१ योहान्ना 2 - ॱलोवायेशु नी होरी श्योवा पुगीन हीन 1 ङी चेवे टुवाक्याओ, खेक्याई धीक्पा मीझ्यीदास्योक ॱनेरी, ङा खेक्याला दे लाबक्या ढीयाहीन। हीना खेक्याने च्यीकगी धीक्पा झ्यीना यापगी डुङदु, होरी क्षीला श्योवा पुगीन च्यीक हो़तालाक। खोङ नी ढाङतेन्पा येशु मास्यीका लाक। 2 खोङ नी होरी धीक्पाक्या सेल्येगी क्षीदु, धीकस्याकगी ॱमारछो़गो लाक धेनी होरी क्षीदु च्यीगा मेन्दा, जीक्तेन हो़लेगी धीक्पाक्याई क्षीदु लाक। 3 धेनी को़न्क्षोकगी काठीमक्या होरी ॱरुङना, होरी खोङबाला ङो स्येलालाक ॱनेरी ॱहाघोवालाक। 4 “ङा खोङबाला ङो स्येलीहो़क” ॱनेरी ॱनाये हीना खोङबागी काठीमक्या ॱमीरुङना, खो शोक्पो लाक धेनी खी़ नाङला धेन्पा मेयोङालाक। 5 हीना खोङबागी का ॱरुङगीनगी़ नाङ, को़न्क्षोकगी झाम्पा ॱङोन्नेगी फी़न्सुम छोक्पा हुङालाक। देनेराङ होराङ खोङगी नाङ ॱने हो़गीनगो, होरी ॱहाघोरालाक। 6 खोङबागी नाङ ॱने हो़गीनगी़, येशुगी चो़लाम च्योक्रे चो़लाम झ्यीघो़। काठीम साबा 7 चेवे रोवाक्याओ, ङा खेक्याला काठीम साबा च्यीक ढीयामेन हीना खीकीमुला एम्माने हो़गीन, काठीम ॱङीङबागो राङ ढीयाहीन। काठीम ॱङीङबा दे नी, खेक्याई घोर ङ्युङगीन का राङ लाक। 8 घीहीन्ना, ङी खेक्याला काठीम साबा च्यीक ढी हो़क। दे नी, येशु धाङ खेक्या नाङ धेन्पा दुक घीझ्येरी ॱनाना मी़नाकगो ढुवी धेनी धेन्पे हो़गो स्यारसादुक। 9 हो़ नाङदु हो़क ॱनेरी ॱनागीन हीना राङगी पी़नक्याला दाङा झ्यीगीनगो, धोराङा मी़नाक नाङलाराङ हो़तालाक। 10 याङ राङगी पी़नक्याला चेवा झ्यीगीनगो हो़ नाङला ॱनेलालाक धेनी खी़ नाङला फुदोक स्योरतु च्युक्ये क्यो़न घीया मेतालाक। 11 हीना राङगी पी़नक्याला दाङा झ्यीगीनगो मी़नाक नाङला ॱनेलालाक धेनी मी़नाक नाङ खोरती धेतालाक। धेनी राङ घारु डुगीनगो ॱमेस्येलालाक घीझ्येरी ॱनाना मी़नाकगी खोला श्यारा शो़ हो़तालाक। 12 चेवे टुवाक्याओ, ङा खेक्याला ढीयाहीन, घीझ्येरी ॱनाना येशुगी छेनगी थोक्ने, खीकी धीक्पाक्या सेल हो़तालाक। 13 आकीक्याओ, ङा खेक्याला ढीयाहीन, घीझ्येरी ॱनाना खेक्याई थोक्माने श्युक हो़गीनगोला ङो स्येलालाक। ख्योक्तोङक्याओ, ङा खेक्याला ढीयाहीन, घीझ्येरी ॱनाना धी़गी खाला खीकी ग्या हो़तालाक। 14 चेवे टुवाक्याओ, ङा खेक्याला ढीयाहीन, घीझ्येरी ॱनाना खेक्याई यापला ङो स्येलालाक। आकीक्याओ, ङा खेक्याला ढीयाहीन, घीझ्येरी ॱनाना खेक्याई थोक्माने श्युक हो़गीनगोला ङो स्येलालाक। ख्योक्तोङक्याओ, ङा खेक्याला ढीयाहीन, घीझ्येरी ॱनाना खेक्या तोप स्युक्क्षे दुक। धेनी को़न्क्षोकगी का खीकी नाङ ॱनेलालाक, धेनी धी़गी खाला खीकी ग्या हो़तालाक। 