१ कोरीन्थुपा 12 - ॱलोवाधाम्पे थुक्ङीगी ॱनाङज्यीनक्याई कोर 1 धा पी़नक्याओ, धाम्पे थुक्ङीगी ॱनाङज्यीनक्याई कोरला खेक्याई स्येगीनगो ङा दो़दीहो़क। 2 धेनी खेक्या धेपा मीझ्यीदी घाङला, थापस्यी माङागी थोक्ने लाब ताङ ॱमीथुक्कीन ल्हाकुन्डाक्या स्योकला, खेक्या क्षाक्क्षो़पा पुयेला यो़री सोसागो खेक्याई स्येलालाक। 3 होझ्येरी को़न्क्षोकगी थुक्ङी गोने लाब ताङगीन सी़या “येशुला ॱमेमो फोक्वास्योक” ॱनेरी ॱमेनालाक धेनी धाम्पे थुक्ङीगी गोने च्यीगा “येशुराङ चोवो हीन।” ॱनेरी ॱना थुक्कीलाक ॱनागीन लाब दे, खेक्याई ॱहाघोकीनगो ङा दो़दीहो़क। 4 धा ॱनाङज्यीनक्या ॱना माङा हो़तालाक हीना देक्या ॱनाङगीन, धाम्पे थुक्ङीगो च्यीकराङ हो़तालाक। 5 धेनी श्याप्ची श्युयेक्या ॱना माङा हो़तालाक हीना चोवो नी च्यीक्पाराङ लाक। 6 धेनी लेगाक्या ॱना माङा हो़तालाक हीना घीरीला राङ-राङगी लेगा झ्यीयेगी नी़पा ॱनाङगीनगो, को़न्क्षोक च्यीकराङ लाक। 7 घीरीला फेन्थोक्येगी क्षीदु मी रे-रेला धाम्पे थुक्ङी नी, ॱङो़न जे हो़तालाक। 8 होझ्येरी धाम्पे थुक्ङीगी गोने रीङगाला स्येरापगी ताम स्येये धेनी रीङगाला दे थुक्ङीगी गोनेराङ स्येयो़नगी ताम स्येये, 9 श्येम्माक्याला दे थुक्ङीगी गोनेराङ धेपा झ्यीये धेनी श्येम्माक्याला दे थुक्ङी च्यीक्पागीराङ, नेपा सोयेगी ॱनाङज्यीनक्या 10 धेनी श्येम्माक्याला ॱहाङसागीन लेगाक्या झ्यीये धेनी रीङगाला ॱङो़न स्येये धेनी रीङगाला सेम्ङीक्या ॱयेवा चेये धाङ रीङगाला ढामेढा केकक्या ग्याप्ये धाङ रीङगाला, होदे केकक्याई दो़न टोयेगी नी़पाक्या ॱनाङ हो़तालाक। 11 दे क्षाक्ले घीरी धाम्पे थुक्ङी च्यीकगी राङ जेदालाक धेनी खोङगी राङगी थुकोङगी थोक्ने मी रे-रेला देक्या ॱनाङालाक। ली़ च्यीकला येन्लाक माङा 12 ली़ च्यीकला येन्लाक माङा हो़गीन धाङ येन्लाक माङा हो़ना ली़ च्यीक हीन्गीन च्योक्रे, मास्यीकाः दे च्योक्रेराङ लाक। 13 घीझ्येरी ॱनाना होराङ याहुदापा हीन्ना गीरीक हीन्ना याङना ढेन्योक हीन्ना राङवाङगी मी हीन्ना, होराङ घीरी ली़ च्यीकला ग्युरयेला, धाम्पे थुक्ङी च्यीगारागी थोक्ने ठी़सो़ थोप्पालाक धेनी होराङ घीरीगी नाङ धाम्पे थुक्ङी च्यीक्पाराङ ॱनाङ हो़तालाक। 14 ली़ च्यीक नी येन्लाक च्यीकगी मेन्दा, हीना येन्लाक माङागी शो़ हो़तालाक। 15 धा काङबागी, “ङा लाक्पा मेन्गीन झ्येरी ङा ली़गी येन्लाक मेन” ॱनेरी ॱनाना, दी झ्येरी होदे ली़गी येन्लाक मेयोङालाक से? 