१ कोरीन्थुपा 15 - ॱलोवामास्यीका कुसो़न्पो श्याङगीनगी कोर 1 धा पी़नक्याओ, ङी खेक्याला स्येगीन ताम्शाङगो, ङा खेक्याला ढेन्सो ॱलाङाहीन। दे ताम्शाङला खीकी खेलेन झ्येवालाक धेनी होदेला तेन्पो ॱनेती धेदालाक। 2 धेनी ङी खेक्याला स्येस्या ताम्शाङगोला खेक्या तेन्पो ॱनेना, दी थोक्नेराङ खेक्या क्योप्कीलाक। देरे मेन्ना, खेक्याई क्षो मेताला धेपा झ्येवालाक। 3 घीझ्येरी ॱनाना ङाला थोप्था धाङपो गेक्षेस्योकगो, होदेरेराङला ङी खेक्याला स्येवी, दे नी सुङरापला ढीक्टा च्योक्रे मास्यीका होरी धीक्पागी क्षीदु ढोङा जेपालाक, 4 धेनी धी़ठोदु चुक्वा जेपालाक धेनी सुङराप नाङला ढीक्टा च्योक्रे, श्याक्मो सुम्बागोला को़न्क्षोकगी खोङला कुसो़न्पो श्याङा जेपालाक। 5 धेनी खोङ केफासचारु ॱङो़न जेदी धेनी कुछाप च्युङ-ॱङीपाक्याला ॱङो़न जेपालाक। 6 होदे स्याम्ने, खोङ थेङ च्यीक्लाराङ पी़न ॱङापग्याने ल्हाकमुला ॱङो़न जेपालाक। खुङक्याने माङक्षे धान्दाः सो़न्पो हो़तालाक धेनी रीङगा ढोसालाक। 7 धेनी खोङ याकोब धाङ धेनी कुछाप घीरीमुला ॱङो़न जेपालाक। 8 धेनी घीरीने स्याम्योकगोला, धी़ मारीङबाला केक्या मीचारु च्योक्रे, खोङबा ङी चारुवाः ॱङो़न जेपालाक। 9 घीझ्येरी ॱनाना कुछापक्या घीरीने, ङा ॱमास्योकगो हीन धेनी ङा कुछाप ॱनेरी मीङ श्येरीन खाये मेक घीझ्येरी ॱनाना ङी को़न्क्षोकगी क्षो़छोकला दुक्पु तावी। 10 हीना ङा घारे हो़गीनगो, को़न्क्षोकगी थुक्जे गोने हीन। धेनी ङाला थोप्था खोङबागी थुक्जे दे, दो़न्मेदु माझ्युजुङ। हीना खुङक्या घीरीने ल्हाक, ङी काल्ले माङा ग्याप्पी। घीहीन्ना ङी ङाराङगी झ्येरी मालाक हीना ङीमुला श्युक्कीन को़न्क्षोकगी थुक्जेगी थोक्ने लाक। 11 होझ्येरी ङी हीन्ना याङना खुङक्याने हीन्ना, हेक्याई ताम्शाङ स्येवी धेनी खेक्याई धेपा झ्येवालाक। मीक्या छीवाने सो़न्गीनगी कोर 12 धा मास्यीका छीवाने कुसो़न्पो श्याङवालाक ॱनेरी सेटाक झ्येहो़ना, खेक्याने रीङगागी छीवाने सो़न्पो मेलाङालाक ॱनेरी, घाङगी झ्येरी ॱनाथुक्वाले? 13 धा छीवाने सो़न्पो लाङये मेना, मास्यीकालाः छीवाने कुसो़न्पो श्याङा माजेपालाक। 14 धेनी मास्यीकाला कुसो़न्पो श्याङ माजे हो़ना, हीकी ताम्शाङ स्येगीनगो धाङ खेक्याई धेपागो दो़न मेगीन झ्युङालाक। 15 देने ल्हाक हेक्याई को़न्क्षोकगी कोरला पाङपो शोक्पो तेरकीन झ्युङालाक घीझ्येरी ॱनाना खोङबागी मास्यीकाला छीवाने कुसो़न्पो श्याङा जेपालाक ॱनेरी, हीकी पाङपो झ्येवालाक। हीना ॱङोन्ने छीवाने सो़न्पो लाङये मेना, खोङबागीयाः मास्यीकाला कुसो़न्पो श्याङा माजेपालाक। 16 घीझ्येरी ॱनाना छीवाने सो़न्पो लाङये मेना, मास्यीकाला कुसो़न्पो श्याङा माजेपालाक। 17 धेनी याङ मास्यीकाला कुसो़न्पो श्याङा माजे हो़ना, खेक्याई धेपागो दो़न मेगीन झ्युङालाक धेनी धान्दाः, खेक्या खेरी धीक्पा नाङदु हुङालाक। 18 धा देरे हीन्ना मास्यीकाला धेपा झ्येरी, ढोटोवाक्या मेताला सोवालाक। 19 धा दे छेगी क्षीदु च्यीगा मास्यीकाला होरी रेवा झ्येहो़ना, होराङ मी श्येम्मा घीरीने थापक्योयोक लाक। 