱनेरी, ङा जीक्ई। धेनी मी माङागी एम्मा झ्येजा धीक्पाक्या धाङ खुङक्याई झ्येजा ॱमेचाङा धाङ लोक्येम धाङ दो़छाकने ग्यो़पा मीझ्यीदा मीग्युरकीनगोला, ङा सेम क्यो घो़टु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.