१ तीमोथेउ 4 - ॱलोवाॱलोपो़न शोक्पोक्याने शाप-शाप झ्यी 1 स्यामगी धी़ला मी रीङगा ॱली़गीन सेम्ङीक्या धाङ डेगी क्षो़ला तेन्दी, राङगी धेपा पाङगीलाक सुरी, धाम्पे थुक्ङीगी सायेरे सुङ हो़तालाक। 2 देरे ॱलापच्याक्या शोक स्येगीनक्याई ॱली़टेने हुङगीलाक। खुङक्याई स्येराप शाङपो, मेच्याकगी ॱराक्रा च्योक्रे हुङालाक। 3 देरे मीक्याई ॱनामा लेन्ये मेतालाक धेनी शामा ॱना रीङगा शाये मेतालाक ॱनेरी ॱनागीलाक। हीना धेपा झ्यीगीनक्या धाङ धेन्पा ॱहाघोकीनक्याई काटीन्क्षे श्यी़री लेन्येला, को़न्क्षोकगी शामा देक्या को़ जेपालाक। 4 घीझ्येरी ॱनाना को़न्क्षोकगी जेजा घीरी शाङपो लाक धेनी काटीन्क्षे श्यी़ना घीया पाङ घोगुमालाक। 5 घीझ्येरी ॱनाना को़न्क्षोकगी का धाङ ॱमो़लामगी होदेला चाङमा जेदालाक। 6 ॱलापच्या देक्या ख्यी़ खेरी पी़नक्याई दोङदु तो़न्ना, ख्यो़ धेपागी का ज्यारी होवा धाङ तावा शाङपोला चीरी होवा, मास्यीका येशुगी श्याप्तोक्पा शाङपो च्यीक झ्युङगीलाक। 7 क्षो़ मेगीन धाङ खुङलुङ मेगीन तामक्याने जेम्दी धो़क हीना क्षो़ झ्यीयेला ज्योङ। 8 घीझ्येरी ॱनाना ली़गी ली़चेल ज्योङदारगी तीते च्यीगा फेन थोवालाक हीना क्षो़सेम दे घीरीगी थोकला फेन थोवालाक। घीझ्येरी ॱनाना देगी धान्दागी छे धाङ छीमागी छे ॱङीगाराला, फेन्दोकगी धाम्चा ॱनाङालाक। 9 दे ताम दे, ॱलो का थुप्कीन धाङ घीरीगी थोक्ने खेलेन झ्यीघोगीन दुक। 10 दो़न देगी क्षीला होराङक्या दुक्पु ङ्यारी काल्ले ग्यालाक। घीझ्येरी ॱनाना होरी रेवा सो़न्पो को़न्क्षोकला ॱनेलालाक। खोङबा नी, मी घीरी धाङ ॱमीक्सेदु धेपा झ्यीगीनक्याई क्याम्गो़न लाक। 11 दे ॱलापच्याक्या ॱलोप धेनी ज्याङयेला का तेर। 12 ख्यो़ श्यो़न्पा झ्येरी, सी़या ख्यो़ला थोङछुङ झ्यीरु ॱमाच्युक हीना धेपा झ्यीगीनक्याई दोङदु, ख्यी़ ङाक धाङ चो़पा धाङ झाम्पा धाङ धेपा धाङ चाङमे गोने राङला पाङपो च्यीक तो़न। 13 ङा मायुङ थुक्पे, ख्यो़ मीछोकक्याला सुङराप ॱलोक्ये धाङ क्षो़ तो़न्ये धाङ ॱलापच्या ॱलाप्येला दो़नाङ झ्यी। 14 क्षो़छोकगी गेम्पाक्याई ख्यी़ खाला लाक्पा श्याक्ती, ॱङो़नस्येखेनगी थोक्ने ख्यो़ला थोप्था ॱनाङज्यीनगोला, ख्यो़ ॱनाङमे माझ्यी। 15 ख्यी़ यारके घीरीगी थोङयेगी क्षीला, दे लाबक्याला लाक्लेन तोङ धेनी देलाराङ ॱनेरे धो़क। 16 ख्यो़राङ धाङ ख्यो़री ॱलापच्याला शाप-शाप झ्येरी धो़क। देलाराङ तेन्पोमा ॱनेरे धो़क। देरे झ्यीना ख्यी़ राङ धाङ ख्यो़ला ङेन्गीन ॱङीगाराला क्योप्कीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.