१ कोरीन्थुपा 3 - ॱलोवाक्षो़छोक धाङ गोठीक्या 1 पी़नक्याओ, ङा खेक्यामुला सेम्ङीगी मीमुला लाब ताङगीन च्योक्रे, लाब ताङ ॱमाथुक्जुङ हीना जीक्तेनगी मी धेनी मास्यीकागी नाङ टुवा ॱमाङ्याकक्याला लाब ताङगीन च्योक्रे ताङ थुक्जुङ। 2 ङी खेक्याला शामा दोक-दोक मेन्दा, होमा तेरपी घीझ्येरी ॱनाना खेक्या होदे शायेला डाढीक मीन्दुक। धेनी धोराङाः डाढीक मीन्दुक। 3 खेक्या धान्दाः जीक्तेन्पा राङ दुक। घीझ्येरी ॱनाना खीकी खोक्दु ठादोक धाङ थाप्चो़ हो़नाः, खेक्या जीक्तेन्पा माले धेनी मी क्युमाक्या च्योक्रे चो़पा झ्यीदा माले? 4 घीझ्येरी ॱनाना च्यीकगी “ङा पाउलुगी छोक झ्यीदाहीन।” धेनी श्येम्मागी “ङा आपोल्लोसगी छोक झ्यीदाहीन।” ॱनेरी ॱनी घाङला, खेक्या जीक्तेनगी मी च्योक्रे चो़पा झ्यीदा माले? 5 धा ॱहाना, आपोल्लोस सुले? धेनी पाउलु सुले? खुङक्या नी चोवोगी रे-रेला को़ ॱनाङना धाङ खुङक्याई थोक्ने, खेक्याई धेपा झ्येजा श्याप्चीपा च्यीका लाक। 6 ङी साङा ताप्पी धेनी आपोल्लोसगी क्षु ॱलुक्जुङ हीना को़न्क्षोकगी होदे केरु च्युक्वा जेपालाक। 7 होझ्येरी ताप्कीन याङना क्षु ॱलुक्कीन नी, घीया मालाक हीना होदेला केरु च्युक्कीन को़न्क्षोकराङ गेक्षे लाक। 8 साङा ताप्कीन धाङ क्षु ॱलुक्कीन नी, च्यीक्पा लाक धेनी खुङक्याला राङगी काल्ले ग्याप्कीनगी छो़लाराङ ॱलाज्या थोप्कीलाक। 9 घीझ्येरी ॱनाना हेक्या नी, को़न्क्षोकगी लेरोकक्या हीन धेनी खेक्यागो को़न्क्षोकगी श्यीङ धाङ श्युक्खाङ लाक। 10 को़न्क्षोकगी ङाला ॱनाङना थुक्जेगी गोने, ङी खाङबा शोगीन खेवा च्यीक च्योक्रे, खाङबी ॱमाङस्यीगो तीवी धेनी श्येम्माक्याई होदेगी खाला चीक्पा चीक्यी। हीना खाङबा चीक्कीन रे-रेगी, होदे चीक्यी घाङला दो़नाङ झ्यीघो़। 11 घीझ्येरी ॱनाना ॱमाङस्यी तीङ सासागो नी, येशु मास्यीका लाक धेनी होदे माना श्येम्मा ॱमाङस्यी सी़याः तीङ ॱमीथुक्कीलाक। 12 धा होदे ॱमाङस्यी खाला मी सु च्यीकगीयाः सेर धाङ ॱङु धाङ धो रीङक्षे धाङ स्यीङ धाङ चा काम्बो धाङ सोक्मागी खाङबा चीक्नाः, 13 खुङक्या रे-रेगी लेगागो सावो थोङगीलाक घीझ्येरी ॱनाना ठीम्चो़गी ङीमागी होदे ॱङो़न्गीलाक। होदे नी, मेगी गोने ॱङो़न्गीलाक धेनी मी रे-रेगी लेगा घारे हो़गीनगो, मेगी राङ ताक्चा झ्यीगीलाक। 14 धेनी ॱमाङस्यी दी खाला चीक्चागो ॱनेना, चीक्गीनगोला ज्यागा थोप्कीलाक। 15 धेनी होदेगो छीक्ती डोना, चीक्गीनगोला ग्योङ फोक्कीलाक हीना याङ खो खोराङगो मेने थारकीन च्योक्रे क्योप्कीलाक। 16 खेक्या नी को़न्क्षोकगी क्षो़खाङ हीन्गीन धाङ को़न्क्षोकगी थुक्ङी, खीकी नाङ श्युक्कीनगो खेक्याला स्येये मेते? 17 को़न्क्षोकगी क्षो़खाङ तीप्कीनला को़न्क्षोकगीराङ मेताला ताङा जेगीलाक। घीझ्येरी ॱनाना को़न्क्षोकगी क्षो़खाङ धाम्पा हुङालाक धेनी खेक्याराङ होदे क्षो़खाङ लाक। 18 मी सु च्यीकगीया राङला गोकोर ॱमाताङास्योक। दे जीक्तेनदु राङला खेवा साम्गीनगी, राङ खेवा झ्युङयेगी क्षीदु खो ॱलेन्दा झ्युङघो़। 19 घीझ्येरी ॱनाना दे जीक्तेनगी स्येराप नी, को़न्क्षोकगी ॱमीक्वादु ॱलेन्दा लाक। सुङरापला देरे ढीक हो़तालाक, “मी खेवाक्याला खोरी चाङग्यु नाङलाराङ, खोङबागी शीम्गीलाक।” 20 धेनी याङ “खेवाक्याई साम्लो दो़न मेगीन हुङालाक ॱनेरी चोवो खेन्दालाक।” 21 होझ्येरी सी़याः मी खाला ङोम्सो माझ्यीदास्योक। घीझ्येरी ॱनाना दो़न घीरी खीकीराङ लाक। 22 होदेगो पाउलु हीन्ना आपोल्लोस हीन्ना केफास हीन्ना जीक्तेन हीन्ना छेसोक याङना छीवा हीन्ना धान्दा याङना माउपार हीन्ना, दो़न घीरी खेक्याई लाक। 23 धेनी खेक्यागो मास्यीकागी लाक धेनी मास्यीका नी, को़न्क्षोकगी लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.