१ कोरीन्थुपा 2 - ॱलोवा1 पी़नक्याओ, ङा खेक्याचारु हुङाराङ, को़न्क्षोकगी साङवागो ॱमीच्यीकी लाब खेवाक्या धाङ स्येरापगी गोने, सेटाक झ्येरी मायो। 2 घीझ्येरी ॱनाना ङा खीकीमुला हो़ताराङ, येशु मास्यीका धाङ खोङगी ग्याङस्यीङगी लाब माना, श्येम्मा घीरी ढेन्बा ज्येयेला ङी थाक चेवी। 3 ङा खीकीचारु क्योवा झ्युरी, ॱमीच्यीकी जीक्ती धाङ दारती होवी। 4-5 खेक्याई धेपा मीगी स्येरापला मेन्दा हीना को़न्क्षोकगी नी़थुला तेन्येगी क्षीदु, ङी स्येगीन तामक्या धाङ क्षो़क्या, ताम खेवा धाङ स्येरापगी थोक्ने मेन्दा, धाम्पे थुक्ङी धाङ नी़थुगी गोने झ्युवालाक। धाम्पे थुक्ङीगी स्येरापगी कोरला 6 धा धेपा तेन्पो हो़गीनक्याई घुङदु हेक्या स्येरापगी तामक्या स्येदाहीन हीना स्येराप दे नी, दे धी़राप याङना मेताला डोये हीन्गीन, दे धी़रापगी वाङ झ्यीगीनक्याई स्येराप मालाक। 7 हीना साङवादु बेरी श्याकश्या को़न्क्षोकगी स्येराप दे हेक्या स्येदाहीन। स्येराप दे नी, जीक्तेन ॱमाको़ एन्लानेराङ, हीकी शीजेगी क्षीला को़न्क्षोकगी को़वालाक। 8 दे धी़रापगी वाङ झ्यीगीनक्या सी़याः दे स्येराप दे ॱहामाघोवालाक। खुङक्याई ॱहाघो हो़ना, शीजेगी चोवोला खुङक्याई ग्याङस्यीङदु क्याङये मेक। 9 घीहीन्ना सुङरापदु देरे ढीक हो़तालाक, “ॱमीकगी ॱमाथोथा धाङ आमच्योकगी ॱमाघोरका, धाङ मीगी सेमगी ॱमासाम्साक्याराङ, को़न्क्षोकगी राङला चेवा झ्यीगीनक्याला डाढीक जे हो़तालाक।” 10 हीना देक्या नी, को़न्क्षोकगी होराङला धाम्पे थुक्ङीगी गोने ॱङो़न जे हो़तालाक। घीझ्येरी ॱनाना धाम्पे थुक्ङीगी दो़न घीरी धाङ को़न्क्षोकगी साङवा तीङरीङाक्याः चालालाक। 11 मी च्यीकगी साम्लोक्या राङगी सेमगी माना सी़ स्येगीलाक से? होदे च्योक्रे को़न्क्षोकगी थुकोङक्या को़न्क्षोकगी थुक्ङीगी माना, सी़या ॱमेस्येलालाक। 12 धा हेक्याला थोप्था सेम्ङी नी, जीक्तेनगी मालाक हीना को़न्क्षोकगी थुक्जेगी थोक्ने, हेक्याला ॱनाङना दो़न घीरी ॱहाघोरास्योक ॱनेरी, को़न्क्षोकने धाम्पे थुक्ङी थोप्पालाक। 13 धेनी हेक्याई स्येगीन तामक्या नी, मीगी स्येरापगी ॱलाप्ला छीकक्याने मालाक हीना धाम्पे थुक्ङीगी ॱनाङगीन छीकक्याला तेन्दी, हेक्या थुक्ङीगी छीकक्याई गोने थुक्ङीगी धेन्पे दो़नक्या टोलालाक। 14 धाम्पे थुक्ङीला ॱमेतेन्गीन मीक्याई, को़न्क्षोकगी थुक्ङीगी लाबक्याला खेलेन मीझ्यीदालाक घीझ्येरी ॱनाना होदे लाबक्या खुङक्याई क्षीदु क्षोमेगीन लाक धेनी खुङक्याई होदे ॱहाघो ॱमीथुक्वालाक। घीझ्येरी ॱनाना हुरे लाबक्या धाम्पे थुक्ङीगी गोने च्यीगा स्येलालाक। 15 धाम्पे थुक्ङीला तेन्गीन मीक्याई, घीरीगी ताक्चो़ झ्यीदालाक हीना खोला सी़या ताक्चो़ झ्यी ॱमीथुक्वालाक। 16 घीझ्येरी ॱनाना “चोवोगी थुकोङ सी़ स्येलाले? खोङला सी़ ॱलापच्या ग्याप थुप्कीले?” हीना हीकीमुला मास्यीकागी थुक हो़तालाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.