1 Johannes 1 - O angluno lil anda o Johannes 1984 (Noreg)

I vorba le trajoski

¹ Phenas tumenge pa i vorba le trajoski, savi sas tista anglunes. So ašundam, so dikhlam amare jakhenca, so dikhlam taj azbadam amare vastenca.

² Taj o trajo sikhadjilas, ame dikhlam kodo, taj phenas pa leste, taj phenas tumenge pa o trajo trajostar kaj sas kai o Dad taj sikhadjilas amenge.

³ So dikhlam taj ašundam phenas tumenge te šaj aven vi tume jekh amenca, sar kaj sam ame jekh le Dadesa taj leske Šavesa, o Jesus Kristus.

⁴ Kado ramonas tumenge te šaj avel amari voja tista bari.

Trajin and'o udud!

⁵ Kadi si i vorba kaj ašundam leske Šavestar taj phenas tumenge: O Del si o udud, taj ande leste na'i či sosko tunjariko.

⁶ Te phenasa ke sam jekh le Devlesa, me phiras and'o tunjariko, atunči xoxavas taj či žas pala o čačimos.

⁷ Me te trajinasa and'o udud, sar kaj o Del si and'o udud, atunči sam jekh avrenca, taj le Devleske Šavesko rat vužarel amen katar sako bezex.

⁸ Te phenasa ke na'i amen bezex, atunči pale amen xoxavas, taj o čačimos na'i ande amende.

⁹ Te phenasa pe amare bezexa le Devleske, vo si čačimasko taj vorta, taj jertil amare bezexa taj vužarel amen katar sako nasulimos.

¹⁰ Te phenasa ke či kerdam šoha bezexa, atunči las le Devles xoxamneske, taj leski vorba na'i ande amende.