20 हीना मास्यीका ॱङोन्नेराङ छीवाने कुसो़न्पो श्याङा जेपालाक धेनी खोङ नी, ढोरी सोसाक्याने सो़न्गीन ढेबु धाङपोगो लाक। 21 घीझ्येरी ॱनाना मी च्यीकने छीवा झ्युङगीन च्योक्रे, मी च्यीक्नेराङ छीवाने सो़न्गीन झ्युवालाक। 22 आदामगी थोक्ने मी घीरी ढोङगीन च्योक्रे, मास्यीकागी थोक्ने घीरी सो़न्पो जेगीलाक। 23 हीना दे नी रेमीला झ्युङगीलाक, ढेबु धाङपोगो मास्यीका लाक धेनी मास्यीका धाब्ले फेई घाङला, खोङगी हीन्गीनक्या छीवाने सो़न्गीलाक। 24 धेनी खोङगी वाङ झ्यीगीन धाङ आङजा ॱना घीरी धाङ नी़थु घीरीला मेताला जेसारती, धेनी याप को़न्क्षोकला ग्यासीगो पुली घाङला, थामे धी़गो ॱलेप्कीलाक। 25 घीझ्येरी ॱनाना खोङगी राङगी डा घीरीला राङगी श्याप होकदु श्याक माजे थुक्पे, खोङगी वाङग्युर जे घोगीलाक। 26 धेनी घीरीने थाला, मेताला जेघोये हीन्गीन डागो छीवा लाक। 27 घीझ्येरी ॱनाना को़न्क्षोकगी “ॱङोपो घीरी खोङगी श्याप होकदु श्याक जे हो़तालाक।” धा “ॱङोपो घीरी खोङगी वाङ होकदु श्याक जे हो़तालाक।” ॱनी घाङला घीरी मास्यीकागी वाङ होकदु श्याक जेगीन को़न्क्षोक नी, खोङगी वाङदु मेगीनगो सावो तो़न्दालाक। 28 धेनी घीरी खोङगी वाङ होकदु श्या जेसारती, घीरी खोङगी वाङ होकदु श्या जेगीन, को़न्क्षोकगी वाङ होकदु से खोराङ ॱनेगीलाक। दे नी, को़न्क्षोक ॱङोपो घीरीगी थोकला थोस्योक झ्युङयेगी क्षीदु लाक। 29 देरे मेन्ना, स्यीम्पोगी थोक्ने मीक्याई ठी़सो़ लेन्गीनगी दो़नगो घी ले? स्यीम्पोक्या सो़न्पो जेये मेन्ना, स्यीम्पोक्याई क्षीदु मीक्या घीझ्येरी ठी़सो़ लेन्दाले? 30 धेनी हेक्या घीझ्येरी छुची रे-रेला राङगी मीछे ङेन्काला ताङये? 31 पी़नक्याओ, होरी चोवो मास्यीका येशुगी नाङ, ङा खेक्याई क्षीदु ङोम्सो झ्यीदीहो़क ॱनागीन लाब दे, ॱङोन्ने धेन्पा हीन्गीन च्योक्रे, श्याक्मो डाई ङा छीवे खाला ॱलेप्येगी ङेन्का हो़गीन देयाः धेन्पा लाक। 32 धा जीक्तेन्पा मी च्योक्रे, एफीसुदु सेम्चेनक्या च्योक्रे मुला ङी थाप्कीनगोने, ङाला घी फेन्थोक्जो से? धा छीवाने सो़न्पो झ्युङये मेन्ना, “होराङ शा-थुङ झ्यीदु, घीझ्येरी ॱनाना ॱङेटो नी होराङ स्यीगुलाक।” 33 राङला गोकोर ताङदु ॱमाच्युक। “रोवा ङेन्पामुला धेप्ना, चो़पा शाङागो मेताला डोवालाक।” 34 खेक्या रीक्पा शीम धेनी धा देने ॱहाला, धीक्पा माझ्यी। खेक्याने रीङगागी को़न्क्षोकला ङोगोवाः ॱमेस्येगीन झ्येरी, खेक्या ङोछा घोयेदुक ॱनेरी ङा ॱनाहीन। ॱलार सो़न्गीन ली़गी कोर 35 हीना रीङगागी ढीगीलाक, “स्यीम्पोक्या घाङगी झ्येरी सो़न्गीले? खुङक्याई ली़ घारे च्यीक खेरती हुङगीले?” 36 खे ॱलेन्दाक्याओ, खीकी ताप्कीन साङागो ॱमास्यीवाला ॱमेकेलालाक। 37 ढो याङना श्येम्मा ढु घारे हीन्ना, खीकी घी ताप्ना होदेगो स्याम्ला झ्युङये हीन्गीन ली़गो मालाक हीना होदेगी साङा च्यीगा लाक। 38 हीना को़न्क्षोकगी राङगी थुकोङगी थोक्ने, होदेला ली़ च्यीक ॱनाङगीलाक धेनी साङा ॱना रे-रेला होदेगीराङ ली़ ॱनाङगीलाक। 