१ पेटो 3 - ॱलोवाख्योवा धाङ केमी 1 केमीक्याओ, देरेराङ झ्येरी राङगी ख्योवागी होकला धो़क। धेनी खुङक्याने रीङगागी को़न्क्षोक काला ॱमीचीनाः, खोरी केमीक्याई च्यो़पागी झ्येरी स्ये मेघोलाला, खुङक्याई सेम ग्युरवा थेप थुक्कीलाक। 2 खेरी चो़पा चाङमा धाङ घुस्याप हो़गीनगो, थोरी खुङक्या ग्युर सीगीलाक। 3 टा ल्हेमा ल्हेरी धेनी सेरगी गेन्छाक्या धाङ घो़ पी़मा घो़न्दी, खेरी फीदी शाप्टो मायुङास्योक। 4 हीना खीकी शाप्टो नी, खेरी सेम नाङदु येरी मेडोगीन ज्याबो धाङ खुसीम्पोगी सेम हुङघो़। दे नी, को़न्क्षोकगी ॱमीक्वादु चाक्षे हो़तालाक। 5 घीझ्येरी ॱनाना देरेराङ झ्येरी को़न्क्षोकला रेवा झ्यीगीन एम्मागी धाम्पे केमीक्या, राङगी ख्योवाक्याई होकला धेती राङला जेवा शोवालाक। 6 पेला ताना, सारागी राङगी ख्योवा आब्राहामला चीरी, खोङला राङगी दाक्पो ॱनेरी भो़वालाक। खेक्यागीयाः जीक्नाङ मीझ्यीदा, ले शाङाक्या झ्यीना, खेक्या मी़ भोमोक्या झ्युङालाक। 7 ख्योवाक्याओ, देरेराङ झ्येरी राङगी केमीमुला साम्लो थोङा झ्युरी मीछे क्यो। धेनी को़न्क्षोकगी ॱनाङना मीछेगी थुक्जे नाङला, ख्यी़मुला खुङक्या ग्युज्यीन हीन्गीन झ्येरी, मो रोवा क्योवा च्यीक हीन्ना मोला कुरती झ्यी। धेनी खीकी ॱमो़लामला घीयाः भारचे हुङगीमालाक। लेशाङगी क्षीला दुङा ङ्याङवा 8 थामाला, खेक्या घीरी सेम थी़न्पा धाङ ॱङीङजे धाङ फेन्छुनला झाम्पा धाङ चेसेम धाङ ॱङ्यामच्युङ झ्युङघो़। 9 ङेन्पाला ङेन्पा याङना ॱमेबेप छापला, ॱमेबेपगी लेन ॱमालोक। हीना दी छापला झ्यीलाप तेर घीझ्येरी ॱनाना खेक्याला झ्यीलाप थोप्येगी क्षीलाराङ खेक्या भो़वालाक। 10 घीझ्येरी ॱनाना “राङगी ॱरोकला चेवा झ्यीये, धाङ कीपे ङीमाक्या थोङङी दो़गीनक्याई, राङगी च्येमोला ङेन्पा, धाङ राङगी खाला, गो कोरकीन लाबक्याने ॱरुङघो़। 11 ङेन्पा पाङदी शाङा झ्यीघो़, धेनी श्यीदे चारी होदे स्याम्ला डाघो़, 12 घीझ्येरी ॱनाना चोवोगी चेन ढाङतेनक्याई खाला हुङालाक, धेनी खोङबागी आमच्योकगी खुङक्याई ॱमो़लामला सेन्दालाक, हीना खोङबागी श्याल ङेन्पा झ्यीगीनक्याने ॱलोक्वालाक।” 13 खेक्या शाङा झ्यीयेला सेमस्युक हो़ना, सी़ खेक्याला ॱनो़ क्यागीले? 14 हीना ढाङतेनगी क्षीदु खेक्या दुक्पु ङ्याङघोना, खेक्या झ्यीलाप क्षे लाक। खुङक्याई जीक्टा कुगीनला माजीक, धेनी राङगी सेम ठुक्तु ॱमाच्युक। 15 हीना राङगी सेम नाङने मास्यीकाला, खेरी चोवो चीरी ॱङीङकुर झ्यी। धेनी खेक्याला हो़गीन रेवागी कोरला ढीवा झ्यीगीनक्याला लेन तेरयेला, च्योई डाढीक धो़क। हीना लेन तेरी घाङला ज्याबोमा धेनी घुस्याप धाङ 16 साम्लो ॱनाम्पा दाक्पागी गोने झ्यीघो़। देरे झ्यीना मास्यीका नाङ हो़गीन खीकी च्यो़पा शाङाला ॱमेटा पाप्कीनक्या, राङगी ॱमेटागी राङ ङोछारु च्युक्कीलाक। 17 घीझ्येरी ॱनाना, को़न्क्षोकगी थुकोङ हो़ना, ङेन्पा झ्येरी ङ्याङयेनेः शाङा झ्येरी ङ्याङये दे घागुलाक। 18 घीझ्येरी ॱनाना होराङला को़न्क्षोक डुङदु ठीक्येगी क्षीला, मास्यीकाः होरी धीक्पाक्याई क्षीदु ढोवालाक। ढाङतेनगो मेढाङागी क्षीदु ढोङपालाक। खोङबा ली़ला सेपालाक हीना थुक्ङीगी थोक्ने खोङ कुसो़न्पो जेपालाक। 19 खोङबा थुक्ङी थोक्ने फेप्ती, चो़न्खाङला हो़गीन सेम्ङीक्याला क्षो़ सुङा जेपालाक। 20 खुङक्या नी नोआगी डुशीङ शोगीन धी़ला, को़न्क्षोकगी शो़पा झ्येरी घुक जेगीन घाङला, काला मेङेन्गीन मीक्या लाक। होदे डुशीङ नाङला क्षुलोकने, मी ग्ये माना ॱमाथारपालाक। 21 क्षु दे नी खेक्याला धान्दा क्योप्कीन, ठी़सो़गी ताक लाक। दे नी ली़गी ढीमाक ठुगीन च्योक्रे मालाक हीना साम्लो ॱनाम्पा दाक्पागी क्षीला, को़न्क्षोकगी डुङदु धाम्चा च्यीक लाक। येशु मास्यीका छीवाने कुसो़न्पो ग्युरकीनगी थोक्ने, ठी़सो़गी खेक्याला क्योप्कीलाक। 22 खोङबा नाम्खे श्यीङखामदु फेप्ती धेनी को़न्क्षोकगी क्षाक ॱये स्योकला श्युक हो़तालाक। धेनी नाम्खे भाङछेनक्या धाङ वाङ धाङ नी़थु हो़गीन सेम्ङीक्या, खोङबागी होकला हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.