१ कोरीन्थुपा 11 - ॱलोवा1 ङी मास्यीका लेमो झ्यीगीन च्योक्रे, खेक्यागीयाः ङी लेमो झ्यी। गो तुम्येगी कोरला 2 दो़न घीरीला खेक्याई ङाला ढेन्दी धेनी ङी खेक्याला तेरता ॱलापच्याक्या खेक्याई ॱरुङगीनला, ङा खेक्याई तो़टा ताङाहीन। 3 हीना केवे-भु घीरीगी उ नी मास्यीका लाक धेनी केमीगी उ नी, मोरी ख्योवा लाक धेनी मास्यीकागी उ नी को़न्क्षोक लाक ॱनेरी, खेक्याई स्येगीनगो ङा दो़दीहो़क। 4 ॱमो़लाम ग्याराङ याङना लुङ तेन्दाराङ, राङगी गोवा तुम्गीन केवे-भुगी राङगी उला ॱमेबेप ताङालाक। 5 हीना ॱमो़लाम ग्याराङ याङना लुङ तेन्दाराङ, राङगी गोवा ॱमीतुम्गीन केवे-भोमोगी राङगी उला ॱमेबेप ताङालाक। दे नी, राङगी ॱरा श्यारकीन च्योक्रे लाक। 6 घीझ्येरी ॱनाना केवे-भोमो च्यीकगी राङगी गोवा ॱमीतुम्ना, मी़ मोरी ॱरा ढाक्घो़। हीना केवे-भोमोगी क्षीदु राङगी ॱरा ढाक्ये याङना श्यारयेगो ङोजा च्यीक हीन्ना, मी़ मोरी गोवा तुम्घो़। 7 केवे-भु नी को़न्क्षोकगी ॱयीप धाङ शीजे हीन्गीन झ्येरी, खी़ खोरी गोवा तुम्ये मेतालाक हीना केवे-भोमो नी केवे-भुगी शीजे लाक। 8 घीझ्येरी ॱनाना केवे-भु केवे-भोमोने झ्युवामेन्दा, हीना केवे-भोमो नी केवे-भुने झ्युवालाक। 9 धेनी याङ केवे-भोमोगी क्षीदु केवे-भु को़वा मेन्दा, केवे-भोमो केवे-भुगी क्षीदु को़वालाक। 10 दे दो़नक्या धाङ नाम्खे भाङछेनक्या क्षीदु केवे-भोमोगी मोराङ वाङ होकदु हो़क ॱनेरी, तो़न्येला मोरी गोवा तुम्घो़। 11 घीहीन्ना चोवोगी नाङ केवे-भोमो नी, केवे-भुला रा मेली़गीन धाङ केवे-भु नी केवे-भोमोला रा मेली़गीन मेयोङालाक। 12 घीझ्येरी ॱनाना केवे-भोमो केवे-भुने झ्युङगीन च्योक्रे, केवे-भुगोवाः केवे-भोमोने केलालाक। हीना ॱङोपो घीरी को़न्क्षोकने झ्युङालाक। 13 धा खेराङक्याराङ साम्लो तोङ, केवे-भोमो च्यीकगी गोवा ॱमीतुमा, को़न्क्षोकला ॱमो़लाम ग्याप्ये दे लेम्बो दुक्ये? 14 धेनी राङश्यीगी राङ खेक्याला ॱलावा माले? केवे-भु च्यीकला ॱरा रीङा हो़ना, खी़ क्षीदु होदे ङोजा च्यीक लाक 15 हीना केवे-भोमो च्यीकला ॱरा रीङा हो़ना, होदे मी़ क्षीदु शीजे लाक। घीझ्येरी ॱनाना केवे-भोमोगी ॱरा रीङा नी, मोराङला काप्येगी क्षीदु ॱनावालाक। 16 हीना मी सु च्यीकगी दी कोरला चो़पा ग्याप्ङी दो़ना, हेक्या धाङ को़न्क्षोकगी क्षो़छोकक्याला दे माना श्येम्मा लुक्सो़क्या मेक। चोवोगी श्येलाक 17 धा दे होकगी ॱलापच्याक्याला, ङा खेक्याला तो़टा ॱमेताङ घीझ्येरी ॱनाना खेक्या जोमाराङ होदे फेन्थोकगी क्षीला मेन्दा, ॱनो़ क्यायेगी क्षीदु झ्युङी। 