१ योहान्ना 5 - ॱलोवाको़न्क्षोकगी सेला धेपा 1 येशु नी मास्यीका लाक ॱनेरी, धेपा झ्यीगीन घीरी को़न्क्षोकने केवालाक धेनी यापला चेवा झ्यीगीन घीरीगी, खोङने केक्या टुवाक्यालाः चेवा झ्यीदालाक। 2 होराङ को़न्क्षोकला चेवा झ्ये धेनी खोङगी काक्या ॱरुङना, देनेराङ होराङ को़न्क्षोकगी से धाङ सेमोक्याला चेवा झ्यीगीनगो होरी स्येलालाक। 3 को़न्क्षोकगी काठीम ॱरुङना राङ, खोङला चेवा झ्यीये लाक। धेनी खोङगी काठीमक्या काल्ले घाक्वा मेतालाक। 4 घीझ्येरी ॱनाना को़न्क्षोकने केक्या घीरीगी, जीक्तेन देला ग्यागा थोबालाक। धेनी जीक्तेन दे थारती ग्यागा थोप्थागो, होरी धेपा लाक। 5 जीक्तेन देला ग्यागा थोप्कीन नी सुले? येशुराङ को़न्क्षोकगी से लाक ॱनेरी, धेपा झ्यीगीनगो च्यीगा लाक। 6 खोङबाराङ क्षु धाङ ठाकगी गोने फेप्कीन, येशु मास्यीका लाक। खोङबा क्षुगी गोने च्यीगा मेन्दा, क्षु धाङ ठाक ॱङीगाराने फेप्पालाक। धेनी धेन्पा हीन्गीन धाम्पे थुक्ङीगी खोङला पाङपो जेदालाक। 7 घीझ्येरी ॱनाना पाङपो झ्यीगीन सुम हो़तालाक, 8 धाम्पे थुक्ङीगो धाङ क्षुगो धाङ ठाकगो लाक। धेनी दे सुमगी पाङपो थी़न्दालाक। 9 होराङक्या मीगी पाङपो खे लेन्दालाक हीना को़न्क्षोकगी पाङपो देले ल्हाक क्षे लाक घीझ्येरी ॱनाना को़न्क्षोकगी पाङपो नी, राङगी सेगी कोरला ॱनाङ हो़तालाक। 10 धेनी को़न्क्षोकगी सेला धेपा झ्यीगीन घीरीगी, सेम नाङला पाङपो दे हो़तालाक। धेनी को़न्क्षोकला धेपा मीझ्यीगीनक्याई खोङबाला शोक्पो शो़ हो़तालाक घीझ्येरी ॱनाना को़न्क्षोकगी राङगी सेगी कोरला जेगीन पाङपोला, खुङक्याई धेपा माझ्येवालाक। 11 धेनी पाङपोगो नी, को़न्क्षोकगी होराङला थामेपे छेसोक ॱनाङ हो़तालाक धेनी छे दे खोङगी से नाङ हो़तालाक। 12 से हो़गीनगोला छेसोक हो़तालाक हीना को़न्क्षोकगी से मेगीनगोला छेसोक मेतालाक। थामे ॱलापच्या 13 को़न्क्षोकगी सेगी छेनला धेपा झ्यीगीन, खेक्याला थामेपे छेसोक हो़तालाक ॱनेरी, खेक्याई स्येयेगी क्षीला ङा खेक्याला दे लाबक्या ढीयाहीन। 14 को़न्क्षोकगी थुकोङला तेन्ती, होरी घी श्यी़ना खोङगी होराङला सेन्दालाक ॱनेरी, होराङला खोङगी खाला ॱलोते हो़तालाक। 15 धेनी होरी घी श्यी़ना खोङगी सेन्दालाक ॱनेरी होराङला स्येये हो़ना, होराङला होरी श्यी़गीनगो थोप हो़तालाक ॱनेरीया, होराङला स्येये हो़तालाक। 16 खेरी पी़नगी छीवाला ॱमीठीक्कीन धीक्पा झ्यीगीन थोङना, ख्यी़ खी़ क्षीला ॱमो़लाम ग्याप्घो़ धेनी को़न्क्षोकगी खोला छे ॱनाङगीलाक। छीवाला ॱमीठीक्कीन धीक्पा साक्कीनक्याई कोरला, ङा ॱनाहीन। छीवाला ठीक्कीन धीक्पाक्या हो़तालाक। होदेक्याई क्षीदु, खेक्याई ॱमो़लाम ग्याप्घो़ ॱनेरी ङा ॱनामेन। 17 मेढाङा घीरी धीक्पा लाक धेनी छीवाला ॱमीठीक्कीन धीक्पाक्या हुङालाक। 18 को़न्क्षोकने केक्या हीन्गीनगी धीक्पा झ्यीच्यीक मीझ्यीदालाक ॱनेरी, होराङला स्येये हो़तालाक। को़न्क्षोकने ठुङगीनगी़ खोला क्योप्कीलाक धेनी धी़गी खोला ॱनो़ क्या ॱमीथुक्कीलाक। 19 होराङ को़न्क्षोकने लाक धेनी जीक्तेन घीरी धी़गी वाङ होकला हो़तालाक ॱनेरी, होराङ स्येलालाक। 20 को़न्क्षोकगी से फेप्पालाक धेनी को़न्क्षोक धेन्पा हीन्गीनगोला ङो स्येयेगी क्षीदु खोङगी होराङला स्येयो़न ॱनाङगीनगो, होराङला स्येये हो़तालाक। धेनी खोङगी से येशु मास्यीकागी थोक्ने, होराङ खोङ धेन्पागी नाङ ॱनेलालाक। खोङराङ को़न्क्षोक धेन्पा धाङ थामेपे छेसोकगो लाक। 21 चेवे टुवाक्याओ, ल्हाकुन्डाक्याने जेम्दी धो़क। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.