१ कोरीन्थुपा 7 - ॱलोवाॱनामा लेन्गीनगी कोरला 1 धा खेक्याई ङाला ढीक्टा दो़न देगी कोरला ङा ॱनायेहीन, “केवे-भु नी भोमोमुला माढेना घा लाक।” 2 हीना लोक्येम माङा झ्युङगीन झ्येरी, केवे-भु रे-रेला केमी रे-रे हुङघो़ धेनी केमी रे-रेला ख्योवा रे-रे हुङघो़। 3 धेनी ख्योवागी राङगी केमीला तेरघोगीन ली़गी आङजा तेरघो़ धेनी देरेराङ झ्येरी केमीगीयाः राङगी ख्योवाला तेरघो़। 4 धेनी केमीगी राङगी ली़ राङगी वाङला मीधी़वा, राङगी ख्योवागी वाङला श्यालाक। देरेराङ झ्येरी ख्योवागीयाः राङगी ली़ राङगी वाङला मीधी़वा, राङगी केमीगी वाङला श्यालाक। 5 ॱमो़लामगी क्षीदु धी़चो़ क्यायेला धी़ तीते धाङ च्यीकगी च्यीकला ढो़ झ्येरी माना, ख्योवा केमी ॱङीगारागी मुला क्षाम्येला च्यीकगी च्यीकला ॱमाकाक। धेनी खेक्याराङ छो़ शीम्येला क्योवा झ्युरी, धी़ सातानगी खेक्याला ॱली़रु ॱमीच्युक्येगी क्षीला, याङ मुला क्षाम्घो़। 6 ङा खेक्याला दे लाबक्या का च्योक्रे मेन्दा हीना थोप्ताङगी थोक्ने ॱनाहीन। 7 मी घीरी ङा च्योक्रे हो़गीनगो ङा दो़दीहो़क। हीना को़न्क्षोकने मी घीरीला राङगी ॱनाङज्यीन थोप हो़तालाक। च्यीकला ॱना च्यीक धेनी श्येम्माला ॱना श्येम्मा। 8 हीना ॱनामा मालेन्ला धाङ युक्जामाक्याला ङा ॱनाहीन, खुङक्या ङा च्योक्रे ॱनामा मेलेन्दा धेना घा लाक। 9 हीना याङ खुङक्या राङला छो़ मीशीम्ना, खुङक्याई ॱनामा लेन्घो़ घीझ्येरी ॱनाना दो़क्षाकगी मेगी बारये ले, ॱनामा लेन्ना घागुलाक। 10 ॱनामा लेन्सासाक्याला ङा का दे तेराहीन (दे का नी ङी मेन्दा चोवोगी लाक), केमी च्यीक राङगी ख्योवाने खा माडास्योक। 11 (हीना खा ढा हो़नाः, मो ॱनामाला मेडोवा धेघो़ याङना राङगी ख्योवामुला राङ क्षाम्घो़।) धेनी ख्योवागीयाः राङगी केमीला माभोरास्योक। 12 धेनी खे श्येम्माक्याला ङा ॱनाहीन (दे चोवोगी मेन्दा, ङाराङगी ॱनाताङ हीन), पी़न च्यीकला धेपा मीझ्यीगीन केमी झ्येरी धेनी मो खी़मुला धेङी दो़ना, खो मी़मोला खा ढाये मेतालाक। 13 धेनी भोमो च्यीकला धेपा मीझ्यीगीन ख्योवा झ्येरी, खो मी़मुला धेङी दो़ना, मो खी़मुला खा ढाये मेतालाक। 14 घीझ्येरी ॱनाना धेपा मीझ्यीगीन ख्योवा नी, राङगी केमी थोक्ने धाम्पा झ्युङालाक धेनी धेपा मीझ्यीगीन केमी नी, राङगी ख्योवा थोक्ने धाम्पा हुङालाक। देरे मेन्ना खुङक्याई टुवाक्या ॱमेचाङा झ्युङयेहो़क हीना धान्दा खुङक्या धाम्पा झ्युवालाक। 