२ कोरीन्थुपा 10 - ॱलोवा1 धा ङा पाउलु ङाराङ मास्यीकागी ॱङ्यामच्युङ धाङ झामगी गोने, खेक्याला श्योवा पुलाहीन। खेक्याई दोङदु ङा ॱङ्यामच्युङ धाङ खेक्याने थाक्रीङा हो़ताराङ ॱलोगोक क्षे हो़क। 2 हेक्याला जीक्तेनगी तावा च्योक्रे मीछे क्याली ॱनेरी, दोक्पा झ्यीगीन मीक्याला, ङा खीकीचारु हुङाराङ ङी तो़न्ये ॱनेरी साम्गीन ॱलोगोकगो मीज्यीया तो़न माघोवास्योक ॱनेरी, ङा खेक्याला श्योवा पुलाहीन। 3 घीझ्येरी ॱनाना हेक्या जीक्तेन देला मीछे क्यानाः, जीक्तेन्पे ॱमाक नी ॱमेटावालाक। 4 घीझ्येरी ॱनाना हेक्याई छो़न्छा नी, जीक्तेनगी छो़न्छा मालाक हीना हीकी छो़न्छाला, खारजोङक्या तोरस्यीक ताङ थुक्कीन, को़न्क्षोकगी नी़थु हो़क। 5 को़न्क्षोकगी स्येयो़नला काक्कीन चो़लीङक्या धाङ झ्यी़ङेनक्याला, हेक्या चामेदु ताङाहीन। धेनी साम्लो घीरीला मास्यीकागी काला ङेन्येला वाङ होकदु दुवालाक। 6 धेनी खेक्या मास्यीकागी काला ङेन्गीन छाङगो झ्युसारती, काला मेङेन्गीनक्याला छेपा कायेला, हेक्या डाढीक झ्येरी धेयेहीन। 7 खेक्याई ॱमीकगी दोङदु हो़गीनगोला तो़। धेनी राङला मास्यीकागी हीन्गीनगोला यीच्चे तेन्पो हो़ना, खी़ राङला मास्यीकागी हीन्गीन च्योक्रे हेक्याः मास्यीकागी लाक ॱनेरी, ढेन्सो ॱलाङघो़। 8 घीझ्येरी ॱनाना खेक्याला ॱनो़ क्याये मेन्दा, हीना खेक्याला यारके ताङयेला चोवोगी हेक्याला ॱनाङना आङजागोला, ङी ङोम्सो आरुङ माङा झ्येहो़ना, ङा देला ङोछाये मेन। 9 ङी ढीक्टा यीक देक्याई खेक्याला जीक्टा कुगीनगो ङा मेदो़हो़क। 10 घीझ्येरी ॱनाना “खी़ यीकक्या ॱमीच्यीकी चुवा धाङ स्युक्क्षे दुक हीना ङो ठेदाराङ खो क्योवा दुक धेनी खी़ लाबक्या क्षोमेगीन दुक” ॱनेरी रीङगागी ॱनी। 11 हेक्या होदुरु मेती घाङला, हेरी यीक गोने घी ॱनागीनगो हेक्या हो़ती घाङला, होदे च्योक्रे झ्यीदीहो़क ॱनेरी, हुरे मीक्याई स्येघो़। 12 राङगी तो़टा राङ ताङगीन मी रीङगाक्यामुला, हेक्या हेराङला छे च्यीकला श्याक्ये याङना राङला खुङक्यामुला दुरयेगी ॱलोगोक मीझ्यीहो़क। हीना खुङक्या खोराङक्या नाङदु च्यीकगी च्यीकला छे ग्याराङ याङना दुराराङ, खोराङक्या ॱलेन्दा झ्युङालाक। 13 हीना हेक्या छे ग्याप्कागोने दारी, ङोम्सो मीझ्यी हीना खेक्या चारुराङ ॱलेप थुक्येगी क्षीदु, को़न्क्षोकगी हेक्याला ॱनाङना छे नाङदुराङ हेक्या धेदाहीन। 14 खेक्याचारु ॱलेया ॱमालेप्ला च्योक्रे, हेक्या लाबक्या पारती ङोम्सो मीझ्यीहो़क। घीझ्येरी ॱनाना खेक्याचारु मास्यीकागी ताम्शाङ खेरती हुङगीन धाङस्योकगो हेक्याराङ लाक। 15 हेक्या हेरी छेने दारी, श्येम्माक्याई काल्ले ग्याप्कीनगोला ङोम्सो मीझ्यीहो़क। हीना खेक्याई धेपागो छारती डोवाराङ, खेक्याई खोक्दु हीकी लेगागी छामगो ग्याक्षेरु डोवास्योक ॱनेरी, हीकी रेवा हो़क। 16 धेनी मी श्येम्माक्याई साजारु एन्लाराङ झ्युसासा लेगाला ङोम्सो मीझ्यीदा, हेक्या खेक्याने फीला हो़गीन साजाक्यारु, ताम्शाङ स्येरु डो थुप्कीलाक। 17 धेनी “ङोम्सो झ्यीगीनगी़ चोवोगी नाङ ङोम्सो झ्यीघो़।” 18 घीझ्येरी ॱनाना राङगी तो़टा राङ झ्यीगीनला, चोवोगी खेलेन मेजेदालाक हीना चोवोगी तो़टा जेगीन मीगोला खेलेन जेदालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.