१ योहान्ना 4 - ॱलोवासेम्ङीक्याई छो़ता झ्यीयेगी कोर 1 ङी चेवेक्याओ, सेम्ङी हो़लेला धेपा माझ्यी हीना होदे सेम्ङीक्या को़न्क्षोकने हीन याङना मेन ॱनेरी, छो़ता झ्यी घीझ्येरी ॱनाना जीक्तेनदु ॱङो़नस्येखेन शोक्पो माङा थो़न्सादुक। 2 येशु मास्यीका कुली़ला फेप्पालाक ॱनेरी, खेलेन झ्यीगीन सेम्ङी घीरी को़न्क्षोकने लाक। दी गोने को़न्क्षोकगी थुक्ङी खेक्याई ङो स्येलालाक। 3 हीना येशुला खेलेन मीझ्यीगीन सेम्ङी घीरी, को़न्क्षोकने मालाक। दे नी मास्यीकागी डा हीन्गीनगी सेम्ङी लाक। सेम्ङी दे हुङगीलाक ॱनेरी, खेक्याई घोरङ्युङ हो़तालाक धेनी धान्दा होदे जीक्तेनदु होसादुक। 4 चेवे टुवाक्याओ, खेक्या को़न्क्षोकने लाक धेनी खुङक्याई खाला ग्यासालाक घीझ्येरी ॱनाना जीक्तेनदु हो़गीनगोनेः, खीकी नाङदु श्युक्कीनगो खाक्क्षे लाक। 5 खुङक्या नी, जीक्तेनने लाक, होझ्येरी जीक्तेनगी राङ लाब ताङालाक धेनी जीक्तेनगी खुङक्याई लाबला ङेन्दालाक। 6 होराङक्या नी, को़न्क्षोकने लाक धेनी को़न्क्षोकला ङोस्येगीनक्याई, हीकी लाबला ङेन्दालाक हीना को़न्क्षोकने मेन्गीनक्याई हीकी लाबला मेङेन्दालाक। धेनी दी गोनेराङ होराङक्याई धेन्पे सेम्ङी धाङ शोकगी सेम्ङीगो ङो स्येलालाक। को़न्क्षोक नी झाम्पा हीन 7 ङी चेवेक्याओ, होराङक्या च्यीकगी च्यीकला झाम्पा झ्यीदु घीझ्येरी ॱनाना झाम्पा नी, को़न्क्षोकने लाक। धेनी झाम्पा झ्यीगीन घीरी को़न्क्षोकने केवालाक धेनी को़न्क्षोकला ङो स्येलालाक। 8 झाम्पा मीझ्यीगीनक्याई को़न्क्षोकला ङो ॱमेस्येलालाक घीझ्येरी ॱनाना को़न्क्षोक नी, झाम्पा हीन। 9 होराङक्या सेगी थोक्ने सो़न्पो ॱनेयेगी क्षीदु को़न्क्षोकगी, राङगी से च्यीक च्यीक्पोगो जीक्तेनदु ॱङाक जेपालाक। दी गोनेराङ, को़न्क्षोकगी राङगी झाम्पा होराङक्याला ॱङो़न्पालाक। 10 झाम्पा नी देराङ लाक, होराङक्याई को़न्क्षोकला झाम्पा माझ्येवा, को़न्क्षोकगी होराङला झाम्पा जेदी, राङगी से होरी धीक्पा सेल्येगी क्षीदु धीकस्याकगी ॱमारछो़ झ्युङयेला ॱङाक्पालाक। 11 ङी चेवेक्याओ, को़न्क्षोकगी होराङला देरे झाम्पा जेदा झ्येरी, होराङक्यागीयाः च्यीकगी च्यीकला झाम्पा झ्यीघोगुलाक। 12 को़न्क्षोकला सी़या ज्या माङ्युङ हो़तालाक हीना होरी च्यीकगी च्यीकला झाम्पा झ्यीना, को़न्क्षोक होरी नाङदु श्युक्वालाक धेनी खोङबागी झाम्पा होरी नाङदु छाङगो झ्युङालाक। 13 को़न्क्षोकगी राङगी थुक्ङी होराङला ॱनाङगीनगी गोने, होराङ खोङगी नाङ ॱनेये धाङ खोङ होराङ नाङ श्युक्कीनगो, होरी स्येलालाक। 14 धेनी यापगी राङगी से जीक्तेनगी क्याम्गो़न झ्युङयेगी क्षीदु ॱङाक्कीनगो, हीकी थोवालाक धेनी पाङपो झ्यीदाहीन। 15 येशुला को़न्क्षोकगी से लाक ॱनेरी, सी़ खेलेन झ्यीना, को़न्क्षोक खी़ नाङ श्युक्वालाक धेनी खो को़न्क्षोकगी नाङ ॱनेगीलाक। 16 होझ्येरी को़न्क्षोकगी झाम्पा होराङला हो़गीनगो, होराङ स्येलालाक धेनी यीच्चे झ्यीदालाक। को़न्क्षोक नी, झाम्पा जेगीन को़न्क्षोक लाक। धेनी झाम्पा नाङला ॱनेगीनगो, को़न्क्षोकगी नाङ ॱनेलालाक धेनी को़न्क्षोक खी़ नाङ श्युक्वालाक। 17 दी थोक्ने झाम्पा नी, होराङक्याई खोक्दु छाङगो झ्युङालाक। धेनी होझ्येरी ठीम्चो़गी ङीमाला, होराङला ॱलोगोक केगीलाक। घीझ्येरी ॱनाना दे जीक्तेनदु, येशु घारे हीन्गीनगो च्योक्रे होराङ लाक। 18 झाम्पा नाङ जीक्टा मेयोङालाक हीना याङदाक्पा झाम्पागी जीक्टा सेलालाक घीझ्येरी ॱनाना जीक्टागी ढेवा ङेपामुला हुङालाक। जीक्टा झ्यीगीनगी नाङ झाम्पा छाङगो मेयोङालाक। 19 को़न्क्षोकगी एन्ला होराङला झाम्पा जेदी, होराङक्याः झाम्पा झ्यीदालाक। 20 मी च्यीकगी “ङा को़न्क्षोकला चेवा झ्यीदीहो़क।” ॱनेरी ॱने, हीना राङगी पी़नला दाङा झ्यीना, खो शोक्पो लाक घीझ्येरी ॱनाना राङगी ॱमीकगी थोङगीन राङगी पी़नला झाम्पा मीझ्यीगीनगी, ॱमीकगी थोङ माङ्युङगीन को़न्क्षोकला चेवा झ्यी ॱमीथुक्कीलाक। 21 को़न्क्षोकला चेवा झ्यीगीनगी, राङगी पी़नला झाम्पा झ्यीघो़। दे नी, खोङबागी होराङला ॱनाङना का लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.