15 हीना धेपा मीझ्यीगीनगी़ राङगी रोवामुला खा ढाङी दो़ना, खा डारु च्युक। देरे झ्युङना धेपा झ्यीगीन ख्योवा याङना केमीगो सी़याः वाङदु मेयोङालाक। घीझ्येरी ॱनाना को़न्क्षोकगी होराङला श्यीदेगी नाङदु ॱनेयेला भो़ जेपालाक। 16 खे केमीक्याओ, खेक्याला घी स्ये, खीकी राङगी ख्योवाला क्योप थुक्ये हो़टु? याङना खे ख्योवाक्याओ, खेक्याला घी स्ये, ख्यी़ राङगी केमीला क्योप थुक्ये हो़टु? को़न्क्षोकगी को़का च्योक्रे मीछे क्यायेगी कोर 17 चोवोगी मी रे-रेला घी को़का धाङ ॱनेछु घारेला, को़न्क्षोकगी खेक्याला भो़ ॱनाङगीन मीछेगो, मी रे-रेगी पी़घो़। क्षो़छोक घीरीगी क्षीदु, ङी ठीम नी देराङ लाक। 18 मी च्यीकला को़न्क्षोकगी भो़ली घाङला खो एन्दुरु पाउ चेसासा हो़ना, खी़ होदे ताकगो सुब्ये मेतालाक। धेनी पाउ ॱमाचेचा हो़ताराङ खोला को़न्क्षोकगी भो़ हो़ना, खी़ पाउ चे घोगुमालाक। 19 पाउ चेदी ताक ग्याप्ना घीया मालाक धेनी पाउ चेगीन ताक मेग्याप्नाः घीया मालाक। को़न्क्षोकगी का ॱरुङयेगो चाक्षे लाक। 20 ॱनेछु घारेला को़न्क्षोकगी खुङक्याला भो़दुई, होदेराङला मी रे-रे ॱनेघो़। 21 ख्यो़ला को़न्क्षोकगी भो़ली घाङला ख्यो़ ढेन्योक हो़ते? दी कोरला सेम्डा माझ्यी हीना ढेन्योकने थार थुक्ये हो़ना, होदे घुकाप भेचो़ झ्यी। 22 घीझ्येरी ॱनाना चोवोगी नाङ भो़ली घाङला, ढेन्योक हो़गीनगो धा चोवोगी राङवाङगी मी झ्यु हो़तालाक। होदेरेराङ झ्येरी चोवोगी भो़ली घाङला राङवाङ हो़गीन मीगो, धा मास्यीकागी ढेन्योक झ्यु हो़तालाक। 23 खेक्या नी रीङ ज्यारी ङ्यो़ङ्याक्या लाक। मीगी ढेन्योक माझ्युङ। 24 होझ्येरी पी़नक्याओ, मी रे-रेला ॱनेछु घारेला को़न्क्षोकगी भो़ जेदुक, खो होदेराङ ॱनेछुला को़न्क्षोकमुला ॱनेघो़। ॱनामा मालेन्लाक्याई कोरला 25 धा भोमो नाच्युङमाक्याई कोरला चोवोगी का ङाला मेक, हीना ङा चोवोगी थुक्जेगी गोने ॱलो काथुक्कीन मी च्यीक झ्येरी, ङारी साम्जु स्येदाहीन। 26 धीक्जाङगी दुङाला ताये हीन्ना, खेक्या धान्दा घारे दुई होदेराङला ॱनेती धेना घा हुङगुलाक ॱनेरी, ङा सामीहो़क। 27 ख्यी़ ॱनामा लेन हो़ना, मोने खा डायेगी थापस्यी ॱमाचा। ख्यी़ ॱनामा मालेन हो़ना, ख्यो़ ॱनामा लेन्ये थापस्यी ॱमाचा। 28 हीना ख्यी़ ॱनामा लेन्ना, ख्यी़ धीक्पा ॱमासाक हो़तालाक। धेनी नाच्युङमा च्यीक ॱनामाला डोना, मी़ धीक्पा ॱमासाक हो़तालाक। घीहीन्ना, ॱनामा लेन्गीनक्याई दे मीछेला दुक्पु माङा ठेगीलाक धेनी ङा खेक्याला होदेने क्योप्ङी दो़दी। 