39 ली़ घीरी च्यीक्पा मेयोङालाक। मीगी ली़ ॱना च्यीक धेनी सेम्चेनक्याई श्येम्मा धेनी झ्याक्याई श्येम्मा धेनी ङ्याक्याई श्येम्मा ली़ हुङालाक। 40 धेनी नाम्खे ली़क्या धाङ साश्यीगी ली़क्या हुङालाक। हीना नाम्खे ली़क्याई शीजे ॱना च्यीक धाङ साश्यीगी ली़क्याई शीजे ॱना मेडावा हुङालाक। 41 ङीमागी हो़ ॱना च्यीक धेनी दावागी हो़ ॱना श्येम्मा धेनी कारमाक्याई हो़ ॱना श्येम्मा हुङालाक। धेनी कारमा च्यीकगी हो़ कारमा श्येम्माने मेडावा हुङालाक। 42 देरेराङ छीवाने सो़न्गीनक्यागीयाः हुङगीलाक। सा होकदु बेगीन ली़ नी मेताला डोवालाक धेनी ॱलार सो़न्पो लाङगीन नी, मेताला मेडोवालाक। 43 ली़ नी शीजे मेताला साला बाःलाक धेनी शीजेला होदे सो़न्गीलाक। तोप मेताला होदे बाःलाक धेनी तोपला होदे सो़न्गीलाक। 44 स्याठाकगी ली़ला होदे बाःलाक धेनी सेम्ङीगी ली़ला होदे सो़न्गीलाक। स्याठाकगी ली़ हो़गीन च्योक्रे, सेम्ङीगी ली़याः हुङालाक। 45 होझ्येरी सुङरापला देरे ढीक हो़तालाक, “धाङपो मी आदामगो सो़न्पो झ्युवालाक।” धेनी थामागी आदामगो छे ॱनाङगीन थुक्ङी झ्युवालाक। 46 घीहीन्ना सेम्ङीगो धाङपो मेन्दा हीना स्याठाकगी ली़गो धाङपो लाक धेनी होदे स्याम्ने सेम्ङीगी ली़ लाक। 47 धाङपो मीगो थालागी को़का साश्यीने लाक। धेनी ॱङीवागो नाम्खे श्यीङखामने लाक। 48 थालाने शो़साक्या थालाने शो़सा मीगो च्योक्रे हुङालाक धेनी नाम्खे श्यीङखामगी हीन्गीनक्या, नाम्खे श्यीङखामगी मी च्योक्रे हुङालाक। 49 धेनी होराङ थालागी मीगी ॱयीपला केक्या च्योक्रे, नाम्खे श्यीङखामगी मीगी ॱयीपलाः केगीलाक। 50 धा पी़नक्याओ, ङा खेक्याला ॱनाहीन स्याठाकला को़न्क्षोकगी ग्यासीगी थोप्ताङ ॱमेथोबालाक धेनी मेताला डुगीन ली़ला मेताला मेडोगीनगी थोप्ताङ ॱमेथोबालाक। 51-52 ङेन्दाङ, ङी खेक्याला साङवे लाब च्यीक ॱनाउ, होराङ घीरी स्यीगीमालाक हीना होराङ घीरी थेङ च्यीक धाङ ॱमीक चुम झ्यीगीन च्यीकला, धेनी दुङगी थामे केकला ग्युरवा थेप्कीलाक। घीझ्येरी ॱनाना दुङकेक ग्याप्कीलाक धेनी स्यीम्पोक्या मेताला मेडोगीन छेला सो़न्गीलाक। धेनी होराङ ग्युरकीलाक। 53 घीझ्येरी ॱनाना मेताला डोगीनगी, मेताला मेडोगीन ली़ला धेनी छीवाला डोये हीन्गीन ली़गी, छीवा मेगीन ली़ला ग्युर घोगीलाक। 54 धेनी मेताला डोगीनगी मेताला मेडोगीन धाङ छीवाला डोये हीन्गीन ली़गी, छीवा मेगीन ली़ला ग्युरी घाङला देरे ढीक्टा कागो डुप्कीलाक, “छीवा नी ॱमाक थाप्कीनला फाम्बालाक।” 55 “ये छीवा, ख्यी़ ग्याखा घाना? ये छीवा, ख्यी़ दुङगो घाना?” 56 छीवागी दुङ नी धीक्पा लाक धेनी धीक्पागी वाङ नी क्षो़ठीम लाक। 57 हीना होरी चोवो येशु मास्यीकागी थोक्ने, होराङला ग्याखा ॱनाङगीन खोङ को़न्क्षोकला काटीन्क्षे पुलाहीन। 58 होझ्येरी ङी चेवे पी़नक्याओ, खेक्या तेन्पो धाङ घु-घु मीझ्यीदा धो़क। धेनी चोवोगी नाङ खीकी काल्ले ग्याप्कीनगो दो़न मेगीन मेयोङालाक ॱनेरी, खेक्याई स्येगीन झ्येरी, खेक्या चोवोगी क्षाक्ले ॱमीच्यीकी हुरा झ्येरी झ्यीदी सोङ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.