१ तीमोथेउ 6 - ॱलोवा1 को़न्क्षोकगी छेन धाङ होरी ॱलापच्याला कुरवा मीझ्युङयेगी क्षीला, ढेन्योकगी ॱङ्यास्यीङ होकदु हो़गीन हो़लेगी, राङगी दाक्पोला ॱमीच्यीकी कुरती झ्येरी चीघो़। 2 दाक्पोक्या धेपा झ्यीगीन हीन्ना, धेपाला पी़न हीन साम्दी थोङछुङ झ्यीये मेतालाक। हीना खुङक्याई श्याप्चीगी फेन्दोकगो धेपा झ्यीगीनक्या धाङ राङगी चेवेक्याला झ्युङगीलाक साम्दी, खुङक्याई ॱयोल्ले ल्हाक श्याप्ची श्यु घोगुलाक। हुरे झ्यीयेलाराङ ॱलापच्या ग्योप धेनी कु। ॱङुगी दो़क्षाक 3 होरी चोवो येशु मास्यीकाई क्यो़न मेगीन, सुङ धाङ क्षो़सेमला थी़न्गीन ॱलापच्याक्याला खेमेलेन्दा, तावा श्येम्माक्या ॱलाप्ना, 4 खो ङागेलगी खारी घीया ॱमेस्येलालाक। खो फेन ॱमेथोक्कीन लाबला खा थाबालाक धेनी छीक-छीकला शीम्दी धुगा ताङयेगी दो़क्षाक श्यालाक। धेनी देरेक्याई राङ ठादोक धाङ चो़लीङ धाङ ॱमेबेप धाङ दोक्पा ङेन्पा साक्ये 5 धेनी क्षो़सेम नी नोर थोप्येगी थापस्यी लाक, साम्गीन ॱलेपा रुरा धाङ धेन्पाने डागीन मीक्याई खोक्दु ॱमेछेदा ठुक ॱलाङालाक। 6 हीना क्षो़सेम धाङ मुला दो़पा खाङना, होदेराङ फेन क्षे लाक। 7 घीझ्येरी ॱनाना जीक्तेनदु होरी घीया खेरती मायोवालाक धेनी जीक्तेनने होराङ घीया खेर ॱमीथुवालाक। 8 हीना होराङला शाग्यु धाङ घो़नग्यु हो़ना, देलाराङ होराङ दो़पा खाङा झ्यीगुलाक। 9 हीना क्षुक्पु झ्युङये दो़पा झ्यीगीनक्या, ॱली़टे नाङदु छी़गीलाक धेनी ॱङीगी नाङदु छी़गीलाक। ॱलेन्दा धाङ मीला ॱनो़ क्यागीन धाङ मेताला ताङगीन, दो़क्षाक नाङदु छी़गीलाक। 10 घीझ्येरी ॱनाना ॱङुला क्षाक्कीनगो ङेन्पा ॱनाछोक घीरीगी चावा लाक। ॱङुला दो़ङाम झ्यीगीन रीङगा, राङगी धेपा पारी राङगी सेम दुङागी काङदुक। तीमोथेउला पाउलुगी ॱलापच्या 11 हीना को़न्क्षोकगी के-भु ख्यो़, दे घीरीने जेम्दी ढाङतेन धाङ क्षो़सेम धाङ धेपा धाङ झाम्पा धाङ शो़गोम धाङ ज्याम्बो झ्युङयेला चो। 12 होरी धेपागी ॱमाक शाङपोगो टोप। धेनी पाङपो माङागी दोङदु, ख्यी़ खेलेन शाङपो लेन्ला झ्येरी, थामेपे छेसोकगी क्षीला ख्यो़ भो़वालाक। धेनी देला शीम्दी धो़क। 13 ॱङोपो घीरीला छे ॱनाङगीन, को़न्क्षोक धाङ पोन्तीहु पीलातुगी दोङदु पाङपो शाङपो जेजा मास्यीका येशुगी डुङदु, 14 ङा ख्यो़ला का तेराहीन, चोवो येशु मास्यीका ॱङो़न्सुमदु माज्यागीन थुक्पे, का दे ॱमेवा मेगीन धाङ क्यो़न मेगीन झ्येरी ॱरुङ च्यीक। 15 धेनी झ्यीलाप्चेन धाङ ग्यावुक्याई, ॱलानामेपे ग्यावु धाङ चोवोक्याई चोवोगी धी़चो़ भाप्कीन छो़ला ॱङो़न्दु च्युक्कीलाक। 16 खोङबा च्यीगा छीवा मेगीन लाक। सुवाः ॱमेथारकीन हो़ नाङदु खोङबा श्युक्वालाक। धेनी खोङबाला सी़या थोङ माङ्युवालाक याङना थोङ थुक्कीलाक। खोङबाला ग्युने ग्युन्दु कुरती धाङ वाङ हुङास्योक। आमेन। 17 दे जीक्तेनगी क्षुक्पुक्याला ङागेल क्षे माझ्युङ धेनी तेन्पो मेगीन ग्युनोरला मेन्दा, होराङला कीदा झ्यीयेला घो़गीन घीरी मेछो़ली ॱनाङगीन, को़न्क्षोक खाला रेवा झ्यीयेला खुङक्याला का तेर। 18 खुङक्याई लेगा शाङा झ्यीये धाङ ले शाङाला क्षुक्पु धेनी झ्यीम्बा ताङयेला घागीन धाङ राङला हो़गीन श्येम्माला घोवास्योक। 19 देरे झ्येरी याङदाक्पा छेला ॱनेयेगी क्षीला राङगी क्षीला, माउपारला ॱमाङस्यी शाङा तीङास्योक। 20 तीमोथेउ ओ, ख्यो़ला च्योगीनगो ॱरुङ च्यीक। धेनी मीक्याई शोक्पो ॱनेरी “स्येराप” साम्गीन क्षो़ला ॱमीथी़न्गीन, लाब धाङ क्षोमेगीन चो़पाक्याने जेम। 21 देरे लाबक्याई स्याबाला डारी रीङगा राङगी धेपाने ङ्याम हो़तालाक। थुक्जे खेक्यामुला हुङास्योक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.