१ कोरीन्थुपा 13 - ॱलोवाझाम्पागी कोर 1 ङी मीक्या धाङ नाम्खे भाङछेनक्याई केरीकला लाब ताङनाः, हीना ङी नाङ झाम्पा मेना, ङा ढाकेक ग्याप्कीन ॱङा याङना तीङढा तो़न्गीन रोल्मो च्यीक च्योक्रे लाक। 2 धेनी ङाला ॱङो़न स्येयेगी ॱनाङज्यीन हो़ना धेनी ङी साङवा घीरी धाङ स्येयो़न घीरी ॱहाघोरना धेनी रीक्या पो़ थुक्येगी धेपा घीरी हो़नाः, हीना ङी नाङ झाम्पा मेना ङा घीया मालाक। 3 धेनी ङाला हो़गीन घीरी झ्यीम्बा ताङना धेनी ङी ली़ राङ सो़न्पो ॱराक्येला तेरनाः, हीना ङी नाङ झाम्पा मेना ङाला फेन्थोक्ये घीया मेक। 4 झाम्पा नी शो़पाचेन धाङ ॱङीङजेचेन हुङालाक। झाम्पागी ठादोक मीझ्यीदालाक धेनी राङतो़ मीझ्यीदालाक धेनी दे ङागेल क्षे मेयोङालाक। 5 झाम्पा नी चुक्वा मेयोङालाक धेनी राङदो़न च्यीगा ॱमेचालालाक। धेनी दे नी उक्कुरा खोङडो मेलाङगीन धाङ श्येनगी ङेक्यो़नक्या सेमला मेश्याक्कीन हुङालाक। 6 धेनी झाम्पा नी ङेन्पाला ङ्यामो मेघालालाक हीना धेन्पाला ङ्यामो घा लाक। 7 धेनी झाम्पागी घीरी शो़पा झ्यीदालाक धेनी दो़न घीरीला यीच्चे झ्यीदालाक धेनी दो़न घीरीला रेवा झ्यीये धाङ दो़न घीरीला दुक्री़ झ्यीदालाक। 8 झाम्पाला जोक्येगी था मेयोङालाक। हीना ॱङो़नस्येक्या मेताला डुगीलाक धेनी केरीकगी ॱनाङज्यीनक्या गाक्कीलाक धेनी स्येयो़नक्या मेताला डुगीलाक। 9 घीझ्येरी ॱनाना होरी स्येयो़न ॱमेछाङगीन हुङालाक धेनी होरी ॱङो़नस्येक्या ॱमेछाङगीन हुङालाक। 10 हीना फी़न्सुम छोक्पागो फेई घाङला, ॱमेछाङगीन घीरी मेताला डुगीलाक। 11 ङा टुवा हो़ती घाङला, ङी टुवा च्योक्रे लाब तावी, टुवा च्योक्रे साम्लो तावी धेनी टुवा च्योक्रे सामस्यीक्या तो़न्बी हीना ङा नाजु च्ये क्षे झ्युरी, ङी टुवा हो़ती घाङगी चो़पाक्या पावी। 12 धान्दा होराङ ॱमुक्पी तुम्दा मेलोङला तागीन च्योक्रे, सावो ॱमेथोङालाक हीना स्याम्ला ॱङो़सुमदु ज्यागीलाक। धान्दा ङाला तीते च्यीक स्येयेहो़क हीना स्याम्ला को़न्क्षोकगी ङी कोरला घीरी खेन्गीन च्योक्रे, ङीयाः घीरी स्येगीलाक। 13 धेनी धा धेपा धाङ रेवा धाङ झाम्पा सुम ॱनेगीलाक। हीना देक्या नाङने गेक्षेस्योकगो झाम्पा लाक। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.