२ कोरीन्थुपा 11 - ॱलोवापाउलु धाङ कुछाप शोक्पोक्याई कोरला 1 ङी च्यीमे च्यीक ॱलेन्दा झ्यीगीनगोला, खेक्या शो़पा गोम्ना ढीक्येदुक। शो़पा घोम्रो झ्यी ॱनेरी, ङा श्युवाहीन। 2 को़न्क्षोकगी लेमो ङा खेक्याई क्षीदु ठादोक झ्यीदीहो़क घीझ्येरी ॱनाना ख्योवा च्यीक च्यीगा हीन्गीन मास्यीकागी क्षीदु, ङी खेक्याला नाच्युङमा चाङमा च्यीक च्योक्रे ॱनामाला पुयेगो, ङी क्षो़ताम झ्येवी। 3 हीना डुगी राङगी च्याङग्यु थोक्ने हाव्वाला ॱली़गीन च्योक्रे, मास्यीकागी क्षीदु खेक्याई सेम ढाङपो धाङ चाङमे थोक्ने दाम्छीक हो़गीनगोने, खेक्याई साम्लोक्या ॱली़टोङ ॱनेरी, ङा जीई। 4 घीझ्येरी ॱनाना मी रीङगा होरी हीकी सेटाक झ्येजा, येशु मेन्दा श्येम्मा च्यीक सेटाक झ्यीना याङना खेक्याई थोप्था थुक्ङी मेन्दा, सेम्ङी श्येम्मा खेक्याई खेलेन्ना याङना खेक्याला थोप्था ताम्शाङने श्येम्मा ताम्शाङ खेक्याई खेलेन्ना, खेक्या दे घीरीगी होकला लेल्हामोमा छी़दालाक। 5 ङी साम्लोला ङा “चाक्षे कुछापक्या” ने घीन्गी थोक्नेया ॱमास्योक मेक। 6 ङा लाब ताङयेला खेवा मेना, ङाला स्येयो़न ॱमेछाङगीन मेक। धेनी दे दो़न घीरीला हीकी खेक्याला सावो तो़न्होक। 7 ङी राङला ॱमावा शो़री खेक्याला याला क्याक्येला, को़न्क्षोकगी ताम्शाङ रीङ मेलेन्दा स्येदी, ङी धीक्पा झ्येवालाक से? 8 ङी खेक्याला श्याप्तोक पुयेगी क्षीदु क्षो़छोक श्येम्माक्याने श्यान्देप लेन्दी, ङी होदे क्षो़छोकक्याने ठोक्कीन च्योक्रे झ्युजुङ। 9 ङा खेक्यामुला हो़ती घाङला, ङाला खो़चे रे घो़ली घाङला, ङा सी़ क्षीदुवाः घाक्वा माझ्यु घीझ्येरी ॱनाना माकेडोनीयाने होवा पी़नक्याई ङाला घो़गीनगो तेरजुङ। होझ्येरी घीन्गी थोक्ने हीन्ना, खेक्याला काल्ले मेशोयेगी क्षीदु, ङी राङला काक्पी धेनी माउपारला काक्येहीन। 10 धेनी ङी ङोम्सो झ्यीगीन दे मास्यीकागी धेन्पागो, ङी सेम नाङला हो़गीन थुक्पे, आकाईया युछोकदु सी़या काक ॱमीथुक्कीलाक। 11 ङी देरे घीझ्येरी झ्यीदाले? ङी खेक्याला चेवा मेगीन झ्येरी लाक से? ङी खेक्याला चेवा हो़गीनगो को़न्क्षोक खेन्दालाक। 12 हीना ङा धान्दा घी झ्यीगीनगो मी़थुने झ्येरी धेयेहीन। देरे झ्यीना, खुङक्याई लेगागो हीकी लेगा च्योक्रे ढाडा हीन ॱनेरी, ङोम्सो झ्यीयेला घुकाप चागीनक्याला काक्कीलाक। 13 घीझ्येरी ॱनाना देरे मीक्या कुछाप शोक्पोक्या धाङ ॱली़टेगी लेगा झ्यीगीनक्या धाङ मास्यीकागी कुछाप हीन्दोक-दोक झ्यीगीनक्या लाक। 14 धेनी दे ॱहाङसागीन लाब मालाक घीझ्येरी ॱनाना धी़ सातानगीयाः राङला, हो़गी भाङछेन हीन्दोक-दोक झ्यीदालाक। 15 होझ्येरी खी़ ॱयोक्पोक्याई ढाङतेनगी ॱयोक्पोक्या च्योक्रे हीन्दोक-दोक झ्यीना, दे ॱहाङसागीन लाब मालाक। खुङक्याला खोरी लेगा च्योक्रेराङ ढेबु थोप्कीलाक। पाउलुगी काङे 16 ङा याङदा ॱनाहीन, सी़या ङाला ॱलेन्दा ॱमाचीलास्योक। हीना खेक्याई ङाला हुरे सामी हो़ना, ङाः च्यीमे ङोम्सो झ्यीयेला, ङाला ॱलेन्दाराङ चीरी खेलेन झ्यी। 