१ कोरीन्थुपा 16 - ॱलोवाको़न्क्षोकगी मीक्याई क्षीदु श्यान्देप पुयेगी कोर 1 धा धाम्पे मीक्याई क्षीदु श्यान्देप पुयेगी कोरला, ङी गालातीयागी क्षो़छोकक्याला का तेरता च्योक्रे, खेक्याई झ्यी। 2 ङा हुङाराङ श्यान्देप धु मेघोयेगी क्षीला धी़न्डा रे-रेगी ङीमा धाङपोगोला, खेक्याने रे-रेगी राङगी हुङघुङने तीते च्यीक पेरी साक्ती श्योक। 3 धेनी ङा ॱलेप्ती, ङी खेक्याई थाक्चो़चा मीक्याई कोरला ङोटो़गी यीक ढीक्ती, खुङक्याला खीकी ॱङेन्बागो येरुसालेमदु क्यारु झाङु। 4 धेनी ङा डो घोये हीन्ना, खुङक्या ङीमुला डुगीलाक। पाउलु खोराङगी डुगी क्षास्यी 5 धेनी ङा माकेडोनीयाने डोये हीन्गीन झ्येरी, ङा होदुरु सोसारती खीकीचारु हुङाहीन। 6 धेनी च्यीक झ्यीना, ङा खीकीचारु श्याक्मो तीते च्यीक धेगीलाक याङना घुङगा घीरी धे थुक्कीलाक। धेनी होदे स्याम्ने ङा घारु डोये हीन्ना, खेक्याई ङी डुगी क्षीला रोवा झ्यी थुक्कीलाक। 7 घीझ्येरी ॱनाना दालो ङा खीकीचारु लाम्साङ ठेदी च्यीगा मेडोवा, चोवोगी थुकोङ हो़ना खीकीमुला आरुङ माङा धी़चो़ धेयेगी रेवा हो़क। 8 हीना ङीमा ॱङापच्युपागी धी़छेन थुक्पे, ङा एफीसुरु राङ धेयेहीन। 9 घीझ्येरी ॱनाना फेन्क्षे लेगागी क्षीदु ङाला घुकाप क्षे च्यीक जोरहो़क धेनी देला ङोग्येल झ्यीगीनक्या माङा दुक। 10 धा तीमोथेउ खीकीचारु हुङाराङ, खेक्याई खोला जीक्नाङ घीया मीझ्युङा धेदु च्युक घीझ्येरी ॱनाना खोवाः ङा च्योक्रे चोवोगी लेगा झ्यीदालाक। 11 होझ्येरी सी़याः खोला थोङछुङ मीझ्यीयास्योक। धेनी खो ङीचारु लोक्येगी क्षीदु, खोला श्यीदेगी गोने खोरी लाम्दु झोङ। घीझ्येरी ॱनाना खो पी़नक्याईमुला हुङगुलाक ॱनेरी, ङा घुक्ती धेहो़क। 12 धा होरी पी़न आपोल्लोसगी कोरला ॱनाना, खोला पी़न श्येम्माक्यामुला खीकीचारु डोयेला, ङी ॱमीच्यीकी उजुक ग्याप्पी हीना धान्दा खो डोयेला फुक्की दो़पा मीझ्यीदा। धेनी घुकाप जोराराङ खो हुङगीलाक। 13 च्याङजे झ्यी। धेपाला तेन्पो ॱनेती धो़क धेनी ॱलोगोक क्षे धाङ स्युक क्षे झ्युङ। 14 धेनी खेक्या घी झ्यीना, घीरी झाम्पागी गोने झ्यी। 15 पी़नक्याओ, सेतेफानगी नाङमी नी आकाईयादु धेपा झ्यीगीन धाङस्योकगो लाक धेनी खुङक्याई धाम्पे मीक्याई श्याप्तोक पुयेगी क्षीदु राङला फी़ हो़तालाक ॱनेरी, खेक्याई स्येलालाक। 16 देरे मीक्या धाङ देरेराङ झ्येरी काल्ले ग्याप्कीन लेरोकक्याई खाला ङेन ॱनेरी, ङा खेक्याला श्योवा पुलाहीन। 17 सेतेफान धाङ फोरतोनातो धाङ आकायाकु ॱलेप्ती, ङा ॱमीच्यीकी ङ्यामो ग्येजुङ घीझ्येरी ॱनाना खेक्या मेती घाङला, खुङक्याई ङाला रोवा झ्येजुङ। 18 धेनी खुङक्याई खेक्याला सेम्सो पारकीन च्योक्रे, ङाला सेम्सो पारजुङ। होझ्येरी देरे मीक्याला चीकुर झ्यी। थामे छाम्डी 19 एशीयागी क्षो़छोकक्याई खेक्याला छाम्डी श्यी़क। आकुला धाङ पीरीस्का धाङ खुङगी नाङदु छुक्कीन क्षो़छोकगी, खेक्याला चोवोगी छेनने छाम्डी श्यी़क। 20 पी़न घीरीगी खेक्याला छाम्डी श्यी़क। च्यीकगी च्यीकला धाम्पे ओगी छाम्डी श्यी़। 21 ङा पाउलु, ङाराङगी लाक्पी दे छाम्डी ढीक्यीहो़क। 22 चोवोला चेवा मीझ्यीगीनगोला, ॱमेमो फोक्वास्योक। मारानाथा। (हीकी चोवो, खेराङ फेप्रोनाङ।) 23 चोवो येशुगी थुक्जे खेक्यामुला ॱनेलास्योक। 24 मास्यीका येशुगी नाङ ङी झाम्पा, खेक्या घीरीमुला ॱनेलास्योक। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.