१ तीमोथेउ 5 - ॱलोवायुक्जामाक्याला ॱलोप्तो़न 1 मी घेबोला छीक चुवा ॱमाना हीना राङगी आकी च्योक्रे, चीरी श्यी़भो़ ग्योप। धेनी श्यो़न्पाक्याला नोक्या च्योक्रे, 2 धाङ घेमोक्याला आमाक्या च्योक्रे धेनी नाच्युङमाक्याला नुमोक्या च्योक्रे, सेम चाङमागी गोने चो़पा झ्यी। 3 तातोक झ्यीगीन मेगीन युक्जामाक्याला चीदोङ झ्यी। 4 हीना युक्जामा च्यीकला टुवाक्या धाङ याङना छाउ छामुक्या हो़ना, एन्ला खुङक्याई राङगी नाङमी दो़न्दु क्षो़ला थी़न्गीन चो़पा ज्याङघो़ धेनी राङगी फामे डेन्लेन खोरतु च्युकघो़ घीझ्येरी ॱनाना देलाराङ को़न्क्षोक थुक्ङेउ जेदालाक। 5 तातोक झ्यीगीन मेगीन ॱङोन्ने, युक्जामा धाङ मोरोङमा च्यीगा लेगीनगी, को़न्क्षोकला रेवा श्यालाक धेनी ङीन-छेन रेभो़ श्युलालाक धेनी सोवा ग्यालाक। 6 हीना युक्जामा दे दो़यो़नला क्षाक्ना, मो सो़न्पो झ्येरीया स्यीस्या च्योक्रे लाक। 7 सी़या खुङक्याला क्यो़न्जुक ॱमेकायेगी क्षीला, खुङक्याला दे ॱलापच्याक्या ॱलोप। 8 हीना राङगी पी़न्दाक्या धाङ ॱमीक्से राङगी नाङमीला ॱमेतागीनक्याई, राङगी धेपा पाङालाक धेनी खुङक्या धेपा मीझ्यीगीनक्याने दुक्वालाक। 9 लो ढुकच्यु याला ॱलेप्ला धाङ ख्योवा च्यीकगी केमी झ्युजा युक्जामाला, युक्जामाक्याई थोला चुक। 10 धेनी मी़ टुवाक्या सो़क्योङ झ्येजा धाङ डो़न्बोक्याला झाम्पा झ्येजा धाङ धेपा झ्यीगीन धाम्पा मीक्याई श्याप ठी़ठा धाङ दुक्पु ङ्याङगीनक्याला रोवा झ्येजा धाङ ले शाङा घीरीला दो़नाङ तेरता, देरे ले शाङाक्याई क्षीला मी़ मीङडाक क्षे हुङ घोगुलाक। 11 हीना युक्जामा नाच्युङक्याला थो नाङदु ॱमाचुक घीझ्येरी ॱनाना खुङक्या मास्यीकाने डारी दो़छाकगी वाङदु डोना, ॱनामा लेन्येगी दो़पा झ्यीगीलाक। 12 होझ्येरी एम्मा श्याक्कीन धाम्चाने लोक्ती, खुङक्याला छेपा फोक्कीलाक। 13 देचो़ च्यीगा मेन्दा खुङक्या लेमेलाम्गीन झ्युरी, खीमने खीमदु ख्याम्दी लेमेलाम्गीन च्यीगा मेन्दा, ठामा ग्याप्कीन धाङ झ्यी़दोक झ्यीगीन धाङ ॱनाये मेगीन लाबक्या ॱनागीन झ्युङालाक। 14 होझ्येरी नाच्युङमा युक्जामाक्या ॱनामा लेन्दी टुवा के धेनी नाङ शीम्दी, डाला ॱना चेयेगी घुकाप ॱमेतेरयेला ङा दो़दीहो़क। 15 घीझ्येरी ॱनाना रीङगा एन्लाराङ धी़क स्योकला यो़सादुक। 16 धेनी धेपा झ्यीगीन केमी च्यीकला युक्जामा पी़न्दाक्या हो़ना, मी़ खुङक्याला तादोक झ्यीघो़ हीना क्षो़छोकला घाक्वा मायोङघो़। धेनी क्षो़छोकगी ॱङोन्ने काङी हो़गीन, युक्जामाक्याला रोवा झ्यीदास्योक। क्षो़छोकगी गेम्पाक्याला कुरती झ्यी 17 क्षो़छोकगी गेम्पा तातोक घा झ्यीगीन धेनी ॱमीक्सेदु क्षो़ स्येये धाङ ॱलापच्या ॱलाप्कीन, लेगाला काल्ले ग्याप्कीन गेम्पाक्याला, कुरती दाप ॱङी थोप घोवालाक। 18 घीझ्येरी ॱनाना सुङराप नाङदु ढीक हो़तालाक, “ॱङीमा च्याक्कीन ॱलुङगी खाला खावो ॱमाकाक” धेनी “लेजेपाक्याला दी ॱला थोप घोवालाक।” 19 पाङपो ॱङी याङना सुम मेगीन थुक्पे, गेम्पा च्यीकला क्यो़न काकागोला ॱमाची। 20 धीक्पा झ्यीगीनक्याला मी घीरीगी, दोङदु आङजी तोङ। देरे झ्यीना श्येम्माक्या जीक्कीलाक। 21 को़न्क्षोक धाङ मास्यीका येशु धाङ दाम्दा नाम्खे भाङछेनक्याई दोङदु, ङा ख्यो़ला दे ठीमक्या ॱयेवा घीन्दा मीझ्यीदा ॱरुङ धेनी छोक्री झ्येरी घीया माझ्यी ॱनेरी, च्याक ग्यावाहीन। 22 क्षो़छोकगी गोठी को़येला छाटाक माझ्यी धेनी श्येम्मागी धीक्पाला माडे। राङ चाङमा धो़क। 23 ख्यो़ थेङ माङा नागीन झ्येरी, ख्यी़ फोवा फेन्येगी क्षीला, क्षु च्यीगा मेन्दा घुन्क्षाङ तीते थुङ। 24 मी रीङगागी धीक्पाक्या ठीम चेयेगी एन्लाराङ, ॱङो़सुमदु सावो थोङालाक हीना श्येम्माक्याई धीक्पाक्या स्याम्ला च्यीका थोङालाक। 25 देरे झ्येरीराङ ले शाङाक्या सावो थोङालाक धेनी ॱङो़न्सुमदु ॱमेथोङगीनक्या बेरी, श्याक ॱमीथुक्कीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.