१ योहान्ना 3 - ॱलोवाको़न्क्षोकगी से धाङ सेमोक्या 1 तो़दाङ, यापगी होराङला ॱनाङगीन झाम्पा ॱमीच्यीकी क्षे राक्ती, होराङ खोङबागी से धाङ सेमो भो़घो झ्युवालाक। धेनी हीन्येगोवा ॱङोन्ने लाक। होझ्येरी जीक्तेनगी खोङबाला ङो ॱमेस्येगीन झ्येरी, होराङला ङो ॱमेस्येलालाक। 2 चेवे रोवाक्याओ, धान्दा होराङ को़न्क्षोकगी से धाङ सेमो लाक धेनी होराङ घी हुङये हीन्गीनगो धान्दा थुक्पे, ॱमाङो़न हो़तालाक। हीना मास्यीका ॱङो़न्दी घाङला, होराङ खोङबा च्योक्रे झ्युङगीलाक ॱनेरी, होराङ स्येलालाक घीझ्येरी ॱनाना खोङबा घारे हो़गीनला राङ, होरी खोङला ज्यागीलाक। 3 धेनी खोङबा चाङमा हो़गीन च्योक्रे, खोङगी खाला देरे रेवा श्याक्कीन घीरीगी राङला चाङमा श्यालाक। 4 धीक्पा झ्यीगीन घीरीगी को़न्क्षोकगी क्षो़ठीम तोलालाक धेनी धीक्पाराङ को़न्क्षोकगी क्षो़ठीम तोगीन लाक। 5 हीना होरी धीक्पाक्या सेयेगी क्षीला, खोङबा ॱङो़न जेपालाक ॱनेरी, खेक्या स्येलालाक। धेनी खोङबागी नाङ धीक्पा मेतालाक। 6 खोङबागी नाङ ॱनेती धेगीन सी़या, धीक्पा झ्यीच्यीक झ्येरी मेधेतालाक। धीक्पा झ्यीच्यीक झ्येरी धेगीनगी, खोङबाला ज्या ङ्युङ मेतालाक धेनी ङोस्ये ङ्युङ मेतालाक। 7 चेवे टुवाक्याओ, मी सी़या खेक्याला गो कोरतु ॱमाच्युक। खोङबा ढाङतेन हीन्गीन च्योक्रे, ढाङपो हीन्गीनगो झ्यीगीनराङ ढाङतेन लाक। 8 धीक्पा झ्येरी धेगीन नी, धी़कगी़ लाक घीझ्येरी ॱनाना धी़कगी थोक्मानेराङ धीक्पा झ्येरी हो हो़तालाक। धेनी धी़कगी लेगाक्या मेताला ताङयेगी क्षीदुराङ, को़न्क्षोकगी से ॱङो़न्दा जेपालाक। 9 को़न्क्षोकने केक्या सी़या धीक्पा झ्यीच्यीक झ्येरी मेधेतालाक घीझ्येरी ॱनाना को़न्क्षोकगी साङा खुङक्या नाङ श्युक्वालाक धेनी खुङक्या को़न्क्षोकने केक्या झ्येरी, खुङक्या धीक्पा झ्यीच्यीक झ्यी ॱमीथुक्वालाक। 10 ढाङपो हीन्गीनगो मीझ्यीगीन धाङ राङगी पी़नक्याला झाम्पा मीझ्यीगीन सुवा, को़न्क्षोकगी से धाङ सेमो मालाक। दी गोनेराङ, को़न्क्षोकगी से धाङ सेमो सु हीन्गीन धाङ धी़कगी टुवा सु हीन्गीनगो, होरी ङो स्येलालाक। च्यीकगी च्यीकला झाम्पा झ्यीघो़ 11 “होराङ च्यीकगी च्यीकला झाम्पा झ्यीघो़।” ॱनागीन, खेक्याई एम्माने घोरकीन कालोपगो दे लाक। 12 धी़कगी हीन्गीन धेनी राङगी नोला सेगीन, कायीन च्योक्रे माझ्युङ। खी़ घीझ्येरी राङगी नोला सेपाले? घीझ्येरी ॱनाना खी़ लेगाक्या ङेन्पा धाङ खी़ नोगी लेगाक्या ढाङपो हो़तालाक। 13 ङी पी़नक्याओ, जीक्तेनगी खेक्याला दाङा झ्यीना, खेक्या ॱहाङ ॱमासाङ। 14 होराङक्या छीवाने सो़न्पो ग्युरवालाक ॱनेरी, होराङ स्येलालाक घीझ्येरी ॱनाना होराङ होरी पी़नक्याला झाम्पा झ्यीदालाक। झाम्पा मीझ्यीगीन नी, छीवा नाङदु ॱनेलालाक। 15 राङगी पी़नक्याला दाङा झ्यीगीन घीरी, ॱरोक चेगीन लाक धेनी ॱरोक चेगीनक्याई नाङ थामेपे छेसोक ॱमेनेलालाक ॱनेरी, खेक्या स्येलालाक। 16 येशु मास्यीकागी राङगी कुसोक, होरी क्षीला ॱलो़ ताङा जेपालाक। दी गोनेराङ, झाम्पा घी हीन्गीनगो होरी स्येलालाक। धेनी होराङक्यागीया राङगी पी़नक्याई क्षीला राङगी ॱरोक ॱलो़ ताङघो़। 17 जीक्तेन दी ग्युनोर हो़गीन मी च्यीकगी, राङगी पी़न च्यीकला घो़गीनगो थोङाराङ खोला ॱङीङजे ॱमेकेना, को़न्क्षोकगी झाम्पा खी़ नाङ घाङगी झ्येरी ॱने थुक्कीले? 18 चेवे टुवाक्याओ, होराङ छीक धाङ खागी च्यीगा झाम्पा मेन्दा, लाक्लेन धाङ धेन्पे गोने झाम्पा झ्यीदु। 19 देनेराङ होराङ धेन्पागी हीन्गीन धाङ खोङगी दोङदु, होरी सेम ॱलोदेवा शोगीनगो, होरी स्येलालाक। 20 घीझ्येरी ॱनाना होरी सेमगी होराङला क्यो़न चुक्ना, को़न्क्षोक होरी सेमने क्षे हीन्गीन धाङ खोङबागी घीरी खेन्दा जेगीनगो, होराङ स्येलालाक। 21 चेवे रोवाक्याओ, होरी सेमगी होराङला क्यो़न ॱमीचुक्ना, होराङला को़न्क्षोकगी डुङदु ॱलोगोक केलालाक। 22 धेनी होरी घी श्यी़ना, होदेगो खोङगी थोक्ने थोबालाक घीझ्येरी ॱनाना होराङ खोङबागी काक्या ॱरुङालाक धेनी खोङला थुक्ङेउ हुङगीन लेगाक्या झ्यीदालाक। 23 धेनी को़न्क्षोकगी का नी, खोङगी से येशु मास्यीकागी छेनला होरी धेपा झ्यीघोये धाङ खोङगी होराङला ॱनाङना काठीम च्योक्रे, होराङ च्यीकगी च्यीकला झाम्पा झ्यीघोये लाक। 24 को़न्क्षोकगी का ॱरुङगीनगो, खोङगी नाङ ॱनेलालाक धेनी खोङबाः खी़ नाङ श्युक्वालाक। धेनी खोङबा होरी नाङदु श्युक्कीनगो, खोङगी ॱनाङना धाम्पे थुक्ङीगी थोक्ने होरी स्येलालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.