17 ङा देरे ङोम्सो झ्यीयेहीन ॱनागीन दे, चोवोने मेन्दा ङा ॱलेन्दा च्योक्रे लाब ताङाहीन। 18 मी माङक्षेगी जीक्तेनगी लुक्सो़ला तेन्ती राङतो़ झ्यीगीन झ्येरी, ङाः राङतो़ झ्यीयेहीन। 19 खेक्या नी ॱमीच्यीकी खेवा झ्युरी, ॱलेन्दाक्याला ङ्यामो घेरी शो़गोम झ्यीदीक। 20 घीझ्येरी ॱनाना मीक्याई खेक्याला ॱयोक्पो शो़ना याङना खेक्याला हो़गीन घीरी ठोक्ना याङना खेक्याने खेब्साङ लेन्ना याङना खेक्याला ॱङ्याप्चो़ स्येना याङना खीकी डाबाला डाम्चा श्युरनाः, खेक्या शो़पा झ्यीदीक। 21 देरे लेगाक्या झ्यीयेला हेक्या ॱमीच्यीकी थापक्योवा हो़गीनगो, हेरी ङोछागी थोक्ने खेलेन झ्यीदाहीन। घीन्गी थोकला मी सी़ हीना ङोम्सो झ्यीयेगी ॱलोगोक झ्यीना, ङा होदेगी क्षीला ङोम्सो झ्यीयेगी ॱलोगोक झ्यीयेहीन। धा ङा कुक्पा च्योक्रे लाब ताङीहो़क। 22 धा खुङक्या ईब्रीपा ले? ङाः हीन। खुङक्या आब्राहामगी भी़टुक ले? ङाः हीन। 23 खुङक्या मास्यीकागी श्याप्चीपा ले? ङा ॱयोल्ले श्याप्ची शाङा हीन। ङा ॱङ्योम्बा च्योक्रे लाब ताङीहो़क। ङी ॱमीच्यीकी काल्ले ग्याप्पी। ङा चो़न्खाङदु थेङ माङा छी़जुङ। ङाला ताच्याकगी दुङदाक माङा फोक्जुङ। धेनी थेङ माङा ङारी ॱरोक ङेन्काला छी़जुङ। 24 धेनी थेङमा ॱङा थुक्पे ङाला याहुदापाक्याई लाक्पाने, च्यीक माना श्यीपच्यु थुक्पे ताजाकगी दुङदाक फोक्जुङ। 25 थेङमा सुम थुक्पे, ङाला भेक्योकगी दुजुङ। थेङमा च्यीक ङाला धोगोङगी श्युरजुङ। थेङमा सुम थुक्पे ङा श्यो़न्गीन डुशीङगो मेताला लाजुङ। ङीन च्यीक धाङ छेन च्यीकराङ ङा ग्याछोगी घुङला लेजुङ। 26 थेङ माङा डु ग्याई घाङला, ङाला चाङबुक्याई ङेन्का धाङ ज्याक्पाक्याई ङेन्का धाङ ङारी याहुदापा मीक्या धाङ याहुदापा मेन्गीन मीक्याई ङेन्का धाङ ढोङखेरक्याई ङेन्का धाङ रीतोङक्याई ङेन्का धाङ ग्याछोगी ङेन्का धाङ पी़न शोक्पोक्याई ङेन्काक्या ठेजुङ। 27 धेनी ङी काल्ले धाङ दुक्पु ङ्यावी धेनी थेङ माङा ॱङी मेता धेवी, धेनी ङा तोक्ती धाङ कोम्दी थेङ माङा शाये मेताला लेजुङ। धेनी ङा ढाङमो धाङ घोलाक घो़न्ये मेता लेजुङ। 28 धेनी श्येम्मा लाबक्या ॱमेथेला श्याक्मो डाङी, ङाला क्षो़छोक घीरीगी दो़नाङ झ्यीयेगी सेम्डा दुक। 29 क्योवा सु मेयोङा से धेनी ङा क्योवा मीझ्युङये? धीक्पा नाङदु सु ॱमाछी़ दुक से धेनी ङा खोङडो मेलाङये? 30 ङा ङोम्सो झ्यीघो़ना, ङा ङारी थापक्योवा झ्युङगीन दो़नक्याला ङा ङोम्सो झ्यीयेहीन। 31 ङा शोक ॱमेस्येदालाक ॱनेरी, ग्युने ग्युन्दु तो़पा हो़गीन, चोवो येशुगी याप को़न्क्षोकगी खेन्दा जेदालाक। 32 दामासेको ग्याजारु ग्यावु आरेतागी चीख्यापगी, ङाला शीम्येला दामासेको ग्याजागो ॱरुरी श्याक्पालाक। 33 हीना ङाला कोम्बा नाङदु च्युक्ती, च्यारीगी खुङ च्यीकने माला पाप्पालाक धेनी ङा खी़ लाक्पाने थारजुङ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.