१ तीमोथेउ 2 - ॱलोवाक्षाक्क्षो़पागी कोरला ॱलापच्या 1-2 धेनी धाङपोगो, ङी मी घीरी धाङ ग्यावुक्या धाङ पो़न्पोक्यागी क्षीला सोवा धाङ ॱमो़लाम धाङ श्योवा धाङ काटीन्क्षे श्यी़ ॱनेरी, कुलाहीन। देरे झ्येरी होराङ क्षोक घीरीने क्षो़सेम्चेन धाङ यारापचेनगी थोक्ने, धेवा धाङ श्यीझामगी मीछे पी़ थुक्कीलाक। 3 दे नी होरी क्याम्गो़न को़न्क्षोकगी चेनङारदु, शाङपो धाङ थुक्ङेउ दुक। 4 खोङबागी थुकोङगो मी घीरी क्योप्ये धाङ धेन्पागी स्येयो़नला हुङये लाक। 5 घीझ्येरी ॱनाना को़न्क्षोक च्यीक हो़तालाक धेनी को़न्क्षोक धाङ मीगी घुङला, भारदुम ताङगीन च्यीक हो़तालाक, खोङ नी मास्यीका येशु, 6 मी घीरीगी ली़रीनगी क्षीला राङला ॱलो़ ताङगीनगो लाक। दे नी, धी़ ताक-ताकला को़न्क्षोकगी ॱनाङगीन पाङपोगो लाक। 7 देगी क्षीलाराङ, ङा धेपा धाङ धेन्पाला याहुदापा मेन्गीन मीरीकक्याई ॱलो का थुप्कीन ॱलोपो़न, धेनी क्षो़ स्येगीन च्यीक धाङ कुछाप ॱनेरी को़वालाक। (ङा शोक ॱमेस्येदा, धेन्पाराङ ॱनाहीन।) 8 साज्या घीरीदु केवे-फोक्याई श्येताङ धाङ चो़पा ॱमालाङा, लाक्पा चाङमा याला क्याङदी ॱमो़लाम धेप्येला, ङा दो़दीहो़क। 9 होझ्येरीराङ केमीक्याई राङगी ॱरा ल्हेमा ॱनाछोक ल्हेरी, सेर धाङ मुतीक धाङ घोङ क्षे घो़ घो़न्दी मेन्दा, राङला लेन्दा थोङगीन ताप्धे धाङ यारापचेनगी घो़ घो़नघो़। 10 घीझ्येरी ॱनाना क्षो़सेम्चेन हीन ॱनागीन केमीक्याई, ले शाङाक्या झ्यीना लेन्दा हो़तालाक। 11 केमीक्या खाबा धेती खाला ङेन्पो झ्येरी ॱलोप घोगीलाक। 12 केमीक्याला क्षो़ ॱलाप्ये धाङ केवे-फोगी थोकला गोचे झ्यीयेला, ङा आङजा ॱमेतेर। मो खाबा धे घोगीलाक। 13 घीझ्येरी ॱनाना आदाम एन्ला को़री धेनी हाव्वा को़वालाक। 14 धेनी धी़कगी आदामला ॱली़वा मेन्दा भोमोला ॱली़वालाक धेनी भोमोगो धीक्पे नाङदु छी़वालाक। 15 घीहीन्ना केमीक्या ॱङ्यामच्युङा झ्येरी, धेपा धाङ झाम्पा धाङ धाम्पाला ॱनेरी धेना, मो टु केली घाङला क्योप्कीलाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.