१ कोरीन्थुपा 10 - ॱलोवाईस्राएलगी लुग्युगी थोक्ने ङेन्ता 1 पी़नक्याओ, खेक्याई दे लाबक्या स्येलाझ्यी ॱनेरी ङा दो़दीहो़क। होरी धाङबी फामाक्या रीतोङदु हो़ती घाङला, घीरी ॱरीङबा होकला ॱनेवालाक धेनी खुङक्या घीरी ग्याछो घुङने सोवालाक। 2 धेनी ॱरीङबा धाङ ग्याछोगी थोक्ने, खुङक्या घीरीगी मोशेगी नाङ ठी़सो़ श्यी़वालाक। 3 धेनी खुङक्या घीरीगी सेम्ङीगी शामा च्यीक्पा शेवालाक। 4 धेनी घीरीगी सेम्ङीगी क्षु थुवालाक। घीझ्येरी ॱनाना खुङक्यामुला हो़गीन सेम्ङीगी फोङगीङगी, क्षु खुङक्याई थुवालाक धेनी फोङगीङ दे मास्यीका लाक। 5 घीहीन्ना, खुङक्याने माङक्षेमुला को़न्क्षोक थुक ॱमाङेवालाक धेनी खुङक्याई फुङबुक्या रीतोङदुराङ थोरपालाक। 6 खुङक्या च्योक्रे होराङक्यागीयाः ङेन्पागी दो़पा मीझ्यीदास्योक ॱनेरी, देक्या होरी क्षीदु पे तो़न्येला झ्युवालाक। 7 खुङक्याने मी रीङगाक्या च्योक्रे, खेक्या ल्हाकुन्डाला ॱमाक्षो़। खुङक्याई कोरला सुङरापला देरे ढीक हो़तालाक, “मीक्या शाये धाङ थुङयेला धेबालाक धेनी चेमो चेयेला लाङबालाक।” 8 धेनी खुङक्या च्योक्रे होराङक्या लोक्येमला छी़ये मेतालाक। खुङक्याने मी रीङगा लोक्येमला छी़दी, ङीमा च्यीक्लाराङ मी तोङडा ङीस्यु च्याक्सुम स्यीवालाक। 9 धेनी खुङक्या च्योक्रे होराङक्या मास्यीकाला छो़ता झ्यीये मेतालाक। खुङक्याने रीङगागी छो़ता झ्येरी, खुङक्या डुलगी थोक्ने स्यीवालाक। 10 धेनी खुङक्या च्योक्रे होराङक्या दुकेक ग्याप्ये मेतालाक। खुङक्याने रीङगागी दुकेक ग्याप्ती, खुङक्याला ॱरोक चेगीन भाङछेनगी मेताला जेपालाक। 11 खुङक्या खाला झ्युजा दे घीरी, होरी क्षीदु पे झ्युङयेला लाक। धेनी होराङ धी़गी थाला ॱलेप हो़गीनक्याला ङेन्ता झ्युङयेला, देक्या ढीक्ती श्याक हो़तालाक। 12 होझ्येरी खेक्या तेन्पो ॱनेती धेहो़क साम्गीनक्या, मील्हीम्येगी क्षीदु शाप-शाप झ्यी। 13 मीक्याला भाप्कीन छो़ता माना, खेक्या श्येम्मा छो़ताला छी़ माङ्युङ हो़तालाक। हीना को़न्क्षोक नी ॱलोते छोक्पा हो़तालाक धेनी खोङबागी खेक्याई घोम ॱमीथुक्कीन छो़ता नाङदु छी़दु च्युक्वा जेगीमालाक। हीना खेक्या छो़ताला छी़नाः, खेक्याई घोम थुक्वास्योक ॱनेरी, खोङबागी खेक्याला छो़ताने थारकीन लामगोवाः तो़न्दा जेगीलाक। ल्हाकुन्डाला मेक्षो़येगी कोरला 14 होझ्येरी ङी चेवे रोवाक्याओ, ल्हाकुन्डाला क्षो़येने जेम्दी धो़क। 15 स्येरापचेन मीक्याला च्योक्रे, ङा खेक्याला ॱनाहीन धेनी ङी ॱनागीन लाबक्याला खेक्याराङ ताक्चा झ्यी। 16 धाम्पे सुरेगी फोरागी क्षीदु होराङ को़न्क्षोकला काटीन्क्षे श्यी़ली घाङला, होराङ मास्यीकागी कुठाकमुला थेला माले? धेनी होदे ग्याङगागो च्याई घाङला, होराङ मास्यीकागी कुली़ला थेला माले? 