29 पी़नक्याओ, ङी ॱनागीनगी दो़न्दाकगो दे लाक। धी़चो़ तुङा दुक। धा देने ॱहाला केमी हो़गीनक्या केमी मेगीन च्योक्रे, झ्येरी मीछे क्याघो़। 30 दुक ॱरुङगीनक्या दुक ॱमीरुङगीनक्या च्योक्रे, ङ्यामो ताङगीनक्या ङ्यामो ॱमेताङगीनक्या च्योक्रे धेनी च्यालाक ङ्योगीनक्या राङला घीया मेगीन च्योक्रे, 31 धेनी जीक्तेनगी च्यालाकक्या लाक्लेन ताङगीनक्या, होदेला ढेवा घीया मेगीन च्योक्रे झ्यीघो़। घीझ्येरी ॱनाना जीक्तेनगी धान्दागी ॱनाम्पा नी मेताला डी़। 32 खेक्या दुङाने थारकीनगो ङा दो़दीहो़क। ॱनामा मालेन्ला मीगी चोवोला घाङगी झ्येरी थुक्घेरु च्युक्ये ॱनेरी, चोवोगी दो़नला दो़नाङ झ्यीदालाक। 33 हीना ॱनामा लेन्ला मी नी, राङगी केमीला घाङगी झ्येरी ङ्यामो घारु च्युक्ये ॱनेरी, जीक्तेनगी दो़नला दो़नाङ झ्यीदालाक। 34 धेनी खी़ सेम नी छोक ॱङीला घो़लालाक। ॱनामाला ॱमासोसा केमी याङना नाच्युङमा नी, ली़ धाङ सेम ॱङीगाराला घाङगी झ्येरी धाम्पा झ्युङये दुओ ॱनेरी, चोवोगी दो़नला दो़नाङ झ्यीदालाक। हीना ॱनामाला सोसा केमीगो राङगी ख्योवाला घाङगी झ्येरी, ङ्यामो घारु च्युक्ये दुओ ॱनेरी, जीक्तेनगी दो़नला दो़नाङ झ्यीदालाक। 35 खेक्याला फेन्येगी क्षीला ङी दे लाबक्या ॱनागीनगो, खेक्याला काक्येला मालाक हीना खीकी चो़लाम शाङा झ्युङये धाङ खीकी सेम मेयो़ला, चोवोला श्याप्ची श्युयेगी क्षीदु ॱनालाक। 36 मी च्यीकगी राङमुला ॱलोङछाङ झ्येजा, नाच्युङमा भोमोगोला चो़पा घा माझ्येजा च्योक्रे साम्ना, धेनी मी़ लो ग्येरी डी़हो़ना खी़ दो़गीन च्योक्रे, मोला ॱनामा लेन क्षोक्कीलाक। देरे झ्यीना धीक्पा मालाक। खुङक्याई ॱनामा लेन्घो़। 37 हीना मी च्यीकगी राङगी सेम्बा तेन्पो शो़साहो़ना धेनी खो वाङ घीन्गीयाः होकदु मेता, हीना राङगी दो़पाक्या वाङदु धी़ थुप्ये धाङ होदे नाच्युङमामुला ॱनामा मेलेन्ये ॱनेरी थाक चेसाहो़ना, होदे मीगीयाः घा राङ झ्यीदालाक। 38 देरे झ्येरी नाच्युङमागोला ॱनामा लेन्गीनगी़ घा राङ झ्यीदालाक हीना मेलेन्गीनगी़ ॱयोल्ले घा झ्यीदालाक। 39 राङगी ख्योवा सो़न्पो हो़गीन थुक्पे, केमी नी ख्योवागी वाङ होकला हुङालाक। हीना मी़ ख्योवागो ढोङ छाना मोरी दो़गीन, मीमुला मो ॱनामाला डो क्षोक्वालाक हीना याङ मीगो चोवोला धेपा झ्यीगीन हुङघोवालाक। 40 हीना ङी साम्लोला, मो मोरोङमा राङ धेना मोला ॱयो़ल्ले कीदा झ्युङगीलाक। धेनी ङी दे ॱनी घाङला, ङा खेक्याला को़न्क्षोकगी थुक्ङी गोने ॱलोप्तो़न तेरी हो़क ॱनेरी, ङी साम्लो हो़क। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.