16 धेनी आमच्योकगी, “ङा ॱमीक मेन्गीन झ्येरी, ङा नी ली़गी येन्लाक मेन” ॱनेरी ॱनाना, होदे ली़गी येन्लाक मेयोङालाक से? 17 धेनी ली़ घाङजाङ ॱमीक च्यीक हीन्ना, ङेन्येगो घाने? धेनी ली़ घाङजाङ आमच्योक हीन्ना, ॱनुम्येगो घाने? 18 हीना को़न्क्षोकगी राङगी थुकोङगी थोक्ने येन्लाक रे-रेला ली़गी मीरी-मीरी ॱनेसारु श्याक जे हो़तालाक। 19 धा येन्लाक घीरी च्यीक्पाराङ झ्युङये हीन्ना ली़गो घाने झ्युङये? 20 होझ्येरी, येन्लाकक्या माङा हो़तालाक हीना ली़ च्यीकराङ लाक। 21 ॱमीकगी लाक्पाला, “ङाला ख्यो़ घोये मीदुक” ॱनेरी ॱना ॱमीथुक्कीलाक धेनी गोवागी काङबाला, “ङाला ख्यो़ घोये मीदुक।” ॱनेरी ॱना ॱमीथुक्कीलाक। 22 ॱयो़ल्ले ली़गी येन्लाक क्योवा थोङगीनक्या ली़ला घो़लालाक। 23 धेनी होरी ॱनाङछुङ चीगीन येन्लाकक्याला, होराङ माङा गेक्षे चीलालाक। धेनी तो़न ॱमीथुक्कीन येन्लाकक्याला होराङ ॱमीच्यीकी दाक्पो ग्यालाक। 24 धेनी तो़न थुक्कीन येन्लाकक्याला हुरे दाक्पो ग्याप मेघोवालाक। हीना को़न्क्षोकगी होरी ली़गी येन्लाक ॱमा चीचाक्याला कुरती क्षे जेदी, होरी ली़गी येन्लाकक्या मुला ढीक जे हो़तालाक। 25 देरे जेये दे, ली़ नाङदु ॱमीथी़न्गीन मीझ्युङा हीना येन्लाकक्याई च्यीकगी च्यीकला ढाडा तादोक झ्यीयेगी क्षीदु लाक। 26 येन्लाक च्यीक दुक्पु ङ्याङना, येन्लाक घीरीमुला दुक्पु ङ्याङालाक। याङना येन्लाक च्यीकगी घुस्याप झ्युङना, येन्लाक घीरीमुला घाटो झ्यीदालाक। 27 धा खेक्या मास्यीकागी कुली़ लाक धेनी खेक्या रे-रे खोङगी येन्लाकक्या लाक। 28 को़न्क्षोकगी क्षो़छोक नाङला धाङपो कुछापक्या, ॱङीवा ॱङो़नस्येखेनक्या, सुम्बा ॱलोपो़नक्या धेनी ॱहाङसागीन लेगा झ्यीगीनक्या धेनी नेपा सोगीन ॱनाङज्यीन थोप्थाक्या धेनी रोक्राम झ्यीगीनक्या धेनी गोठी झ्यीगीनक्या धेनी केरीक ढामेढा स्येगीनक्या को़ जे हो़तालाक। 29 घीरी कुछापक्या लाक से? घीरी ॱङो़नस्येखेनक्या लाक से? घीरी ॱलोपो़नक्या लाक से? घीरी ॱहाङसागीन लेगा झ्यीगीनक्या लाक से? 30 घीरीला नेपा सोगीन ॱनाङज्यीन हो़तालाक से? घीरीगी केरीक ढामेढाला स्येदालाक से? धेनी घीरीगी होदे केरीक ढामेढाक्या ग्युर थुक्वालाक से? 31 हीना ॱनाङज्यीन क्षेक्याई क्षीला दो़पा क्षे झ्यी। धेनी ङी खेक्याला लाम घास्योकगो तो़न्दु। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.