Ɓaebele 1 - Lobala

Ŋwaphongo awɔ na nzela ya Ŋwana wɛ

¹ Waakalakala Ŋwaphongo awɔlɛkyɛ ɓankɔkɔ ɓa ɓanga mbala nzikye na ná ndengye nzikye na nzela ya ɓaimosi,

² o nkɔlɔ ya suka iye, alowɔsi na nzela ya Ŋwana wɛ owatɛyɛ yo ndomi ya maphɔɔ masɔ, nde na nzela yɛ mɛ, akyela munse munsɔ.

³ Yo, ooli ingyɛngyɛ sa nkyɛmɔ yɛ, na ɓonɛnɛ pha ɓoekondo phɛ. Emba aphisi maphɔɔ masɔ na mwiya ŋwa Iloɓa sɛ. Waunva yo ikunyola masumu ma ɓato ɓasɔ, akyɛ zala o ɓoloo pha Ɓonɛnɛ pha Ŋwaphongo, o ikolo.

Ŋwana wa Ŋwaphongo alekyi ɓanze

⁴ Abutwa na mwiya ileka ɓanze, yango mɛna azwa nkombo ya ngambo eelaa koleka maaka ɓɛ.

⁵ Phɔ nzaa onte ya ɓaanzelu owaunva wɔlɛ Ŋwaphongo nɔnɔ mbala yɔnɔyɔ oɓokye: «Iwɛ oli mpenza ŋwana wa nga, lɔlɔ, nga nabutoo ɔngɔ.» Naa oɓokye: «Nga, namoɓa ango emba yo amoɓa ŋwana wa nga.»

⁶ Kasi wakula kamba yo ŋwana owa ɓola o mokyisi, awɔ yokye: «Ɓaanze ɓa Ŋwaphongo ɓasɔ ɓamokusamele.»

⁷ Emba oka ɓanze, kawɔ ɓoɓo: «Kabuya ɓanze ɓɛ́ɛ biwɛɛlɛ, na ɓato ɓɛ́ɛ ɓa etoma itumbu sa mwenya.»

⁸ Kasi oka Ŋwana wɛ awɔ: «Mumbanga ŋwa ɓokonzi pha wɛ, O Ŋwaphongo, ŋwamoɓa phɔ ya bipha na bipha. Emba motuu ŋwa ɓosembo eli motuu ŋwa ɓokonzi pha wɛ.

⁹ Wazinga ɓosembo, waina ɓoɓe, yango mɛna, Ŋwaphongo, Ŋwaphongo wa wɛ aeyinga mauta maa nkyisa, koleka ɓɛbi na wɛ.»

¹⁰ Aamba kula wɔ ɓoɓo: Eli iwɛ, Nkolo, owakyela munse o etatele, emba ikolo elii bitoma ba maɓɔkɔ ma wɛ.

¹¹ Isɔ miina yamowa, kasi iwɛ, wamoikala. Na isɔ yamokotwa ndokolo etobu.

¹² Emba ɓokokyele ɓɛ́ɛ na munkoto, wamoizinga, ndokolo etobu, ɓamo ɓa endinya, kasi iwɛ, oli nde ɓomɔ, mambula ma wɛ etemaakome o suka.

¹³ Emba nzaa onte ya ɓanze owaunva yo wɔlɛ nɔnɔ mbala yɔnɔyɔ oɓokye: «Zala o ɓoloo pha nga, tee nɔnɔ owamobuya nga ɓanguna ɓa wɛ, etɛyisa ya makolo ma wɛ.»

¹⁴ Te ɓali ɓɛ́ɛ ɓasɔ malɔɓɔ maakyele bitoma naa maatome yo phɔ ya ɓolaa pha ɓato ɓasengyesi izwa ilaka sa lobiko?