17 घीझ्येरी ॱनाना ग्याङगागो च्यीकराङ हो़तालाक धेनी होराङ घीरी ग्याङगा च्यीक्नेराङ शागीन झ्येरी, होराङ माङा हो़गीनक्या ली़ च्यीक लाक। 18 ईस्राएलगी मीरीकला तो़, क्षो़ठी खाला पुपा क्षो़पाने शागीनक्या क्षो़ठीगी क्षो़पाला थेला माले? 19 धा ॱहाना ङी ॱनागीनगी दो़नगो, कुन्डाला पुपा क्षो़पा दे शामाने ल्हाक याङना कुन्डा खोराङ ॱङोन्ने लाक ॱनेरी, ॱनालाक से? 20 देरे मालाक। ल्हाकुन्डाला क्षो़गीनक्याई को़न्क्षोकला मेन्दा डेक्याला क्षो़पा पुलालाक ॱनेरी, ङा ॱनाहीन। धेनी खेक्या डेक्यामुला थेगीनगो ङा मेदो़हो़क। 21 खेक्या चोवोगी फोरा धाङ डेक्याई फोरा ॱङीगाराने थुङ ॱमीथुक्वालाक। धेनी खेक्या चोवोगी सोच्योक धाङ डेक्याई चोक्चे ॱङीगाराने शा ॱमीथुक्वालाक। 22 होराङ चोवोला ठादोक ॱलाङदु च्युक्ये? होराङ खोङबाने स्युक्क्षे हो़तालाक से? धेपा झ्यीगीनक्याई राङवाङगी कोर 23 खेक्याई “ङी घी झ्यीना झ्यी क्षोक्वालाक।” ॱनेरी ॱनालाक हीना घीरी फेन ॱमेथोक्वालाक। खेक्याई “ङी घी झ्यीना झ्यी क्षोक्वालाक।” ॱनेरी ॱनालाक, हीना घीरीगी यारके ॱमेताङालाक। 24 मी सी़याः राङगी फेन्थोक ॱमेचाला श्येम्मागी फेन्थोक चाघो़। 25 स्या ठोमदु चोङदु श्याकश्या शामा घी हो़ना, होदे शाङा याङना ङेन्पागी थाक चेगीन, ख्यी़ स्येयो़नगी गोने ढीवा घीन्दा मीढीला शो। 26 घीझ्येरी ॱनाना “जीक्तेन धाङ होदे नाङला हो़गीन घीरी चोवोगी लाक।” 27 धेपा मीझ्यीगीन मी च्यीकगी ख्यो़ला डो़नला भो़ना, धेनी ख्यो़ डोङी दो़ना ख्यी़ दोङदु घी श्याक्हो़ना, होदेगो शाङा याङना ङेन्पागी थाक चेगीन ख्यी़ स्येयो़नगी गोने, ढीवा मीढीला शो। 28 हीना मी च्यीकगी ख्यो़ला, “दे नी क्षो़पाला पुपा लाक।” ॱनेरी ॱनाना, होदे ॱनागीन मी धाङ शाङा याङना ङेन्पागी थाक चेगीन स्येयो़नगी क्षीला होदे माशा। 29 ङा ख्यी़ स्येयो़नगी मेन्दा, होदे ॱनागीन मीगी स्येयो़नगी कोरला ॱनाहीन। ङी राङवाङगी कोरला मी श्येम्मागी स्येयो़नगी घीझ्येरी छो़ झ्यीये? 30 याङ ङी काटीन्क्षे श्यी़री शाना, ङी काटीन्क्षे श्यी़री शागीनगोला, मी श्येम्मागी ङाला घीझ्येरी क्यो़न चुक्ये? 31 होझ्येरी खेक्या शाना याङना थुङना याङना घी झ्यीना घीरी को़न्क्षोकगी शीजेगी क्षीदु झ्यी। 32-33 ङी मी घीरीला दो़न घीरीगी थोक्ने, घारु च्युक्येगी थापस्यी झ्यीगीन च्योक्रे, खेक्या याहुदापा हीन्ना गीरीक हीन्ना याङना को़न्क्षोकगी क्षो़छोकगी हीन्ना, खुङक्याई क्षीदु काक्दो झ्युङगीन लेगा घीया माझ्यी। घीझ्येरी ॱनाना खुङक्याला थारपा थोप्येगी क्षीदु, ङाराङगी फेन्थोक मेन्दा मी माङागी फेन्थोक चालीहो़क। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.