18 घीझ्येरी ॱनाना धाङपोगो, खेक्या क्षो़छोकदु मुला जोमाराङ, खीकी नाङदु स्योखाक भेगीनगो ङी घोरजुङ। धेनी देला ङी यीच्चे च्ये दुक। 19 खेक्याने धेपाला तेन्पो हो़गीनक्या ॱङो़न्येगी क्षीदु, खीकी घुङदु स्योखाक भेये दे झ्युङघोयेदुक। 20 खेक्यामुला जोमाराङ, खीकी शागीन शामागो चोवोगी श्येलाक ॱङोन्नेगो मालाक। 21 घीझ्येरी ॱनाना खेक्या शी घाङला, रीङगा राङगी शामागो एन्ला शालाक। धेनी रीङगा तोक्ती धेतालाक धेनी श्येम्माक्या शीरी धेतालाक। 22 खेक्या शा-थुङ झ्यीयेला खेरी राङगी खाङबा मेताले? याङमेना खेक्या को़न्क्षोकगी क्षो़छोकला थोङछुङ झ्ये धेनी घीया मेगीनक्याला ङोछारु च्युक्वा ले? ङा खेक्याला घी ॱनागुलाक से? ङा खेक्याला तो़टा ताङगुले? दी क्षीदु ङा फुक्की तो़टा ॱमेताङ। 23 घीझ्येरी ॱनाना चोवोने ङाला घी थोप्कीनगो, ङी खेक्याला तेरहो़क। होदेगो, चोवो येशु डागी लाक्तु छी़गीन छेनगोला, खोङगी ग्याङगागो क्षाकला ॱनुम्बालाक 24 धेनी काटीन्क्षे श्यी़ जेदी, होदेगो च्याक जेपालाक धेनी सुवालाक, “दे नी खेक्याई क्षीदु ङी ली़ हीन। ङी ढेन्सोगी क्षीला देरे झ्यी।” 25 देरेराङ झ्येरी श्येछारती खोङबागी फोरागो ॱनुम्दी देरे सुवालाक, “दे फोरा नी, ङी ठाकला हो़गीन धाम्चा साबागो हीन। खेक्याई दे नाम थुङना, ङी ढेन्सोगी क्षीला झ्यी।” 26 घीझ्येरी ॱनाना खीकी दे ग्याङगा दे शाये धाङ फोरा देने थुङी घाङला, चोवो ॱमाफेप थुक्पे चोवो कु ढोङगीनगोला, खेक्याई सेटाक झ्यीदालाक। 27 होझ्येरी चोवोला चीकुर मेगीनगी थोक्ने, चोवोगी ग्याङगा शा याङना फोराने थुङगीन मीला, चोवोगी कुली़ धाङ कुठाक ॱङीगाराला, धीक्पा झ्यीगीनगी क्यो़न फोक्कीलाक। 28 मी घीरीगी राङगी सेमला ताक्चा झ्यीघो़ धेनी च्यीगा ग्याङगा शाघो़ धेनी फोराने थुङघो़। 29 घीझ्येरी ॱनाना चोवोगी कुली़ला ॱमीचीला, शागीन धाङ थुङगीनक्याई राङगी शा-थुङ झ्यीगीनगी राङला छेपा फोक्तु च्युक्कीलाक। 30 होझ्येरी खेक्याने मी माङा क्योवा धाङ नेपा दुक धेनी रीङगा स्यीछादुक। 31 हीना होराङगी राङ-राङला ॱङोन्ने ताक्चा झ्येहो़ना, होराङला ठीम्चो़ फोक्की मालाक। 32 हीना चोवोगी होराङला ठीम्चो़ जेदी घाङला, होराङ जीक्तेम्पाक्यामुला थामेपे छेपा ॱमेफोक्येगी क्षीदु, खोङगी होराङला ढीक्ठीमला श्या जेदालाक। 33 होझ्येरी ङी पी़नक्याओ, चोवोगी श्येलाक शायेला जोमाराङ खेक्या च्यीकगी च्यीकला घुक। 34 धेनी मुला जोमाराङ खेक्याला ठीम ॱमेफोक्येगी क्षीला, खेक्याने तोक्कीन रे हो़ना होदेगी राङगी खीमदु शाघो़। धेनी दो़न श्येम्माक्याई कोरला, ङा हुङाराङ खेक्याला ॱलापच्या तेरयेहीन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.