15 जीक्तेनला याङना जीक्तेन नाङ हो़गीन घीयाला ॱमाक्षाक। जीक्तेन देला क्षाक्ना, खी़ नाङ याप को़न्क्षोकला चेवा मेयोङालाक। 16 घीझ्येरी ॱनाना ली़गी दो़क्षाक धाङ ॱमीकगी दो़क्षाक धाङ छे दी ङागेल च्योक्रे जीक्तेनला हो़गीन घीरी, यापने मेयोङालाक हीना जीक्तेनने हुङालाक। 17 दे जीक्तेन धाङ दी दो़क्षाकक्या येरी डोवालाक हीना को़न्क्षोकगी थुकोङ डुप्कीनक्या ग्युने ग्युन्दु ॱनेलालाक। मास्यीकागी डागी कोरला ङेन्ता 18 चेवे टुवाक्याओ, धान्दा धी़गी थामागो लाक। मास्यीकागी डागो हुङी ॱनेरी, खीकी ॱहाघोर ङ्युङ हो़तालाक धेनी धान्दा, मास्यीकागी डा माङा होसा हो़तालाक। होझ्येरी धी़गी थामागो ॱलेप्दुक ॱनेरी, होरी ॱहाघोरालाक। 19 खुङक्या होरी घुङनेराङ थो़न्दी सोवालाक हीना खुङक्या ॱङोन्नेगो, होराङ स्योकने मालाक। घीझ्येरी ॱनाना खुङक्या होराङ स्योकने हीन्ना, खुङक्या होराङमुला राङ धे हो़टु हीना खुङक्या घीरी होराङने डारी डुगीनगी़ राङ, होराङ स्योकगी मालाक ॱनेरी सावो झ्युङालाक। 20 हीना धाम्पा हीन्गीनगी थोक्ने, खेक्याला धाम्पे थुक्ङीगी वाङ थोप हो़तालाक धेनी खेक्या घीरीगी धेन्पागो ॱहाघोरालाक। 21 खेक्याई धेन्पागो ॱहामेघोरालाक ॱनेरी, ङा दे ढीयामेन हीना खेक्याई ॱहाघोरालाक ॱनेरी ढीयाहीन धेनी धेन्पाने शोक घीया ॱमेथो़न्दालाक। 22 धा शोक्पोगो सुले? शोक्पो नी, येशुराङ मास्यीका लाक ॱनेरी, खेमेलेन्गीनक्या लाक। देरे मी नी याप धाङ सेला खेमेलेन्गीन, मास्यीकागी डागो लाक। 23 सेला खेमेलेन्गीन सुलाः याप मेतालाक। धेनी सेला खेलेन्गीनला यापगोवाः हो़तालाक। 24 खीकी गोमाने घोर ङ्युङगीनगो, खीकी नाङला ॱनेलास्योक। देरे झ्युङना, खेक्याः से धाङ यापगी नाङ ॱनेगीलाक। 25 धेनी खोङगी होराङला ॱनाङना धाम्चागो नी, थामेपे छेसोक लाक। 26 खेक्याला गोकोर ताङदो़ झ्यीगीनक्याला ॱमीक्ती, ङा खेक्याला दे लाबक्या ढीयाहीन। 27 याङ मास्यीकाने थोप्था धाम्पे थुक्ङीगी वाङ नी, खीकी सेमला ॱनेहो़गीन झ्येरी, खेक्याला सी़या ॱलाप मेघो़। घीझ्येरी ॱनाना धाम्पे थुक्ङीगी खेक्याला दो़न घीरीगी कोरला सुङालाक धेनी खोङगी ॱनाङगीन वाङ नी, शोक्पो मेन्दा धेन्पा लाक। होझ्येरी खोङगी सुङगीन च्योक्रे, खोङ नाङला खेक्या ॱनेती धो़क। 28 धा चेवे टुवाक्याओ, मास्यीका ॱङो़न्ये धी़ला होराङ ॱलोगोक क्षे झ्युङये धाङ खोङ फेप्यी घाङला, खोङगी डुङदु होराङ ङोजा झ्यी मेघोयेगी क्षीदु, खोङगी नाङ ॱनेती धो़क। 29 खोङ ढाङपो हीन्गीनगो खेक्याई ॱहाघोर हो़ना, ढाङपो झ्यीगीन घीरी खोङगी थोक्ने केवालाक ॱनेरी, खेक्याई ॱहाघोरालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.